1 KEE ƁƏ 5

Morsǝ̃ǝ Ruben

1Mai morsǝ̃ǝ Ruben we Israel malii yo: (Ruben swǝ ne mabyak pam maki ah vaŋno, mor ah lwaa fahlii ka ren fan mai welii moo ren ao, ɓaŋra Yuseɓ kan pǝ cok ahe.#Tǝŋ 35:22; 49:3-4 2Zahban Yuda tǝŋ joŋ pǝswahe, so tǝŋ kaara goŋ tǝ tǝcoŋ zahban ɓǝǝ daŋ, amma ɓaŋra Yuseɓ kan pǝ cok welii ma ren yaŋ.)#Tǝŋ 49:8-10 3Ruben we Israel malii bem wee nai, tǝɗii wee ah a naiko: Hanok, Paloo, Hesron, ne Karmi.

4Mai morsǝ̃ǝ Joel ye ne wee ɓǝr ɓǝǝra: Semaja, Gog, Syimai, 5Mika, Reaja, Ba'al, 6ne Beera. Goŋ sǝr Asiria ma ɗii ne Tigilot-Palasar gbǝ Beera kal ne ko, ako ye dǝɓlii kǝsyil zahban Ruben.#2 ZaG 15:29

7Wee pah Beera ne za yaŋ ɓǝǝ tǝɗii ɓǝǝ mo ŋwǝǝ ɓo a naiko: Jiel, Zakarias, 8Bela we Azas, we Sema ma morsǝ̃ǝ Joel. Za morsǝ̃ǝ mai kaara Aroyer ne pǝ sǝr ah ma fahsǝŋ ŋhaa ge dai Nebo ne Ba'al-Meon. 9Lwaara cok pǝ sǝr Giliat pǝ'manne, nyiŋra sǝr ah ma ga nǝfah morcomzah'nan ka ga nǝfah kǝsyicok ŋhaa ge dai kah el Efrat gbǝm.

10Ne cok zah'nan goŋ Saul, ban Ruben ruura sal ne Hagarien, ikra ra pǝ wulli, nyiŋra sǝr ɓǝǝ ma nefah tǝkǝsǝŋ Giliat, kaara gŋ.

Morsǝ̃ǝ Gad

11Ban Gad kaara kah ban Ruben nǝfah kǝsǝŋ pǝ sǝr Basan, ŋhaa ge dai Salka nǝfah kǝmorcomzah'nanne. 12Joel ye dǝɓlii ɓǝǝra, Safam ye dǝɓ ma ne tǝɗii patǝ gwa ahe. So Jaanai ne Safat ara ye tǝŋ ban maki ah ra pǝ sǝr Basan. 13Wee pa ɓǝǝ manyeeki ah ra ne za yaŋ pa ɓǝǝ mai mo so tǝŋra ban camcam rǝŋ a naiko: Mikal, Mesulam, Seba, Jorai, Jakan, Zia, ne Eber. 14Ara ye morsǝ̃ǝ Abihail we Huri, morsǝ̃ǝ ɓǝǝ naiko: Abihail, Huri, Jaroa, Giliat, Mikel, Jesisai, Jado, Bus. 15Aki we Abdiel we Guni, ako ye dǝɓlii zahban maraiko. 16Kaara pǝ yaŋ maluu pǝ sǝr Basan ne Giliat, tǝkine pǝ cok pii fan ma Saron daŋ. 17Za mai daŋ tǝɗii ɓǝǝ ŋwǝǝ ɓo ne cok zah'nan Yutam goŋ sǝr Yuda, ne zah'nan Jeroboam goŋ Israel. 18Ban Ruben, Gad, ne za Manasse ma morcomzah'nanne, sooje ɓǝǝ mai mo tǝra ruu sal ɓo pǝsãh ne balle, kafahe, tǝkine 'nǝǝ saŋne, ara 44.760. 19Ge ruura sal ne Hagarien zahban mai mo kaara ɓo Jetur, Nafis, ne Nodaɓ. 20Ne cok ruu sal ah soɓra ɓǝ ɓǝǝ daŋ jol Masǝŋ, juura pel pǝǝ ko, so Masǝŋ laa juupel ɓǝǝra, nyi swah nyi ra kaara kacella tǝ Hagarien ne za ma ne ra daŋ. 21Nyiŋra njoŋnjoŋ za syiŋ ɓǝǝ 50.000, nyiŋra pǝsǝ̃ǝ 250.000, korro 2.000, gbahra dǝfuu 100.000, 22ikra za syiŋ ɓǝǝ pǝ wul pǝlli ta, mor sal ah a na 'yah Masǝŋ. So kalra ge kaa pǝ sǝr ah ŋhaa dai zah'nan mai mo ge gbahra ra kal ge sǝr Asiria ne ko.

Za Manasse ma morcomzah'nanne

23Za Manasse ma morcomzah'nan kaara pǝ sǝr Basan ŋhaa ge dai Ba'al-Hermon, Senir, ne waa Hermon. Za ɓǝǝ ɓoo ge pel pǝpãa pǝlli. 24Za mai ara ye mo zaluu pel za ɓǝǝ a naiko: Efer, Jesi, Eliel, Azriel, Jeremias, Hodavia, ne Jadiel. Ara ye za maswah ahe, so ra ye zaluu mai za mo tǝ ra ɓo kǝsyil zahzum ɓǝǝra.

Woora zahban ma fah morcomzah'nan kal ne ko

25Amma za joŋra faɓe' wo Masǝŋ pa ɓǝǝ lii ra, soɓra ko, so kal tǝ syeera mor masǝŋ za mai Masǝŋ mo nĩi ra pel ɓǝǝra. 26So Masǝŋ ur zahzyil Pul goŋ sǝr Asiria, mai moo ɗii ne Tigilot-Palasar ta, ka mo ɗaŋko sǝr ɓǝǝra. Woora ban Ruben, Gad, ne za Manasse ma morcomzah'nan kal ne ra ge Hala, Habor, Hara tǝkine kah el Gozan.#2 ZaG 15:19,29; 17:6

Currently Selected:

1 KEE ƁƏ 5: MUAR

Highlight

Copy