Bahebheru 12

Ti bana be Ndzimu

1Setakapotelekwa nge mbunga nkulu we batendeki, ngatilasheni tjimwe ne tjimwe tjingatipinganyidza, kose ne tjibi tjinotinamatila, ngono tilabuke takasimisila mu lubilo gu mbeli kwedu, 2takalinga Jesu ntangisi ne mpeleledzi we kugalamoyo kwedu, iye wakati abona kushatha kunonzhila kadzikitadzila tjileyanyo eshayila hanya kulengudziwa, ngono ngwenu ugele ku luboko gwe luji gwe tjigalo tje Ndzimu.

3Kumbulani Jesu wakadzikitadzila kunyanyayidziwa nge babi, kuti ndizo musinyalemoyo mukadwa mutoboka. 4Mu kugwisana kwenyu ne tjibi akuthu kukaswika mu tjimo tjekuti mu gwe kungathama kuti lopa lenyu litebugwe. 5#Jobe 5:17; Makungulupeswa 3:11, 12Apa makakangang'wa dama linokulumbidza se bakololo kene? Dama linoti,

“Nkololo wangu, usikutole kuli kulelu lelu kutjemegwa ndi She

kakale usinyalemoyo ha She bekuloba,

6ngobe She banotjemela iye wabanoda,

bakabuya bakaloba mmwe ne mmwe mwana wabanoamutjila.”

7Dzikitadzilani kutjemegwa, Ndzimu unomutola se bakololo. Ndiupi mwana usingatjemegwe ndi tate babe kene? 8Ha musingatjemegwe se bana bose, kodwa kuti mu bana be bupombgwe. Ate muli bana be malebeswa. 9Tina botate bedu mu shango ino banotitjemela, koga tobateta nge kwako. Apa atizofanila kuzwiyisa pasi kupindisa, kuna Tate bedu banotipa meya ne butjilo kene? 10Botate bedu bakabe betitjemela kwe tjibaka tjifupi, sekwa banobona kufanila, koga Ndzimu unotitjemela kutibhatsha iswi, kuti ndizo tishanganyile nawo kuyengemala kwawo. 11Ngobe ha utjemegwa, mu tjibaka itjetjo akutozipa kogwadza, shule kwe kutjemegwa ndiko kunozha zwizwalo zwe kunyalala kwe ndulamo kuna bakadiyiwa ngotjemegwa.

Ndayo ne kutjenjedza

12 # Isaya 35:3 Ndizo simisani maboko enyu akalembeleka ne zwidwi zwenyu zwakanyala! 13#Makungulupeswa 4:26“Thamilani makumbo enyu zijana dzakatambunuka,” kuti ndizo una gumbo linogwadza lisilemale, koga lipodziwe.

14Gwisani kube ne mbakiso ne bathu bose nenge kuti muyengemale, ngobe akuna unowobona She kuzhe kwe kuyengemala. 15#Matama 29:18Muyite kuti kushete unowokong'wa kuwana ngoni dze Ndzimu, ndizo kusibe ne unowomela pakati kwenyu se ndzi unobaba, kazhisa phipiti, katjinya banjinji, 16#Kutangisa 25:29-34ibeni ne njele kuti kusibe ne phombgwe, kene nthu usina hanya ne Ndzimu sa Esau, iye wakatengesa kube mbano kukwe nge ndilo ye zojiwa. 17#Kutangisa 27:30-40Moziba kuti kwakati shule woshaka makombolelo kalambiwa; ngobe kwakabe kusitjina sekwa angashanduka muna tjaakathama, nenguba akabe eashaka nge mishodzi.

18 # Kufuluka 19:16-22; 20:18-21; Matama 4:11, 12; 5:22-27 Amuzozha ku zwithu zwamungabhata nge maboko, ku bhuba le moto, ku zhalima, pakati zwititi ne dutu. 19Amuzozha ku nlidzo we lunyanga kene ku hwi lakati lilebeleka bathu bakakumbila kuti lisidwilile. 20#Kufuluka 19:12, 13Ngobe bakabe basingatubule kumilana ne ndaulo yabakapiwa inoti, “Ha kene phuka ingakutha dombo ilelo, yakafanila kikithidziwa nge mabgwe.” 21#Matama 9:19Kwakabe kutjisa kwazo kubona tjithu tjakajalo Mushe kwaakadzina kati, “Ndotetema nge lutjo.”

22Koga imwi mazha ku Dombo le Ziyoni ne ku nzi nkulu we Ndzimu unotjila, Jerusalema we kudzimu ne ku batumwa be kudzimu mu nshangano we kushatha, 23ku nshangano we mbano dzakakwagwa mazina kudzimu, mazha ku nsumikilisi iwo Ndzimu wa bose ne ku meya ye bathu bakalulwama ngono bakalulwamisiwa kwakapelela. 24#Kutangisa 4:10Mazha kuna Jesu tjibanga tje Tjidumano tjitshwa, mazha ku malopa akanyasiwa, anolebeleka zwithu zwinoyita pana a Abele.

25 # Kufuluka 20:22 Ibeni nge njele, musilambe kuhwilila iye unolebeleka. Ngobe ibabo bakalamba kuhwilila iye wakatjemela ali mu shango, bakasheta madzetelo. Ngono apa iswi ha tilamba iye unotjemela edwa kudzimu, towodzeta tjini? 26#Hagayi 2:6Ipapo, hwi lile likazunguza shango, koga ngwenu wakagadzabgwe eti, “Ndowopapha kang'ompela koga azunguza zhuzhugwi kose ne shango.” 27Matama anoti, “Ndowopapha, kang'ompela koga” anolakidza kuti kowozunguziwa kukadusiwa zwithu zose muna zwakathamiwa, kuti ndizo kusale zwisingazunguzike.

28Ndizo ngatibokeni Ndzimu, ngobe toamutjila bushe gusingake gukazunguziwa, ngono namata Ndzimu nge zila inoushathisa, nge kuteta nenge kutja, 29#Matama 4:24ngobe Ndzimu wedu moto unolobesa.

Currently Selected:

Bahebheru 12: KBTP

Highlight

Copy