1 ZA GOŊE 20

Akaɓ kaa kacella tǝ Sirien

1Comki Benhadat#20:1 Benhadat patǝ gwa ah yo, kaa goŋ fahfal ma pǝ 1 Za Goŋ 15:18. goŋ sǝr Siria tai za sal ah daŋ, za goŋ jemma sai tǝtǝl gwa no ne ki, tǝkine pǝrri ne muŋta salle, ge ɗaŋ yaŋ Samaria. 2Pee zapee ge wo Akaɓ goŋ Israel ɓǝr yaŋ ahe, ka mo faara nyi ko: Benhadat faa sye: 3Solai ɓo ne vãm kaŋnyeeri ɓo daŋ ma ɓe yo, ŋwǝǝ ɓo ne wee ɓo masãh ah ra daŋ ma ɓe yo. 4Goŋ Israel zyii ge zah ah faa: Ɓǝ ah a tǝgbana mai dǝɓlii ɓe goŋ mo faa ɓo. Ame tǝkine fan mai me ne daŋ ma ɓo ko yo.

5Amma Benhadat so pee ra ge kpǝ, faara: Benhadat faa: Me pepee ɓo ka faa nyi mo sye, mo nyi solai ɓo ne vãm kaŋnyeeri ɓo ne ŋwǝǝ ɓo tǝkine wee ɓo mawǝǝ daŋ gee me. 6Amma mo tǝ njaŋ, tǝ'nan ne cok naiko, me ga pee za yeɓ ɓe ra ge wo ɓo, a ga mgbaira yaŋ ɓo, ne yaŋ za yeɓ ɓo, fan mai moo ga lwaara gŋ mo 'nyah suu ɓǝǝ ɓe daŋ, a ga woora pǝ̃ǝ ne ko.

7Goŋ Israel tai zaluu sǝr ah daŋ gera wol ahe, faa nyi ra: We ẽe ɓǝ mai ne me ɗǝ, dǝɓ mai tǝ kyeɓ ka joŋ ɓǝɓe' wo mana, pepee ge wo ɓe, a 'yah ŋwǝǝ ɓe, ne wee ɓe mawǝǝre, ne solai ɓe tǝkine vãm kaŋnyeeri ɓe daŋ, me jiŋ nyi ko laŋ ya. 8Zaluu ne za daŋ faara nyi ko: Mo laa zah ah ka, mo zyii laŋ ka ta. 9So faa nyi zapee Benhadat: We ge faa nyi dǝɓlii ɓe goŋ sye: Fan mai daŋ mo fii ge zah ɓe zahnahpelle, me ga nyi fan ahe. Amma fan ma nyẽe me ka gak nyi ya. Zapee kalra ge nyi ne ɓǝ ahe. 10Benhadat so pepee wol ah faa: Me ge ɓeɓ yaŋ Samaria ka mo ciŋ ful kol ya ɓe, masǝŋ ɓe ra mo joŋra me nai sye nai sye, ŋhaa mo kal tǝl ah laŋ ta. 11Goŋ Israel so zyii ɓǝ ge zah ah faa: Dǝɓ mai mo tǝ zyeɓ suu ka ruu sal ruu ba ka yii suu ah tǝgbana ruu sal vǝr ɓe ya. 12Ne cok Benhadat mo laa ɓǝ maiko, ka kaa ɓo ne za goŋ mor tal mbǝro tǝ zwahra yimmi. Faa nyi za yeɓ ahe: We zyeɓ suu ka ruu salle. So zyeɓra suu ka ruu sal ne yaŋ Samaria.

13So profeto Masǝŋ ki no ge lwaa Akaɓ goŋ Israel faa nyi ko: Dǝɓlii Masǝŋ Israel faa: Mo kwo za mapãa mai ɓe ne? Me ga soɓ ra ga mor jol ɓo tǝ'nahko, mor ka mo tǝ, ame ye Dǝɓlii. 14Akaɓ faa: A ga soɓ ra gin mor jol ɓe ne jol zune? Profeto Masǝŋ zyii faa: Dǝɓlii faa zye ga soɓ ra ne jol za goŋ ma tǝbanna ah ra ma tǝluɓ lalle. Akaɓ fifii faa: Azu ye ga tǝŋ sal ah ne? Zyii faa: Amo ye mo tǝŋ.

15Goŋ Akaɓ tai za goŋ ma tǝbanna ah ra ma yaŋ ma lal pǝ sǝr ahe, pãa ɓǝǝ temere gwa ne jemma sai tǝtǝl gwa, fahfal ah so tai za sal Israel daŋ pãa ɓǝǝ a ujenere rǝŋ. 16Pǝ̃ǝra ne com kǝsyitǝtǝlli, amma ka Benhadat tǝ zwan yim tǝtǝǝ ne pǝ tal mbǝro, ako tǝkine za goŋ jemma sai tǝtǝl gwa mai moo gbahra jol ahe. 17Za goŋ ma tǝbanna ma pǝ sǝr Israel ma lal kŋ pǝ̃ǝra kǝpelle. Benhadat pee za ge ẽe cok lalle, so pii soo ge faara nyi ko: Za ki pǝ̃ǝra ɓo gin yaŋ Samaria. 18So faa: Mo pǝ̃ǝra ɓo ka zyeɓ ɓǝ, ka we gbah ra ne nahnǝnni, so mo pǝ̃ǝra ɓo ka ruu salle, we gbah ra ne nahnǝn ta. 19Za goŋ ma tǝbanna ma pǝ sǝr ma lal pǝ̃ǝra gin tǝgǝǝ yaŋ, so za sal fahfal ɓǝǝra. 20Koo zune daŋ woŋ sooje Siria ge jol vaŋno vaŋno, ik ge lalle. Za Siria rǝkra ɗulli, za Israel mgbãara mor ɓǝǝ kpǝtak. Goŋ sǝr Siria ɗuu ne pǝr ǝ̃ǝ tǝkine za pǝr ah manyeeki ahe. 21Goŋ Israel pǝ̃ǝ, nyiŋ pǝr tǝkine muŋta salle, ik za kǝsyil Sirien pǝlli.

22So profeto kŋ ge wo goŋ Israel faa nyi ko: Mo swaa suu ɓo, ka mo tǝ ɓǝ fan mai moo ga joŋ pel pǝsãhe, mor syii ki mo kiŋ ge dai ɓe, goŋ Siria ga ge ka ruu sal ne mo.

Za Israel ikra za mǝǝna Sirien ujenere temere

23Mor zaluu pel goŋ Siria faara ɓǝ ɓo ne Benhadat: Masǝŋ Israel masǝŋ waar o, kaara kacella ɓo tǝ man mor ahe. Sai na ge ruu sal ne ra pǝ cok ma tǝ sǝr sǝŋ ahe. Nai ɓe, na ga kal ra ne swahe. 24Amma na joŋ naiko: na nǝǝ za goŋ rai ge lalle, na rǝk swah sooje ra pǝ cok ɓǝǝra. 25Amo laŋ mo kyeɓ za sal tǝgbana pãa za sal mai sal mo ik ɓo jol ɓo, ne pǝrri tǝkine muŋta salle, tǝgbana pãa pǝr ne muŋta sal ma kǝpelle, ka na ge ruu sal ne ra pǝ cok ma tǝ sǝr sǝŋ ahe. Nai ɓe, na ga kal ra ne swahe. Goŋ laa zah ɓǝǝra, so joŋ noo ta.

26Ne cok syii ki mo kiŋ ge daini, Benhadat tai Sirien kal ge Afek ne ka ruu sal ne za Israel. 27Za Israel laŋ, zyeɓra farelle, taira ki kalra ka ga zyaŋ ki ne Sirien. Ge ɗǝrra pel ɓǝǝ jaŋjaŋ. Za Israel ara tǝgbana ŋgaɓ sǝgwii manyee ah gwa, amma Sirien ma ɓǝǝ ara pǝpãare. 28Dǝɓ Masǝŋ kŋ ge faa nyi goŋ Israel: Dǝɓlii faa sye: Sirien faara: Dǝɓlii ako ye masǝŋ waare, ako ye ka masǝŋ tǝ sǝr sǝŋ ya. Mor ahe, me ga soɓ za mapãa mai ga mor jol ɓo mor ka mo tǝ, ame ye Dǝɓlii. 29Uura pel ki jaŋjaŋ zah'nan rǝŋ. Ne zah'nan rǝŋ ah sal gbǝ ki, za Israel ikra za mǝǝna Sirien 100.000 pǝ zah'nan vaŋno. 30Tǝcoŋ ɓǝǝ ɗuura kal ge yaŋ Afek. So ɓaale lee ik tǝcoŋ za matǝ 27.000 mo coŋ ɓo tǝɗe'.

Akaɓ soɓ Benhadat yea ne cee

Benhadat ɗuu kal ge tǝgǝǝ yaŋ, ɗuu dan ge ɓǝr yaŋ ŋhaa zǝǝ kal ge pǝpahe. 31Zaluu pel goŋ faara nyi goŋe: Aru laa za goŋ Israel ara ye za goŋ ma kwan syakke. Ru ga ɓaa fatãa ga wo suu, ru ga bam zah tǝtǝl ne suu ka ru pǝ̃ǝ ru ge wo goŋ Israel, ɗah maki a ga soɓ na wo sǝr no ne? 32Ɓaara fatãa ge wo suu bamra zah tǝtǝl ne suu, gera wo goŋ Israel faara: Dǝɓ yeɓ ɓo Benhadat faa sye: Oseni mo soɓ tǝtǝl ɓe wo sǝrri. Goŋ Israel zyii faa: Ako no ne suu ah sǝŋ ba ne? Naa pa ɓe yo. 33Zan ah laara ɓǝ ah a na kyaŋ ɓǝ 'nyahre, hǝǝra zyii ɓǝ ah zah ah faa: A nooko, Benhadat naa pa ɓo ko yo. So faa: We ge ɗii ko ge ne ko. Benhadat kal ge wol ahe, so Akaɓ soɓ ko yee tǝ muŋta sal ahe. 34Benhadat faa nyi ko: Yaŋ maluu mai pa ɓe mo nyiŋ jol pa ɓo, me ga soɓ nyi mo. Mo tǝ 'yah no ɓe, mo zyeɓ yaŋ lee fan ɓo yaŋ Damaskus tǝgbana pa ɓe mo joŋ yaŋ Samaria. Akaɓ so faa: Me ga wǝǝ mo ɓoo tǝ ɓǝ gbanzah maiko. Gbǝ zah ne ki, so soɓ fahlii nyi ko kalle.

Masǝŋ ŋgoŋ kiita tǝ Akaɓ

35Dǝɓ vaŋno kǝsyil profetoen faa ɓǝ nyi dǝɓ ma ne ki: Mo loɓ me o. Mor Dǝɓlii faa ɓǝ ah ɓo nyi ko. Amma dǝɓ ah zyii loɓ ko ya. 36So faa nyi ko: Mo zyii ka laa zah Dǝɓlii ya, mor ahe, ne cok moo ga ur gin nyee ka kalle, ɓol ga i mo pǝ wulli. Ne cok mo ur gin wol ah tǝ ga o, ɓol zyaŋ ne ki, i ko pǝ wulli.#1 ZaG 13:24

37Dǝɓ ma kǝsyil profetoen kŋ so zyaŋ ne dǝɓ ki faa nyi ko: Mo loɓ me o. Dǝɓ ah loɓ ko, so kan syim wol ahe. 38So profeto kal ge byak tǝ goŋ tǝ fahlii, rii zyim cok nǝn ah fer suu ah ne cam. 39Ne cok goŋ mo ge tǝ pǝ̃ǝni, ɓyaŋ ɓǝ nyi goŋ faa: Ame dan ge kǝsyil salle, sooje maki ah zaŋ dǝɓ ki gee me ne ko faa nyi me: Mo byak dǝɓ nyẽeko, mo kal soɓ ko muŋ ɓe, ka mo ga wǝ zahwaa ahe, wala mo ga soo solai dah temere dappe tǝ ɓǝ ahe. 40Ne cok yeɓ mo kiŋ tǝtǝl nyi me mee joŋ maino joŋ maino, dǝɓ ah so ǝ̃ǝ me muŋ. Goŋ Israel faa nyi ko: Kiita ɓo a nooko, amo ye ŋgoŋ ɓo ne suu ɓo. 41So ɓaŋ zyim mai mo rii ɓo cok nahnǝn ah ge lal gwari sǝ, goŋ Israel so tǝ o, ako ye dǝɓ ma kǝsyil profetoen kŋ. 42Faa nyi goŋe: Dǝɓlii faa sye: Amo soɓ dǝɓ mai me soɓ ɓo ne tǝkẽawãk ka mo yeako ka ɓoo, mor ahe, mo ga wǝ zahwaa ahe, za ɓo laŋ ga wuk zahwaa za mǝ ahe.

43Goŋ Israel kal ge fah yaŋ ah ne swaa ɓǝ tǝkine kpãhe, ge dai yaŋ Samaria.

Currently Selected:

1 ZA GOŊE 20: MUAR

Highlight

Copy