Luke 18
18
Tembezelani musinganyalemoyo
1Kudwa ipapo Jesu kabudza badiyiwa babe tjifaniso, kubalakidza kuti bakafanila bagale betembezela basinganyalemoyo. 2Kati, “Mu mmwe nzi kwakabe kuna nsumikilisi wakabe asingatje Ndzimu, kakale asina hanya ne nthu. 3Ngono mu nzi iwoyo, kukabe kuna tjilikadzi yakabe igala izha kunli i kumbila, iti, ‘Hwililani tjililo tjangu, mundigwile mu tjita tjangu.’ 4Ngono kalamba kwe tjibakana. Koga shule kazwidwa kati, ‘Nenguba ndisingatje Ndzimu, kakale ndisina hanya ne nthu, 5koga se tjilikadzi iyeyi igala izha enditshonyonga, ndoyigwila mu tjita tjayo!’ ”
6Ngono She kati, “Hwililani tjinolebgwa nge nsumikilisi usakalulwama. 7Ngono apa Ndzimu autowogwila bashalugwa bawo banolilila kuuli siku ne sikati kene? Apa ungabanonokela kene? 8Ndomubudza nditi, unowobagwila nge kulibilidza. Koga apa Nkololo we nthu ezha, unowowana kugalamoyo kuliyapo mu shango kene?”
Tjifaniso tje Nfarasi ne nkhethisi
9Ku bamwe bakabe begalabgwe kuti ibo balulwami, ngono belingila bamwe pasi, Jesu wakaleba tjifaniso etji, 10“Balume babili bakatathila ku Ng'umba ye Ndzimu kunotembezela, mmwe wabo ali Nfarasi, mmwe ali nkhethisi.
11“Nfarasi kamilika, kazwitembezelela eti, ‘Ndzimu, ndomubokela kuti anditonga bamwe bathu, batoleli ne babi ne phombgwe kene sa iwoyu nkhethisi. 12Ndozwinyima zojiwa kabili nge tshipi, apa tjebugumi muna zose zwandinowana.’
13“Nkhethisi kama thambgwana, kasitongo linga na iko pezhugwi, koga kazwibona nladu kati, ‘Ndzimu, mundihwile ngoni imi ntjinyi.’ 14#Matewu 23:12; Luke 14:11Ndomubudza kuti iwoyu nlume we nkhethisi wakayenda ku nzi uwe alulwamisiwa nge Ndzimu, isi Nfarasi; ngobe, iye unozwikudza unowoyisiwa pasi, na iye unozwiyisa pasi unowokudziwa.”
Jesu unokombolela bana batukununu
(Matewu 19:13-15; Mako 10:13-16)
15Bakabe bezhisa bo bana batukununu kuna Jesu, kuti ababige maboko. Badiyiwa bakati bebona ikoku bakabatjemela. 16Koga Jesu kabadanila kunli kati, “Letjani bana bazhe kundili, musibadzibile, ngobe bushe gwe Ndzimu nge gwe bakajali. 17Ndolebesa ndoti kumuli, iye usingaamutjile bushe gwe Ndzimu se mwana, aatowongina muguli.”
Bumbatsha gwe fumwa
(Matewu 19:16-30; Mako 10:17-31)
18Mmwe nkulu kambhuzwa kati, “N'diyi wakalulwama, ndingashingani kuti ndiwane butjilo gusingapele?”
19Jesu kadabila kati, “Ini undidana wakalulwama? Akuna wakalulwama kuzhe kwe Ndzimu woga. 20#Kufuluka 20:14; Matama 5:18; Kufuluka 20:13; Matama 5:17; Kufuluka 20:15; Matama 5:19; Kufuluka 20:16; Matama 5:20; Kufuluka 20:12; Matama 5:16Unoziba milayo inoti, ‘Usithame bupombgwe, usibulaye, usikwibe, usipe butendeki gwe manyepkhwa, kudza tate babo na mmeyabo.’ ”
21Kati, “Kose ikoku ndakakulondolodza kudwila mu butjetjana gwangu.”
22Kukati Jesu ehwa ikoku kati kunli, “Utjasheta tjithu tjing'ompela. Tengesa kose kwaunako ukobele bashayi, ndizo unowobe ne fumwa kudzimu. Shule kwa ipapo uzhe unditobele.” 23Kati ehwa ikoku kangina buyendasi, ngobe wakabe akafuma kwazo.
24Jesu kanlinga ngono kati, “Kwakasima seni, kuti bana fumwa bangine mu bushe gwe Ndzimu! 25Kulelu kuti kamela ingine nge buli le lunji, pakuti nfumi angine mu bushe gwe Ndzimu.”
26Ibabo bakahwa ikoku, bakabhuzwa beti, “Ndiani ngono ungatjidziwa?”
27Jesu kadabila eti, “Tjisingatubuke mu bathu tjotubuka mu Ndzimu.”
28Pita kati kunli, “Bonani, takasiya mizi yedu kumutobela.”
29Jesu kati ku bali, “Ndolebesa nditi, akuna iye wakasiya nzi uwe, kene nkadzi uwe kene bana ba tate babe, kene bazwadzi babe, kene bana babe ngekwe bushe gwe Ndzimu, 30usingawoamutjila kunjinji kupinda zwaakasiya, mu tjibaka tjino ne butjilo gusingapele mu misi inozha.”
Jesu eleba gwe butatu ngekwe lufu gugwe
(Matewu 20:17-19; Mako 10:32-34)
31Jesu katolela ntome bali gumi lina babili kabadwa kati, “Bonani, totathila ku Jerusalema, kunowoti matama wose akalebgwa nge balebesambeli ngekwe Nkololo we Nthu, akashingikala. 32Unolongwa mu maboko abe Zwitjaba. Banowon'dadila, bakantuka, bakanthwila mate, 33bakanloba, ngono bakambulaya. Mu zhuba le butatu unowomuka kakale.”
34Badiyiwa bakasihwisise ikoku kose. Tjeneso yako yakabe yakasumbikika ku bali, ndizo bakasizibe tjaakabe eleba nge kwatjo.
Jesu unopodza nkumbili we bhofu
(Matewu 20:29-34; Mako 10:46-52)
35Kukati Jesu apejo ne Jerikho, nlume we bhofu kabe ali gele pa hwunde ye zila e kumbila. 36Kati ehwa mbunga we bathu upinda, kabhuzwa kuti koshingikalani.
37Bakambudza kuti, “Jesu we Nazareta unopinda.”
38Kamimila kati, “Jesu, Nkololo wa Dafite, mundihwile ngoni!”
39Ibabo bakabe bali mbeli bakantjemela bakati anyalale, koga kamimila kwazo eti, “Nkololo wa Dafite, mundihwile ngoni!”
40Jesu kama, kati nlume iwoyo azhisiwe kunli. Kati abe pejo, Jesu kambhuzwa kati, 41“Unoshaka kuti ndikuyitileni kene?”
Kadabila eti, “She, ndoshaka kuti ndipofunuke.”
42Jesu kati kunli, “Pofunuka! Kugalamoyo kuko kwakupodza.”
43Tjinyolotjo kapofunuka, ngono katobela Jesu ekudza Ndzimu. Kukati bathu bose bebona ikoku, na ibobo bakakudza Ndzimu.
Currently Selected:
Luke 18: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
