Mako 6

Jesu unolambiwa nge be Nazareta

(Matewu 13:53-58; Luke 4:16-30)

1Jesu kamilika ipapo kayenda ku shango ya kanyi kwabo, ngono badiyiwa babe bakayenda naye. 2Kukati nge nsi we Sabata, katangisa kudiya mu Ng'umba ye Ntembezelo, ngono banjinji bakanhwa bakakaabala. Bakabhuzwana beti, “Iwoyu nlume wakawana poni kose ikoku? Butjenjedu gupi igogu gwaakapiwa? Unoshinga mishingo inolakidza simba. 3Apa ate iye mbezhi iwoyu kene, mwana wa Mariya kakale ali nkulu wa Jakubo na Josefa na Judasi na Simoni? Apa hazwadzi dzidze ate dzili muno naswi kene?” Bakan'gwadzilamoyo.

4 # Johani 4:44 Jesu kati ku bali, “Nlebesambeli aatoshaya tjilumbi ha kusi mu shango ya kanyi kwabo koga ne pakati kwe makamu awe ne be nsha wa kanyi kwabo.”

5Aazotubula kushinga mishingo inolakidza simba ipapo, kuzhe kwe kubiga maboko awe pezhugwi kwe bathu banogwala bashomanana, ebapodza. 6Ngono wakakaabadziwa nge kusheta kugalamoyo kwabo.

Jesu unotuma badiyiwa bali gumi lina babili

(Matewu 10:5-15; Luke 9:1-6)

Ipapo Jesu kayenda mu mizi ediya. 7Wakadanila kunli bali gumi lina babili, kabatuma bubili nge bubili, ngono kabapa simba pezhugwi kwe meya mibi. 8Kabalaya eti, “Musitongo senga tjimwe mu gwendo gwenyu, kuzhe kwe ludozo. Musitole tjiwunga kene gobhodo kene mari mu mwandabula wenyu. 9Muambale khwebana koga, muyende ne tjiambalo tjamakaambala koga. 10Ha muswika mu nzi mugale ipapo, kudzina mubhuda mu magalo iyawo. 11#Mishingo 13:51#Luke 10:4-11Magalo asingamuamutjile, belamba kumuhwa, muti mubhudapo, mushashamule hwuluba mu makumbo enyu, kube tjilakidzo mu bali kuti nlandu nge wabo.”

12Bakabhuda bakanosumikila kuti bathu bashanduke. 13#Jakubo 5:14Bakadusa meya mibi minjinji, ngono bakazhodza bagwele banjinji mafuta bakabapodza.

Lufu gwa Johani we N'dubiki

(Matewu 14:1-12; Luke 9:7-9)

14 # Matewu 16:14; Mako 8:28; Luke 9:19 Mambo Herode kahwa ngekwa ikoku, ngobe zina la Jesu lakabe lalumba. Bamwe bakabe beti, “Johani we N'dubiki wakamusiwa mu bafi, ndizo masimba iyawa eshinga munli.”

15Bamwe bakati, “Ndi Elija.” Koga bamwe bakati, “Nlebesambeli unonga balebesambeli ba ntolo.”

16Koga Herode wakati ehwa ikoku kati, “Johani iye wandakathubula nsholo wakamusiwa mu bafi!” 17#Luke 3:19, 20Herode nge kukwe wakabe alaula kuti Johani abhakhwe, ngono kati asungwe, alongwe mu ng'umba ye busungwa. Wakathama ikoku ngekwa Herodiyasi, nkadzi wa Filipo nnung'una uwe, waakabe atjilobola. 18Johani wakabe ati kuna Herode, “Ate kuli mu nlayo kuti ulobole nkadzi we nnung'una uwo.”

19Ndiko Herodiyasi kabhata Johani nge moyo, kayemula kumbulaya. Koga aazotubula kumbulaya. 20Herode wakabe etja Johani, eziba ali nthu wakalulwama, kakale wakayengemala, ndizo kantjengeta. Herode wakabe eti ehwa matama a Johani kashangana nsholo, koga eda kunhwilila.

21Gwe bupelo nkoba ukazhuka. Herode wakati mu zhuba le kuzwikumbuludza mazwago awe kathamila hadzasha dzidze ne balauli be babhayani ne batungamili be Galili nzano we zojiwa. 22Nkololokadzi wa Herodiyasi kangina kazana, kashathisa Herode ne bezi baanoja nabo. Mambo kati ku mwanadi iwoyo, “Undikumbile tjimwe ne tjimwe tjaunoda, ngono ndowokupa itjo.” 23Kabuya katuna kati, “Tjimwe ne tjimwe tjaunokumbila ndowokupa itjo kene kuli gwamu le shango yangu.”

24Nkololokadzi kabhudila kuzhe kanobhuzwa mmeyabe kati, “Apa ndi kumbileni kene mme?” Herodiyasi kan'dabila kati, “Kumbila nsholo wa Johani we N'dubiki.”

25Tjinyolotjo nkololokadzi kayenda kuna mambo elibilidza kakumbila eti, “Ndokumbila nsholo wa Johani we N'dubiki uli mu ndilo.”

26Ngono mambo kapuna moyo kwazokwazo, koga nge kutuna kukwe nenge bezi baakabe eja nabo, aazoda kuti unganlambila. 27Ipapo katuma mmwe we babhayani banolinda, enlaya kuti azhise nsholo wa Johani. Iwoyo nlume kayenda, kanothubula nsholo wa Johani mu ng'umba ye busungwa, 28ngono kauzhisa uli mu ndilo, kaupa mwanadi iwoyo, mwanadi kaupa mmeyabe. 29Badiyiwa ba Johani bakati behwa ikoku, bakazha bakatola itumbu tjitje, bakanotjibiganya.

Jesu unopa zojiwa bathu bali zwiwulu zwishanu (5 000)

(Matewu 14:13-21; Luke 9:10-17; Johani 6:1-14)

30Batumwa bakabgwilila kuna Jesu bakambikila kose kwabakathama ne tjabakadiya. 31Bathu banjinji bakabe bezha, bamwe beyenda, ndizo bakasheta tjibaka tjekuti baje. Kabe edwa badiyiwa babe eti, “Izhani tiyende pakanyalala, munonyaluluka kushomanana.” 32Ndizo bakayenda bali boga nge n'goro pathu pakanyalala.

33Koga banji bakababona bemilika bakabaziba, ndizo bakalabuka kudwa mu mizi yose bakanobatangila. 34#Mbalo 27:17; 1 Bomambo 22:17; 2 Zwiyitikalo 18:16; Ezekiele 34:5; Matewu 9:36Jesu wakati edeluka mu n'goro ebona mbunga nkulu we bathu, kabahwila ngoni ngobe bakabe benga pkhwizi dzisina nlisi. Ndizo wakatangisa ku badiya zwithu zwinjinji. 35Kwakati zhuba lomila, badiyiwa babe bakazha kunli bakati, “Pano timu shango koga ne zhuba lashwa. 36Paladzani bathu, bayende ku mizi ipejo banozwitengela tjabangaja.”

37Kadabila eti, “Mubape tjinojiwa imwi.”

Bakati kunli, “Oku kungatola mari e siliva ali mazana mabili (200)! Apa tishingise mari mangapo mu tjiwunga tibape baje kene?”

38Kabhuzwa kati, “Muna zwiwunga zwingana? Kasholeni.”

Bakati bashola bakashandula beti, “Tina zwiwunga zwishanu ne hwobe mbili.”

39Jesu kagadza bathu pasi nge mibungana mu bushwa butshwa. 40Ndizo bakagala pasi nge mibungana ye bathu bali zana (100) ne bali makumi mashanu (50). 41Wakatola zwiwunga zwishanu ne hwobe mbili, kalinga kudzimu kaboka, ngono kapemula zwiwunga. Kudwapo kazwipa badiyiwa babe kuti bazwipe bathu, kabe ebakobanya hwobe mbili bose. 42Bose bakaja, ngono bakaguta. 43Badiyiwa bakanunga mamburumburu e tjiwunga ne hwobe bakazhadza seme dzili gumi lina mbili. 44Balume bakaja zwiwunga izwezo bakabe bali zwiwulu zwishanu (5 000).

Jesu unoyenda nge makumbo pezhugwi kwe vula

(Matewu 14:22-33; Johani 6:15-21)

45Kudwa ipapo Jesu kadwa badiyiwa babe kati bangine mu n'goro bayende ku Bhetisaida, iye atjasala epaladza bathu. 46Kati edwa pabali kanotatha dombo kunotembezela. 47Kwakati kube madekwana, n'goro ukabe uli pakati kwe gungwa, iye ali ega mu shango. 48Kabona badiyiwa babe begwisana ne migoti inoyendisa n'goro, ngobe phepo yakabe yakalingisana nabo. Kukati mazhokuyedza kayenda ku bali enangayila pezhugwi kwe vula. Ngono kayedza se unobapinda. 49Bakati bembona eyenda nge makumbo pezhugwi kwe vula bakakumbula kuti ipuku, ndizo bakamimila, 50ngobe bakambona bose, ngono bakapalukamoyo.

Tjinyolotjo kalebeleka nabo kati, “Simisani mimoyo! Ndimi, musitje.” 51Ipapo katatha n'goro nabo ngono dutu likama. Bakakaabala kwazo, 52nge kuti bakabe basahwisisa ngekwe zwiwunga. Mimoyo yabo yakabe yakakukutala.

Jesu unopodza bagwele mu nzi we Genezareta

(Matewu 14:34-36)

53Bakati batjulukila seli, bakaswika mu ntuthu we Genezareta, ngono bakayisa n'goro wabo ku phili. 54Bakati bebhuda mu n'goro, bathu bakaziba Jesu. 55Bakalabuka ntuthu wose, bakasenga bagwele mitengate bebayisa kumwe ne kumwe kwabanohwa kuyi uyako. 56Kumwe ne kumwe kwaakabe eyenda mu mizana ne mu mizi mikulu, kene mu shango bakabe bebiga bagwele mu matengeselo, benkumbila kuti abadumilile kubhata nenguba guli lupeto gwe tjiambalo tjitje, ngono bose bakagubhata bakapola.

Currently Selected:

Mako 6: KBTP

Highlight

Copy