SAN JUAN 18

Mèn co' ñibe', no co' ndyoo ner, no co' ndyoo naa loo mèn nación Israel mxenxù' Jesús xal thìb pres.

(Mt. 26.47–56; Mr. 14.43–50; Lc. 22.47–53)

1Texal ngolo mdoodi's no Jesús Diox xud Jesús no ngurez Jesús Diox, ngro' no Jesús myen' xin' mté'th Jesús par ya no Jesús myen' tedib lad ro thìb ftee co' mbez mèn lèe Cedrón. Tya ngure thìb huert. No co'te' ngure huerta ngòo no Jesús myen' xin' mté'th Jesús huax vez. 2Nde nxon', no Jud co' mda'xù' Jesús loo mèn nanee lugara. Tac huax vez ndyee Jesús con myen' xin' mté'th Jesús par nqueltàa Jesús con myen' tya. 3Látha, mzin no Jud thìb partid solndad, no ndxep mèn co' nxo'f zin' zin' le'n templ co' mtel' jef che'n nguley' co' más ñibe' loo rye nguley', no mèn che'n xley' farise. Nde no Jud mèna. Nzo spad ya' mèna no nzo mached no cuchi ya' mèna. No nde no mèna lintern no ye'rbèel par mtenìi mèna ned nde mèna. 4Per com le' Jesús nonque' no naneeque' Jesús ryethe con' tyactìi Jesús, ¿lé'?, ngro' Jesús par ngua sál' Jesús mèna. Ndxab Jesús loo mèna:

―¿Chó nde cua'n gu', à'?

5Mcàb mèna loo Jesús. Ndxab mèna:

―Nu' nde cua'n mbi' co' lèe Jesús co' nac mèn yèez Nazaret.

Jesús mcàb. Ndxab Jesús loo mèna:

―Daa nac Jesús.

Làth mèna nde Jud co' ta'xù' Jesús loo mèna, ne.

6Texal ndxab Jesús loo mèna:

―Daa nac Jesús,

ale yub mèna ngulàateri' loo yòo par ned xís mèna. 7Ngoloa, mbere Jesús, mnibdi's Jesús loo mèna tedib vez:

―¿Chó nde cua'n gu', à'?

Mèna mcàb. Ndxab mèna loo Jesús:

―Nu' nde cua'n mbi' co' lèe Jesús co' nac mèn yèez Nazaret.

8Jesús mcàb loo mèna. Ndxab Jesús:

―Na guniile' loo gu'. Daa nac Jesús. Chele' gu' nde cua'n daa, bla' gu' bii myen' ndxè'.

9Tataa ngòca loo Jesús par ngòcque' no mdyaaque' no mdyubque' di's co' ndxab Jesús loo Diox xud Jesús co'se' ndxab Jesús:

―Myen' co' mcui U', co' ngòo loo cón chenen, yende cón ngòc loo myen'.

10Látha nzo Mon Pedr. Nde nxon', ngue spad cho Mon Pedr. Thidte ngua ya' Mon Pedr rlan' Mon Pedr. Mdob Mon Pedr spad le'n vayin. Mblàa Mon thìb ya' spad nza thìb moz co' nac ladlì che'n moz. Moza ngro' lèe Malc. Ngòc moza moz che'n jef che'n nguley' co' más mnibe' loo rye nguley' tiempa. 11Sya, ndxab Jesús loo Pedr:

―Pedr, blosua' spad le'n vayin. ¿Ché' ndxela'sl no ndlil cuent indxàalte tyactìi daa loo thìb preb co' mbli nee lezo' xuden Diox tyactìi daa, cà'? Yende xàa. Preb ndxè' gàcque' loon.

Jesús mdooxù' loo mbi' co' ngòc jef che'n nguley' co' más mnibe' loo rye nguley' tiempa.

(Mt. 26.57–58; Mr. 14.53–54; Lc. 22.54)

12Le' sya, rye mèn co' ngòc solndad, no xa' co' ngòc capitán, no mèn co' ngòc myen' nac zin' che'n mèn co' ñibe', no co' ndyoo ner, no co' ndyoo naa loo mèn nación Israel, rye mèna mxenxù' Jesús. Mdub dó' mèna ya' Jesús. Mbe' mèna Jesús xal thìb pres. 13Mbe' mèna Jesús nerleque' loo Anás tac Anás ngòc xudzap Caifás. Caifasa ngòc jef che'n nguley' co' más mnibe' loo rye nguley' lín'a. 14Leque Caifasa ngòc Caifás co' mde'th no co' ndxab loo mèn co' ñibe', no co' ndyoo ner, no co' ndyoo naa loo mèn nación Israel ndxàalque' gath thìb mbi' lugar de lyux rye mèn nación Israel.

Pedr mcà di's cón che'n Jesús loo mèn.

(Mt. 26.69–70; Mr. 14.66–68; Lc. 22.55–57)

15Per látha, mdoo nque Mon Pedr con tedib myen' co' ndxàc xtàa Mon Pedr co' nac leque xin' mté'th Jesús xís Jesús. Mbi' co' nac jef che'n nguley' co' más ñibe' loo rye nguley' mblibe' mbi' co' ndxàc xtàa Mon Pedr. Sya, mdoo nque leque thìb myen' co' ndxàc xtàa Mon Pedr xís Jesús axta loo lue' co'te' ngòc liz jef che'n nguley' co' más mnibe' loo rye nguley' lín'a. 16Le' Pedr na, mbyan' par ro ned ro puert. Cona mbli ngro' mbi' co' ngòc myen' xin' mté'th Jesús co' nac xtàa Pedr co' mblibe' jef che'n nguley'a par mdoodi's no mbi' mozgot co' ngue quenap puert par mblo mozgota Pedr par le'n loo lue' liz nguley'a. 17Sya, mnibdi's mozgota loo Pedr. Ndxab mozgota:

―¿Ché' inode lùu nac thìb myen' xin' mté'th mbi' ba', ne, cà'?

Pedr mcàb. Ndxab Pedr:

―Yende xàa. Inacte daa xin' mté'th mbi' ba'.

18Le'pe' yál'a anze'f ngòc nàl. Le' sya, ryete moz che'n nguley' no myen' co' nac myen' nac zin' co' nquenap templ, mtlo myen', mtol' myen' quìi. No mtoocua' myen' yaa loo quìi par ngure biiz myen' ro rdii. Nde nxon', note Pedr ngo làth myen' par mdoo biiz Pedr ro dii.

Anás noo noo ngue nibdi's loo Jesús cón che'n Jesús.

(Mt. 26.59–66; Mr. 14.55–64; Lc. 22.66–71)

19Látha, jef che'n nguley' co' más ñibe' loo rye nguley' mtlo mnibdi's loo Jesús chópe' myen' nac myen' xin' mté'th Jesús no cón nac co' ngue lu' Jesús loo mèn. 20Jesús mcàb loo mbi' co' nac jef che'n nguley'a. Ndxab Jesús:

―Na mdoodizque' loo mèn loo xnaa. No mblu'quen cón chenen loo mèn le'n sinagog no le'n templ co'te' nqueltàa ryete mèn co' nac mèn nación Israel. Cona, ngue niin lool: Yende cón tarte toodizen xexte loo mèn. 21¿Chonon ngue ñibdi'sl loon, à'? Bnibdi's loo mèn co' mbìnle' di's co' mdoodizlen. Mèna ta' cuent cón chenen lool xal nac di's co' mdoodizlen loo mèn.

22Co'se' ngolo tataa ndxab Jesús di'sa, thìb mbi' co' ngòc myen' nac zin' co' nquenap templ co' ngo tya, thidte ngua mbi' mdi's mbi' rloo Jesús. No ndxab mbi' loo Jesús:

―¿Ché' tatua' mod ncàbl loo jefpe' che'n rye nguley', cà'?

23Jesús mcàb loo mbi'. Ndxab Jesús:

―Chele' daa mdoodiz chol di's ye'rsin', gunee ñeene' xá mod nac di'sa. Per chele' daa mdoodiz di's co' nac di's ndac, ¿chonon mdi'sl rloon, sya?

24Ngoloa, mtel' Anás Jesús natedó' ya' Jesús loo tedib mbi' co' lèe Caifás co' ngòc jef che'n nguley' co' más ñibe' loo rye nguley' lín'a.

Pedr mbere mcà di's cón che'n Jesús loo mèn tedib vez.

(Mt. 26.71–75; Mr. 14.69–72; Lc. 22.58–62)

25Látha, Pedr ndoo biizque' ro rdii làth mèna. Sya, ndxab mèna loo Pedr:

―¿Ché' inode lùu nac thìb myen' xin' mté'th mbi' ba', cà'?

Sya, mcà di's Pedr. Ndxab Pedr:

―Inacte daa xin' mté'th mbi' ba', cara.

26Sya, ndxab thìb mbi' co' ngòc moz jef che'n nguley' co' más ñibe' loo rye nguley' no co' ndxàcguè' mèn guliz mbi' co' mcho' Pedr nzaa loo Pedr:

―Ale mbezl: Inacte daa xin' mté'th mbi' ba'. ¿Ché' ndlil cuent ne'ngnèeden lùu con mbi' ba' le'n huert, ne, cà'?

27Mbere Pedr, mcà di's Pedr Jesús tedib vez. Leque hora, chàa, ngrozèe nguiidtee. Mblé' nguiidtee yál'.

Jesús mdooxù' loo thìb mbi' co' ngro' lèe Pilat.

(Mt. 27.1–2, 11–14; Mr. 15.1–5; Lc. 23.1–5)

28Sya, xtil'leque' mblo' mèna Jesús liz Caifás. Mbe' mèna Jesús loo Pilat co'te' nac palas che'n Pilat. Mèn co' mbe' Jesús loo Pilat ngòc mèn co' ñibe', no co' ndyoo ner, no co' ndyoo naa loo mèn nación Israel. Mèna ne'ngòode le'n palas che'n Pilat par ne'gàc zabte mèna loo costumbr co' ndxàp mèna cón che'n xley' mèna. Tac chele' mèn gàc mèn zab loo por thìb con' co' iñaade, le' sya, cona'te li ne'yòode mèna loo mes par hua mèna co' nac yalhua che'n lni pasc. 29Sya, ngro' Pilat par fuer. Ngua toodi's no Pilat mèna. Ndxab Pilat:

―¿Cón ndli nqueyèe gu' mbi' ndxè' loon, à'?

30Mcàb mèna loo Pilat. Ndxab mèna:

―Chele' mbi' ba' ne'ngàcte thìb mbi' ye'rsin', ne'ngui'th node nu' mbi' lool.

31Sya, ndxab Pilat loo mèna:

―Be' gu' mbi'. No ftub rez gu' cón che'n mbi' xal ñibe' ley gu' loo gu' par li gu' con' con mbi'.

Per mèn co' ñibe', no co' ndyoo ner, no co' ndyoo naa loo mèn nación Israel mcàb loo Pilat. Ndxab mèna:

―Per nu' co' nac mèn nación Israel, ley co' ngue no nu' inda'de lugar loo nu' par guth nu' nec thìb mèn.

32Tataa mod ngòca par mdyaaque' no ngòcque' no mdyubque' di's co' gunii Jesús cón che'n xá mod gath Jesús. 33Le' sya, mbere Pilat, ngòo Pilat le'n palas tedib vez. Ngurez Pilat Jesús. No mnibdi's Pilat loo Jesús. Ndxab Pilat:

―¿Ché', lìcque', lùu nac rey che'n mèn nación Israel, cà'?

34Jesús mcàb loo Pilat. Ndxab Jesús:

―¿Ché' ngue ñibdi'sl cón chenen ante por iñeedel cón chenen o ché' alithe ngue ñibdi'sl cón chenen tac mda'le' tedib mèn cuent cón chenen lool, cà'?

35Pilat mcàb loo Jesús. Ndxab Pilat:

―¿A poc ñeel no daa nac mèn nación Israel, cà'? Yende xàa. Mèn co' nac mèn nación lùu no mèn co' nac jef che'n nguley' co' más ñibe' loo rye nguley' che'n nación lùu nac mèn co' nde no lùu loon trè'. ¿Cóxe' ngue tee lil, à'?

36Jesús mcàb. Ndxab Jesús loo Pilat:

―Co'te' nac nacionpe' daa no co'te' ñibe'en inacte loo izlyo' ndxè', ey. Chele' co'te' ñibe'en ngàc che'n izlyo' ndxè', le' sya, mèn co' mque tee no daa ne'ngla'de par nden mèn nación Israel daa. Per izlyo' ndxè' inacte co'te' ñibe'en nalle'. Por cona, ngue li mèn con' ndlya's mèn con daa.

37Sya, ndxab Pilat loo Jesús:

―¿Lìcque' nacl rey, sya, cà'?

Mcàb Jesús. Ndxab Jesús loo Pilat:

―Aa. Lìcque' nac daa rey, pues, xalque' ngolo guneela ba'. Daa ngóol loo izlyo' ndxè' no mbalen loo izlyo' ndxè' par mdan cuent no mdoodizen cón chenen co' nac lìcpe'. Ryete mèn co' ndub nza no co' ndyubdi's loo cón chenen co' nac lìcpe', mèna ndxòn no nque' nza mèna di's co' ndyoodizen.

38Pilat ndxab loo Jesús:

―¿Cón nac co' mbezl nac lìcpe', à'?

Trè' ndlu' le' mèn ngolole' mdub rez cón che'n Jesús par guth mèn Jesús.

(Mt. 27.15–31; Mr. 15.6–20; Lc. 23.13–25)

Ngolo mnibdi's Pilat di'sa loo Jesús, ngro' Pilat par fuer par mdoodi's no Pilat mèn co' ñibe', no co' ndyoo ner, no co' ndyoo naa loo mèn nación Israel tedib vez. Ndxab Pilat loo mèna:

―Yende chó xquin mbi' no xtol mbi' ndryo xo'f loon, cara. 39¿Xá nee gu'? Gu' ngue no costumbr le' daa ngo' thìb mbi' co' ngue lezi'f loo gu' co'se' ndli gu' lni pasc. ¿Ché' ndlya's gu' la'en bii mbi' co' mbez men nac rey che'n mèn nación Israel loo gu' o ché' ne'la'den bii mbi' loo gu'?

40Sya, ryete mèna cabii mcàb tedib vez. Ndxab mèna:

―Ne'telá'de U' mbi' ba'. Más huen blo' U' Barabás lezi'f loo nu'.

Per mbi' co' lèe Barabás ngòc thìb huan' tiempa.

Currently Selected:

SAN JUAN 18: zam

Highlight

Copy