Jakubo 4

Buzwalani ne shango

1Ini tjinobanga ngwa ne kukwebakwebana pakati kwenyu? Azwitodwa mu njemulo dzenyu dzinogwisana mukati kwenyu kene? 2Moyemula koga mukasizwiwane, ndizo mukabulaya. Muna tjiba mu zwithu zwinjinji, ngono tjiba dzenyu adzitopunduka, ndizo mukwebakwebana mudza mugwa. Amutowana zwithu zwamunoshaka nge kuti amutozwikumbila. 3Ngono ha mukumbila amutowana nge kuti amutokumbila nge zila yakalulwama. Mokumbilila kushathisa njemulo dzenyu. 4Bathu basingagagwebgwe ndimwi! Apa amutoziba kuti ha muli bazwalani be shango mu zwita zwe Ndzimu kene? 5Kene mozwidwa muti ndebo iyeyi imu hwalo dze Ndzimu, inoti “Ndzimu una njemulo dzinopisika ngekwe meya yawakalonga mutili,” ate malebeswa? 6#Makungulupeswa 3:34Koga ngoni dzatinohwigwa nge Ndzimu inji, ndizo hwalo dze Ndzimu dziti, “Ndzimu unonyanyayidza bathu banozwikudza, koga unohwila ngoni banozwiyisa pasi.”

7Muzwipe mu Ndzimu mugwisane na Satani, ndizo Satani unowomutizha. 8Muzwisedzedze ku Ndzimu ndizo na iwobo unowozwisedzedza kumuli. Ngulani maboko enyu, batjinyi ndimwi! Mutjenese mimoyo yenyu, bathu ndimwi be mimiyo ikabili! 9Ibeni ne buyendasi muhwe zogwadza mulile ne tjiseko tjenyu tjishanduke tjibe tjililo. Kushatha kwenyu ngakushanduke kube kufubala ne kuhwa zogwadza. 10Muzwiyise pasi mbeli kwa She ndizo unowomukudza.

Usisumikilise ikamu tjitjo

11Musilebane bubi zwikamu. Iye unoleba bubi ngekwe tjimwe ikamu, kene etjibona nlandu, unobe eleba bubi ngekwe nlayo, koga ha ubona nlayo nlandu auteuli nlondolodzi we nlayo koga unsumikilisi wawo. 12Kuna nng'ompela unopa nlayo kakale unosumikilisa, iye unotubula kutjidza ne kukolomola. Koga iwe, uani unobona mmwe nthu nlandu kene?

Musizwilobe ifuba

13 # Makungulupeswa 27:1 Hwililani imwi munoti, “Nasi kene mangwana towoyenda kwakati, tikanolaluka tishaba tikubunganya mari manjinji,” 14koga musingazibe kuti kowobe kuli tjani mangwana. Butjilo gwenyu ini kene? Monga fulele inobe yapo ikadwa ipela tjinyolotjo. 15Makafanila kuti muti, “Ha She eda, towotjila tikashinga sa woku na woku.” 16Ngono ngwenu mozwikudza muzwiloba ifuba. Koga kuzwiloba ifuba ikoko kubiibi.

17Iye unoziba tjakalulwama tjaakafanila thama koga kasitjithame, unothama jinyo.

Currently Selected:

Jakubo 4: KBTP

Highlight

Copy