1 KEE ƁƏ 21

David kee pãa zana

(2 Sa 24:1-25)

1Satan 'yah ka gin ne ɓǝ gaɓ tǝ za Israel, so ur zahzyil David ka mo keeko pãa zana. 2David faa nyi Joaɓ ne zaluu sooje manyeeki ah ra: We ge pǝ sǝr Israel daŋ ka we kee zana. Ɗah pãa ɓǝǝ a ɗǝne? Me 'yah ka tanne. 3Amma Joaɓ zyii zah ah faa: Masǝŋ mo joŋ za Israel yea pǝpãa kal mai mo no zǝzǝ̃ǝ zahlǝŋ temere. Goŋe, zai daŋ za ɓo ye ra, mo 'yah joŋ fan mai nai mor fẽe ka kǝǝ za pãa daŋ joŋ faɓe' ne? 4Amma ne daŋ laŋ goŋ pee ne ɓǝ ah wo Joaɓ mbaŋ, Joaɓ so pǝ̃ǝ kal ge kyãh pǝ sǝr Israel ne lii ah daŋ, fahfal ah pii soo ge Jerusalem. 5Ge kee pãa za ma nen gak ruu sal kǝsyil za Israel nyi goŋ David, ara 1.100.000, ma kǝsyil za Yuda 470.000. 6Joaɓ zyii kee za ma zahban Lewi ne Benyaamin ya, mor ɓǝ mai goŋ mo tǝ joŋ ka ne ɓǝr ah ya.

7Masǝŋ laa pǝ'nyah ne ɓǝ fan mai David mo joŋ ɓo ya, so ŋgoŋ kiita tǝ za Israel tǝ ɓǝ ahe. 8So David faa nyi Masǝŋ: Me joŋ faɓe' malii ah ɓo ne joŋ ɓǝ maiko. Oseni Dǝɓlii, mo rwah faɓe' ɓe ge lalle, mor me joŋ tǝgwĩi ɓo no cam. 9Dǝɓlii so faa nyi Gad pa ẽe cok David: 10Mo ge faa nyi David sye, ame rǝk fan ɓo pel ah sai, ka mo nǝǝko gin gŋ vaŋno, me ga joŋ fan mai mo nǝǝko ɓo.

11Gad kal ge wo David, kee ɓǝ mai Dǝɓlii mo faa ɓo nyi ko, mor Dǝɓlii fii ko ɓo faa: 12Koŋ mo wǝ sǝr ɓo syii sai ne? Wala mo 'yah ɗuu gal pel za syiŋ ɓo fĩi sai ka tǝ foora mor ɓo ne? Koo mo 'yah syem maɓe' ah ye mo ge sǝr ɓo zah'nan sai Dǝɓlii mo pee angelos ik za Israel pǝ wul ne ne? Gad faa: Ɓǝ ah mo ɗǝne ɓe, ka mo faa nyi me, me ge kee ɓǝ ah nyi Dǝɓlii o. 13David zyii zah Gad faa: Ame dan ɓo pǝ cok magaɓ ahe, amma me 'yah dǝfuu mo ŋgoŋ kiita tǝ ɓe ya, Dǝɓlii ye mo ŋgoŋ kiita tǝ ɓe ne suu ahe, mor a kwan syakke.

14So Dǝɓlii pee syem maɓe' ge tǝ za Israel, ik za kǝsyil ɓǝǝ pǝ wul ujenere jemma rǝŋ. 15Masǝŋ pee angelos ka ɓeɓ yaŋ, amma so ẽe ɓǝ ah fer ɓǝ foo ah mo foo ɓo, faa nyi angelos ahe: Mo soɓ o, kii ɓe, ka angelos ah ge dai ɓo pǝ cok ɗuu sor Araona Jebusiyo.

16David kwo angelos uu ɓo kǝsyil coksǝŋ ne sǝrri, nǝǝ kafahe ɓo jolle, tǝ ga ɓeɓ yaŋ Jerusalem. So David ne zaluu Israel mai mo ɓaara mbǝro dahsuu ɓo daŋ leara ge sǝŋ, ɗǝmra zahpel ge tǝ sǝrri. 17David juupel faa: Masǝŋ, ame ye joŋ faɓe' ah ɓo, me ye faa mo keera zana, amma za syak joŋra ma ɓǝǝ fẽe ɓo ne? Dǝɓlii Masǝŋ ɓe, mo ŋgoŋ kiita tǝ ɓe ne za yaŋ ɓe, mo soɓ za ɓo ra.

18Pa pee ma coksǝŋ faa nyi Gad: Mo ge faa nyi David mo ge vuuko cok joŋ syiŋ wo Dǝɓlii pǝ cok ɗuu sor Araona. 19David laa ɓǝ faa Dǝɓlii, ur kal ge tǝgbana mai Gad mo kee ɓǝ ah nyi ko. 20Ka Araona ne wee ah mawǝǝ nai tǝ ɗuura sorre, ne cok mo kwora pa pee ma coksǝŋ, wee ah ɗuura kal ge mokra suu ɓǝǝra. 21Fahfal ah gwari sǝ ta, Araona kwo goŋ David tǝ gin wol ahe, zol gin pǝ cok ɗuu sor ge lee ge sǝŋ pel ah ɗǝŋ zahpel ge tǝ sǝrri. 22David faa nyi ko: Mo soɓ me lee cok ɗuu sor ɓo ka me vuu cok joŋ syiŋ wo Dǝɓlii gŋ, ka syem maɓe' nyẽe mo soɓ zana, me ga joŋ lee ah ne mo pǝsãhe.

23Araona zyii faa: Mo ɓaŋ o goŋe, ka mo joŋ fan mai zahzyil ɓo mo tǝ 'yah joŋ ah gŋ o. Dǝǝ ma joŋ syiŋ ah ra nyẽeno, kpuu ɗuu sor ah laŋ nyẽeno, mo joŋ zahwii ne ko. Sor ah laŋ a mor ka joŋ syiŋ ta, fan mai daŋ me nyi ɓo nyi mo tǝkolle. 24Amma goŋ zyii zah Araona faa: Ka nai ya, me ga lee jol ɓo lee, me ka ɓaŋ fan mai mo fan ɓo yo me lelee ya ka joŋ syiŋ wo Dǝɓlii ne ya. 25So David lee cok ɗuu sor ah jol Araona ne solai vãm kaŋnyeeri 600. 26Vuu cok joŋ syiŋ wo Dǝɓlii gŋ joŋ syiŋ suŋwii tǝkine syiŋ ma nyi jam gŋ. Juupelle. Dǝɓlii laa juupel ah pee wii gin coksǝŋ ge tǝ syiŋ ah pǝ cok joŋ syiŋrĩ. 27Dǝɓlii faa nyi pa pee ma coksǝŋ mo maako kafahe ah ge pẽere, so pa pee laa zah ahe.

28David kwo Dǝɓlii laa juupel 'min ɓe, so joŋ syiŋ wol ah tǝ cok joŋ syiŋ mai mo pǝ cok ɗuu sor Araona. 29Ne cok ah tal mbǝro mai mo nǝǝ ɓo mor Dǝɓlii, Mosus mo zyeɓ kǝsyicokki, tǝkine cok joŋ syiŋ mai moo joŋra syiŋ suŋwii gŋ daŋ, ka a pǝ cok ma tǝgee sǝŋ ah Gibeon. 30Amma David gak ka ga gŋ ŋhaa ka juupel wo Masǝŋ ya, mor a ɗuu gal kafahe pa pee ma coksǝŋ.

Currently Selected:

1 KEE ƁƏ 21: MUAR

Highlight

Copy