Mako 1

Kusumikila kwa Johani we N'dubiki

(Matewu 3:1-12; Luke 3:1-18; Johani 1:19-28)

1Oku ndiko kutangisa kwe ndebo mbuya ya Jesu Kirisiti Nkololo we Ndzimu, 2#Malaki 3:1sekwa kwakakwagwa ndi Isaya nlebesambeli mu lukwalo gugwe eti,

“Ndotuma ntumwa wangu mbeli kuko,

iye unowolulwamisa zila iyo.”

3 # Isaya 40:3 “Hwi le unodanilila mu tjilambanyika eti,

‘Lulwamisani zila ya She,

tambunudzani zijana dzidze.’ ”

4Johani we N'dubiki kaswika mu tjilambanyika, esumikila kuti bathu bashandukile matjinyo abo badubikwe ili tjilakidzo tje kuti bazwiibhatigwa matjinyo abo. 5Shango yose ye Judiya ne bathu bose be Jerusalema bakabhuda bakayenda kunli. Bakazwileba matjinyo abo, ngono kabadubika mu gwizi gwe Jorodani.

6 # 2 Bomambo 1:8 Johani wakabe eambala zwiambalo zwakathamiwa nge bukuse gwe kamela, ne mwandabula we ganda mu thunji dzidze. Wakabe eja phashu ne butji gwe nyutji. 7Kasumikila eti, “Shule kwangu kowozha una masimba kundipinda, iye wandisakalizana kukotama ndisunungula mitjili ye khwebana dzidze. 8Ndomudubika nge vula, koga iye unowomudubika nge Meya yakayengemala.”

Kudubikiwa ne kulikiwa kwa Jesu

(Matewu 3:13—4:11; Luke 3:21-22; 4:1-13)

9Mu mazhuba iyawo Jesu kazha edwa ku nzi we Nazareta mu ntuthu we Galili, ngono kadubikiwa ndi Johani mu gwizi gwe Jorodani. 10Kwakati Jesu ebhuda mu vula, kabona kudzimu kuzhuka, ngono Meya yakayengemala ikadelukila munli se njiba. 11#Kutangisa 22:2; Njimbo 2:7; Isaya 42:1; Matewu 3:17; 12:18; Mako 9:7; Luke 3:22Hwi likadwa kudzimu liti, “Iwe u Nkololo wangu, iye wandinoda, unondishathisa kwazo.”

12Tjinyolotjo Meya ikantakulila ku tjilambanyika. 13Wakabe mu tjilambanyika mazhuba ali makumi manna, elikiwa ndi Satani. Wakabe ana phuka dze shango, ngono batumwa be kudzimu bakambhatsha.

Jesu edana babhati be hwobe bali banna

(Matewu 4:12-22; Luke 4:14-15; 5:1-11)

14Kukati Johani alongwa mu ng'umba ye busungwa, Jesu kazha mu Galili esumikila ndebo mbuya ye Ndzimu. 15#Matewu 3:2Wakabe eti, “Tjibaka tjazha. Bushe gwe Ndzimu#1:15 Bushe gwe Ndzimu: Akutodwiwa pamwe pathu kene gumwe lubaka. Kodwiwa pamwe ne pamwe mu lubaka gumwe ne gumwe panobusa Ndzimu ubusa ndi Kirisiti. gwasedzela. Shandukilani matjinyo enyu, mugalemoyo mu ndebo mbuya.”

16Jesu wakati eyenda ali mu hwunde ye gungwa gwe Galili, kabona Simoni ne nnung'una uwe Enduru, beposela gwanga mu gungwa, ngobe bakabe bali babhati be hwobe. 17Jesu kati ku bali, “Izhani munditobele, ndowomuthama babhati be bathu.” 18Tjinyolotjo bakasiya njanga dzabo, bakantobela.

19Wakati ayenda thambgwana kabona Jakubo nkololo wa Zebhedi na Johani nnung'una uwe, bali mu n'goro belulwamisa njanga dzabo. 20Tjinyolotjo kabadana, ndizo bakantobela besiya tate babo Zebhedi mu n'goro bana bashingi.

Nlume una meya mbi

(Luke 4:31-37)

21Bakayenda ku nzi we Kapenaume, ngono kukati nge nsi we Sabata, Jesu kangina mu ng'umba ye Bajuta ye mitembezelo katangisa kudiya. 22#Matewu 7:28, 29Bathu bakatjenamila kudiya kukwe, ngobe wakabe ediya se nthu una ndaulo, asingange badiyi be nlayo.

23Imomo mu ng'umba yabo ye mitembezelo kwakabe kuna nlume wakabe ana meya mbi, 24ngono kamilidza hwi kalebeleka eti, “Unoshakani mutili iwe Jesu we Nazareta? Wazha kuwotilobesa kene? Ndoziba kuti uani, u N'yengemali we Ndzimu!”

25Koga Jesu kantjemela kati, “Nyalala ubhude munli!”

26Meya mbi ukazunguza nlume ihwoyo kwazo, ukabhuda munli utjema. 27Bathu bose bakatjenama kwazo, bakabhuzwana bakati, “Ikoku kunoshingikala ini kene? Hwudiya kutshwa! Unotjemela na iyo meya mibi dumbu nge ndaulo, ngono inonhwa.”

28Tjinyolotjo tjilumbi tjitje tjikaandama mu ntuthu wose we Galili.

Jesu unopodza bathu banjinji

(Matewu 8:14-17; Luke 4:38-41)

29Kati ebhuda mu ng'umba ye mitembezelo bakayenda tjinyolotjo ku nzi wa Simoni na Enduru, bana Jakubo na Johani. 30Mmezwale ba Simoni bakabe bali lele bana luzhazhamo, ndizo bakabudza Jesu nge kwabo. 31Kayenda ku bali kababhata nge luboko kabaazha kumilika, ngono luzhazhamo gukabhuda mu bali ndizo bakatangisa kupa bezi zojiwa.

32Madekwana iyawo, zhuba langina bathu bakazhisa bagwele bose ne bathu bana meya mibi kuna Jesu. 33Nzi wose ukakubungana pa nkoba we ng'umba. 34Ngono Jesu kapodza banjinji bakabe bana magwele akasiyana. Kakale kadusa meya mibi minjinji, koga asingaidumile kuti ilebeleke ngobe yakabe inziba.

Jesu ediya mu Galili

(Luke 4:42-44)

35Kukati kutji likundawudze, Jesu kamuka, kabhuda mu ng'umba kayenda ku shango kwaakaswika katembezela. 36Simoni ne baakabe anabo bakanlonda, 37bakati ben'wana bakan'dwa bakati, “Mmwe ne mmwe unomushaka.”

38Koga Jesu kati ku bali, “Ngatiyendeni ku mizi ipejo, kuti ndizo ndinosumikila ikokobo, ngoti nditjo tjandakazhila.”

39 # Matewu 4:23; 9:35 Kayenda mu Galili yose esumikila mu ng'umba dzabo dze mitembezelo, kakale edusa meya mibi mu bathu.

Jesu unopodza mmwe nlume

(Matewu 8:1-4; Luke 5:12-16)

40Nlume wakabe egwala mapele kazha kunli, kankumbila akathigama eti, “Ha muda, mungandipodza.”

41Jesu kanhwila ngoni, katambunudza luboko gugwe, ngono kambhata kati kunli, “Ndoda kuti upole; pola.” 42Tjinyolotjo mapele kapola, kasala ali mbuyanana. 43Jesu kanlaya akasimisa ngono kandwa kati ayende, 44#Zwipo 14:1-32eti, “Kushaye wawabudza ikoku, koga uyende unozwilakidza ku mpirisiti, uduse tjibhayilo tje kupodziwa kuko sekwakaleba Mushe, kuti tjibe tjilakidzilo mu bathu.”

45Koga kabhuda, ngono katangisa kuleba akashaladuka eandamisa tjanshingikalila. Ikoku kukatjikonedza Jesu kungina mu nzi akasununguka, kagala mu shango, ngono bathu bakazha kunli bedwa mu magalo mamwe ne mamwe akasiyana.

Currently Selected:

Mako 1: KBTP

Highlight

Copy