1 KEE ƁƏ 26

Za ma byakra yaŋ Masǝŋ

1Za marai rǝkra ra ka byak yaŋ Masǝŋ. Dǝɓ ma kǝsyil Korien ako ye Meselemia we Kore daga morsǝ̃ǝ Asaf, 2a ne wee rǝŋ: Zakarias, Jediel, Zebadia, Jatniel, 3Elam, Jokanan, ne Eljonai.

4So Obed-Edom, Masǝŋ ẽe ko nyi wee nyi nama: Semaja, Jezobat, Joak, Sakar, Netanel,#2 Sa 6:11; 1 KeeƁ 13:14 5Ammiel, Isakar, ne Pelletai.

6We Obed-Edom malii ma ɗii ne Semaja bem weere, wee ah ra pǝyǝk kǝsyil za ɓǝǝra, mor ara pǝswahe. 7Tǝɗii ɓǝǝ a naiko: Otni, Refael, Obed, Elzabad, Elihu, ne Semakia. (Za ma fahfal matǝ gwa za ma gak fan ye ra.)

8Za ma morsǝ̃ǝ Obed-Edom mai mo kiira ɓo nǝ pǝkoŋ joŋ yeɓ ah pãa ɓǝǝ jemma yea tǝtǝl gwa.

9Za ma morsǝ̃ǝ Meselemia mai mo kiira za ɓo, ara jemma tǝtǝl nama.

10Dǝɓ ma morsǝ̃ǝ Merari ako ye Hosa, a ne wee nai: Simri, (ako ye ka we malii ya, amma pam ɓaŋ kan dǝɓlii ne ko) 11Hilkiija, Tebalia, ne Zakarias. Za ma morsǝ̃ǝ Hosa ma byak yaŋ Masǝŋ pãa ɓǝǝ daŋ jemma tǝtǝl sai.

12Za ma byak yaŋ Masǝŋ kul ɓǝǝ woŋ ɓo camcam tǝgbana morsǝ̃ǝ za ɓǝǝra, a joŋra yeɓ ɓǝǝ yaŋ Masǝŋ tǝgbana Lewitien manyeeki ah moo joŋra ta. 13Za ma morsǝ̃ǝ tǝ camcam rai, zaluu tǝkine wee manyee daŋ, a inra cahcah tǝ ɓǝ zahfah mai mo tǝ ga byakra. 14Selemia nǝǝ zahfah ma morcomzah'nanne, wel ah Zakarias mai mo tǝ fahlii gbah jol za ɓo pǝlli, nǝǝ zahfah ma fahsǝŋ. 15Nǝǝra Obed-Edom ka mo byakko zahfah ma fah morkǝsǝŋ, nǝǝra wee ah ka mo byakra yaŋ rǝk fanne. 16Nǝǝra Suppim ne Hosa rǝk zahfah ma fah morcomlil nǝ zahfah ma ga Salleket mai mo tǝ fahlii ma yee ga sǝŋ. Woŋra cok com ma byak cok ah ɓo woŋ. Dǝɓ ki byakke, dǝɓ ki so gin ɓaŋ fahfal ahe. 17Nǝfah kǝmorcomzah'nanne, za ma byak cok gŋ yea, a joŋra yeɓ gŋ zah'nan daŋ, nǝfah kǝsǝŋ, ara gŋ nai, nǝfah morkǝsǝŋ laŋ ara gŋ nai ta, za ma byak yaŋ rǝk fan laŋ ara nai. Yaŋ rǝk fan a gwa, zah'nan daŋ za gwa byak maino, za gwa laŋ byak maino. 18Kah yaŋ mai mo vuu ɓo no, nǝfah kǝmorcomlil ah za ma byak cok tǝ fahlii gŋ nai, za ma byak yaŋ ah laŋ ara gwa. 19Za ma byak cok rai mo womra ra ɓo ne kul ɓǝǝ camcam daŋ ara ye morsǝ̃ǝ Kore ne Merari.

Yeɓ manyeeki ah ma joŋ yaŋ Masǝŋ

20Wee pa ɓǝǝ Lewitien manyeeki ah a byakra ma ɓǝǝ fan ma yaŋ Masǝŋ tǝkine yaŋ rǝk fan mai za mo nyira fan nyi Masǝŋ ɓe moo rǝkra gŋ. 21Kǝsyil wee Ladan, tǝgba faa: Gersonien mai ara ye mo morsẽe Ladan mai ako ye mo pa ɓǝǝ lii, dǝɓ ma pel ɓǝǝ ye Jehieli. 22Za gwa kǝsyil morsǝ̃ǝ maiko, Zetam ne naa pah ah Joel, a byakra fan ma yaŋ Masǝŋ tǝkine yaŋ rǝk fanne.

23So ma kǝsyil za ma morsǝ̃ǝ Amram ye Jitzar, Hebron, ne Uziel.

24Sebuel we Gersom we Mosus ye dǝɓlii za ma byak fan yaŋ Masǝŋ. 25Ma kǝsyil wee pah ah morsǝ̃ǝ Eliezar: Wel ah Rekabia, Jesaia, Yuram, Zikri, ne Selomit. 26Selomit ne zahzum ah ra, ara ye za ma byak fan mai daŋ goŋ David moo nyi nyi Masǝŋ, ne zaluu ma pel za ɓǝǝra, ne ma pel kul za mai mo wom ɓo ne morsǝ̃ǝ ɓǝǝ camcam, tǝkine zaluu sooje. 27A nǝǝra fan gin kǝsyil fan mai moo woora zah salle, a nyira mor ka joŋ yeɓ yaŋ Masǝŋ. 28Selomit ne zan ah ara yee byak fan mai daŋ moo nǝǝra mor joŋ yeɓ yaŋ Masǝŋ tǝkine fan nyi mai profeto Samuel, goŋ Saul, Abner we Ner, ne Joaɓ we Seruja moo nyira daŋ.

Yeɓ Lewitien manyeeki ahe

29Kǝsyil morsǝ̃ǝ Jitzar, rǝkra Kenania ne wee ah ka mo joŋra yeɓ ma lal ah kǝsyil za Israel, tǝgbana zaluu ma tǝsal ɓǝ tǝkine lakaali. 30Kǝsyil za ma morsǝ̃ǝ Hebron, Haskabia ne wee pah ah 1.700, ara daŋ za maswah ah ye ra, rǝkra ra ka mo yeara zaluu ma tǝsal ɓǝ ka mo ẽera ɓǝ yeɓ matǝ ɓǝ iŋni, tǝkine kal zana, kǝsyil za Israel ma kah el Yordan nǝfah kǝmorcomlilli. 31Jeria ye dǝɓlii ma pel za ma morsǝ̃ǝ Hebron. Ne syii jemma tǝtǝl nai ah David mo kaa goŋ ɓo, kyeɓra mor ɓǝ za ma morsǝ̃ǝ Hebron ne za ɓǝǝra, lwaara sooje maswah ah ra kǝsyil ɓǝǝra, kaara ɓo Jaizer pǝ sǝr Giliat. 32Goŋ David syen zaluu maswah 1.700 ma morsǝ̃ǝ Jeria, rǝk ra ka mo yeara zaluu ma tǝsal ɓǝ, ka mo ẽera ɓǝ yeɓ matǝ ɓǝ iŋni tǝkine kal zana, pǝ sǝr Ruben, Gad, ne Manasse ma morcomzah'nanne.

Currently Selected:

1 KEE ƁƏ 26: MUAR

Highlight

Copy