Kutangisa 8
8
Bupelo gwe nkubila
1Koga Ndzimu ukakumbula Nuwa ne phuka dzose dze shango ne zwithuwo zwakabe zwinaye mu araka, ngono ukatumila phepo mu shango, ndizo vula ikatapudzika. 2Misenya i pasi ne kudzimu kukazhaligwa, ngono vula ikakaamudza. 3Vula ikatapudzika nge bunono mu shango. Ku bupelo gwe mazhuba ali zana lina mazhuba ali makumi mashanu (150) vula yakabe yabe tja pasi. 4Mu zhuba le bugumi lina mazhuba ali kutendeka le mwedzi we kutendeka, araka ikagala pezhugwi kwe matombo e Ararati. 5Vula yakadwilila ngotapudzika kudzina kunoti mu mwedzi we bugumi, ngono mu zhuba le kutanga le mwedzi we bugumi theswi dze matombo dzikaboneka.
6Ku bupelo gwe mazhuba ali makumi manna Nuwa kazhula fesitere laakabe athama mu araka. 7Katuma gungubo ngono likawuluka wuluka liyenda yeno na yeno kuswikila vula yapkhwa mu shango. 8Ipapo katuma njiba kubona kene vula yatapudzika mu shango. 9Koga njiba ikasheta paingabiga gumbo layo ngoti vula yakabe itjizhele shango yose, ndizo ikabgwilila kuna Nuwa ku araka. Kadusa luboko kaitola kaibgwiliza mu araka. 10Kagala mazhuba mamwe ali kutendeka ngono katuma njiba kakale. 11Njiba yakati ibuya madekwana ikabe yakaluma zhani nyolo le ntoba litjadwa pa tjegwa. Ipapo Nuwa kaziba kuti vula yatapudzika mu shango. 12Kagala mamwe mazhuba ali kutendeka kabe etuma njiba kakale, koga mu tjibaka itjetjo ikasitongo bgwilila kunli kakale.
13Mu zhuba le kutanga le mwedzi we kutanga we gole le mazana ali matathatu ana gole ling'ompela (601) e butjilo gwa Nuwa vula yakabe yapkhwa mu shango. Nuwa kadusa denga le araka ngono kalinga kabona kuti pasi patjiwoma. 14Mu zhuba le makumi mabili ana mazhuba ali kutendeka (27) le mwedzi we bubili shango yakabe yatjiwoma nge buzhalo.
15Ipapo Ndzimu ukadwa Nuwa ukati, 16“Tjibhuda mu araka ne nkadzi uwo ne bakololo babo ne bakadzi babo. 17Bhuda ne tjimwe ne tjimwe tjinotjila tjinawe: Nyuni ne phuka ne tjimwe ne tjimwe tjinokambayila mu shango kuti zwizwale zwiwande mu shango, zwibe ne zwizwalo zwiwande mu shango.” 18Ndizo Nuwa kabhuda ne nkadzi uwe ne bakololo babe ne bakadzi babo. 19Phuka dzose ne zwitjili zose zwinokambayila ne nyuni imwe ne imwe, tjimwe ne tjimwe tjinoyendayenda mu shango tjikabhuda mu araka ludzi nge ludzi.
Nuwa unodusa tjibhayilo
20Ipapo Nuwa kabakila Yahwe tjibeso tjinopisigwa zwibhayilo, katola dzimwe phuka mu ludzi gumwe ne gumwe lubuyanana gwe phuka ne gwe nyuni kapisila zwibhayilo zwinopisiwa mu tjibeso tjinopisigwa zwibhayilo. 21Yahwe bakati behwa nnuhwo unozipa bakazwidwa mu moyo bakati, “Andingatjazhise bhiso kakale mu shango ngekwe nthu, ngoti mikumbulo ye nthu yakabipa kudwila mu butjetjana gugwe. Kakale andingatjabulaye zwibumbiwa zose sekwa ndakathama. 22Ha shango itjiyapo, tjibaka tje kudzwala ne tje kuvuna, tje kupota ne tje kupisa, tjilimo ne mbaba, sikati ne siku azwitowopela.”
Currently Selected:
Kutangisa 8: KBTP
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.