Johani 18
18
Kusungwa kwa Jesu
(Matewu 26:47-56; Mako 14:43-50; Luke 22:47-53)
1Jesu kati apedza tembezela, kayenda ne badiyiwa babe kanotjuluka nkuku we Kidironi. Kwakabe kuna nnda seli kwawo, Jesu ne badiyiwa babe bakangina mu nnda iwoyu. 2Ngono Judasi, iye wakawonga Jesu, wakabe euziba, ngobe Jesu wakabe egala eshangana ne badiyiwa babe kuuli. 3Ndizo Judasi kayenda ku nnda iwoyo akatungamila babhayani ne balindi be Ng'umba ye Ndzimu banodwa ku bapirisiti bakulu ne Bafarasi bakasenga mathumo ne mavone. 4Jesu se akabe eziba tjimwe ne tjimwe tjakabe tjowonshingikalila, kapindila mbeli kwe badiyiwa babe ngono kabhuzwa babhayani kati, “Ndiani wamunoshaka?”
5Bakan'dabila beti, “Toshaka Jesu we Nazareta.”
Jesu kabadwa kati, “Ndimi.”
Judasi n'wongi, wakabe anabo. 6Ngono kukati Jesu eti, “Ndimi” bakasedza nge kushule bakawila pasi. 7Jesu kababhuzwa kakale kati, “Ndiani wamunoshaka?”
Bakati “Jesu we Nazareta.”
8Jesu kati, “Ndamubudza kale kuti ndimi. Ha mushaka imi, letjani balume ibaba bayende.” 9Wakaleba ikoku kuti matama aakabe atongo leba kutanga asiwile pasi, anoti; “Tate, andizolashikigwa nenguba ali nng'ompela we bamakandipa.”
10Simoni Pita wakabe ana bukanu, kagushomola katema nlanda we Ntungamili we bapirisiti kanthubula zebe ye luji. Zina la iwoyo nlanda lakabe liyi Maliko. 11#Matewu 26:39; Mako 14:36; Luke 22:42Ipapo Jesu kati kuna Pita, “Bgwiliza bukanu gugo mu khata. Apa unoalakana kuti anditowong'wa mu bhepe le kudziyidziwa landakapiwa ndi Tate kene?”
Jesu mbeli kwa Anasi
12Ipapo babhayani be Baroma ne Nkulu wabo ne balindi be Ng'umba ye Ndzimu bakabhata Jesu, bakansunga. 13Kutanga bakansa kuna Anasi, nkalabgwa wa Kaifasi, iye wakabe ali Ntungamili we bapirisiti gole ilelo. 14#Johani 11:49, 50Kaifasi ndiye wakabe atongo kumbuludza Bajuta kuti koyita kuti nthu nng'ompela afe pana kuti kufe bathu bose.
Pita unozwilandula Jesu
(Matewu 26:69-70; Mako 14:66-68; Luke 22:25-57)
15Simoni Pita ne mmwe n'diyiwa bakatobela Jesu. Iwoyo mmwe n'diyiwa kaswika kanginabo tje mukati kwe nsha we Ntungamili we bapirisiti, ngobe iye wakabe ezibgwa nge Ntungamili we bapirisiti. 16Pita iye kasala kuzhe tje pa nkoba. Ipapo iwoyo n'diyiwa wakabe ezibgwa nge Ntungamili we bapirisiti kabhuda kanolebeleka ne nlandakadzi unolinda pa nkoba, ngono kangina na Pita mukati. 17Mwanadi iwoyu kadwa Pita kati, “Apa ate uli mmwe we badiyiwa ba iwoyu nlume kene?”
Pita kan'dabila eti, “Ate ndili mmwe wabo.”
18Kwakabe kupota, ngono balanda ne balindi bakabe bedziya moto, ngono Pita wakabe anabo edziyabo moto.
Ntungamili we bapirisiti unobhuzwa Jesu
(Matewu 26:59-66; Mako 14:55-64; Luke 22:66-71)
19Ntungamili we bapirisiti akabhuzwa Jesu ngekwe badiyiwa babe ne nge kudiya kukwe. 20Jesu kan'dabila eti, “Ndagala ndilebeleka ne bathu patjena, ndakadiya mu ng'umba dze mitembezelo ne mu Ng'umba ye Ndzimu, kunokubungana Bajuta bose. Andina tjandakaleba muzwikohwa. 21Ini ngono mundibhuzwa? Bhuzwani bathu bakandihwa. Mubabhuzwe tjandakababudza, banoziba tjandakaleba.”
22Jesu kati eleba eijalo mmwe we balindi bakabe bali ipapo kanloba mu lushaya kati, “Unodabila Ntungamili we bapirisiti tjini kene!”
23Jesu kanshandula eti, “Ha ndaleba tjimwe tjakabipa, undilakidze itjo. Koga ha ndilebesa muna tjandaleba, unondilobelani?”
24Ipapo Anasi kapitshila Jesu akasungwa kuna Kaifasi Ntungamili we bapirisiti.
Pita unozwilandula Jesu kakale
(Matewu 26:71-75; Mako 14:69-72; Luke 22:58-62)
25Simoni Pita kati atjimile ipapo edziya moto, bamwe bakambhuzwa bakati, “Apa ate uli mmwe we badiyiwa babe kene?”
Pita kazwilandula kati, “Ate ndili mmwe wabo.”
26Mmwe we balanda be Ntungamili we bapirisiti, wakabe ali gamu le nlume wakabe athubugwa zebe ndi Pita, kabhuzwa kati, “Apa andizokubona unaye mu nnda kene?”
27Kakale Pita kalandula eti, “Aa, ndodwa!” Tjinyolotjo gukurume likalila.
Jesu unosumikilisiwa mbeli kwa Pilato
(Matewu 27:1-2, 11-14; Mako 15:1-5; Luke 23:1-5)
28Kwakati ku tjimangwanana bakadusa Jesu mu ng'umba ya Kaifasi bakan'yisa ku ng'umba hwulu ye nlauli we Nroma. Ngono Bajuta bakasingine mu ng'umba ye nlauli, ngobe bakabe beshaka kuti batubule kuja zojiwa zwe Nzano we Kupinda pezhugwi bakatjenapala, nge mpanga we Tjijuta. 29Ndizo Pilato kabhuda kayenda ku bali kababhuzwa kati, “Mukati nlandu uwe ini?”
30Bakan'dabila beti, “Tobe tisanlonga mu maboko enyu, ha abe asina bubi gwaathama.”
31Pilato kabadwa kati, “Muntole munonsumikilisa nge nlayo wenyu.”
Bakan'dabila beti, “Iswi atina fanilo ye kubulaya nthu.” 32#Johani 3:14; 12:32Oku kwakashingikala kuti ndizo kuzhadzisike matama a Jesu aakaleba ngekwe lufu gugwe.
33Pilato kabgwilila mu ng'umba kadana Jesu. Kambhuzwa kati, “Apa u Mambo we Bajuta kene?”
34Jesu kambhuzwabo kati, “Apa bhuzo iyeyi inodwa mukuli kene bamwe bakubudza nge kwangu?”
35Pilato kan'dabila eti, “Imi ate ndili Njuta. Walongwa mu maboko angu nge bathu ba kanyi kuko ne bapirisiti babo bakulu. Watjinyani?”
36Jesu kati, “Bushe gwangu ate guli gwe shango ino, ha bushe gwangu gwabe guli gwe shango ino, balanda bangu banobe bagwa kudzibila Bajuta kundisunga. Aa, bushe gwangu ate guli gwaipapano!”
37Ndizo Pilato kati kunli, “Ndizo u mambo kene?”
Jesu kan'dabila eti, “Ndiwe unoti ndi mambo. Imi ndakazwagwa azha mu shango ino, ndizhila kuwotendeka ngekwe malebeswa. Iye umu malebeswa unondihwilila.”
38Pilato kabhuzwa kati, “Malebeswa ini?”
Lufu gwa Jesu
(Matewu 27:15-31; Mako 15:6-20; Luke 23:13-25)
Pilato kati ajalo kabhudila kuzhe kakale ku Bajuta kabadwa kati, “Anditobona tjamunonsekesela. 39Koga nge kuyendidzana nge mpanga wenyu, ndagala ndimusunungulila nsungwa nng'ompela mu nsi we Nzano we Kupinda pezhugwi. Moshaka kuti ndimusunungulile Mambo we Bajuta kene?”
40Bakan'dabila bemimila beti, “Kusi iwoyu nlume! Koga toshaka Bharabhasi!” Bharabhasi wakabe ali tjigebeng'a.
Currently Selected:
Johani 18: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
