Kutangisa 44

Mila kwe kopi

1Josefa kadwa ntjengeti we ng'umba iye kati, “Pakila balume ibaba zojiwa zwabangatubula senga mu hwomo dzabo, ube ulonga mari e mmwe ne mmwe wabo mu hwomo iye. 2Ulonge kopi yangu mu hwomo ye nnung'una wabo kose ne mari e mathunde awe.” Ngono kathama sekwa adwiwa ndi Josefa. 3Tjimuka mangwanana balume ibabo bakatola gwendo gwabo ne madonki abo. 4Kukati batjadwa pa bhuda koga mu nzi basathu bakabe kule, Josefa kadwa ntjengeti we ng'umba iye kati, “Tobela balume ibabaje, uti ubabhata uti ku bali, ‘Mobuzililani ndulamo nge mbipo kene? 5Apa ate ili iyo kopi inong'wa na tetshi wangu kabuya kakandila ndiyo kene? Mathama nlandu usinshoma!’ ”

6Kati ebabhata mu zila kabgwilulula matama aapiwa ku bali. 7Balume ibabo bakashandula beti, “Kwatini tetshi wedu etilebesa nge matama akajali? Iswi balanda benyu atingathame tjithu tjakajali! 8Naiko takabuya tidwa ku Kanana tikazha ne mari atakawana mu milomo ye hwomo dzedu. Ndizo wali, tingakwiba siliva kene golide mu ng'umba ya tetshi wedu tjini? 9Mmwe wedu ha angawang'wa anayo ngaabulawe, basala banowobe balanda benyu.”

10Ntjengeti kabe eti, “Kwakalulwama, ngakube sekwa maleba. Iye unowowang'wa anayo unowobe nlanda wangu, bamwe ibo banowobe basununguka.” 11Tjinyolotjo mmwe ne mmwe wabo kabelesenula hwomo iye kaigadza pasi kaizhula. 12Ipapo ntjengeti katangisa kafunyungudza kudwa mu hwola yabo kunoti mu ntjetjana pabali bose. Ngono kopi ikawang'wa mu hwomo ya Bhenjamini. 13Balume ibabo bakapalula zwiambalo zwabo. Bakabelesa donki dzabo bakabgwilila ku nzi.

14Juda ne bakulu babe ne banung'una babe bakaswika bewana Josefa atjiyapo mu ng'umba. Ngono bakanthigamila. 15Josefa kati ku bali, “Ini ikoku kwamathama? Amutoziba kuti nlume unonga imi ungabona zwithu nge kukandila?”

16Juda kashandula eti, “Tingatini dumbu kuna tetshi wedu? Tingatini? Tingalakidza tjini kusabe nlandu kwedu? Ndzimu wazumbunula nlandu we balanda benyu. Tabe balanda ba tetshi wedu ngwenu, iswi tose ne wawang'wa ana kopi.” 17Koga Josefa kabe eti, “Aa! Andingashinge tjithu tjakajalo! Nthu wawang'wa ana kopi koga ndiye unowobe nlanda wangu. Imwi bamwe mose bgwililani kuna tate benyu nge mbakiso.”

Juda unokumbilila Bhenjamini

18Ipapo Juda kasedzela panli kati, “Ndomukumbila tetshi, letjani nlanda wenyu alebeleke namwi. Nenguba mulizana na Faro musitongo gwadzila moyo nlanda wenyu. 19Tetshi wedu wakabhuzwa balanda babe kati, ‘Apa muna tate kene nnung'una?’ 20Tikadabila titi, ‘Tina tate bakwegula ne nnung'una wedu wakazwagwa tate bakula. Nkulu uwe wakatjinyika, ndizo iye ndiye yega mwana wa mmeyabe wakasala. Tate babe banon'da kwazo.’ 21Ndiko imwi mukabe muti ku balanda benyu, ‘Kazheni naye kuti ndizwibonegwe.’ 22Ngono iswi tikashandula tetshi wedu titi, ‘Mbisana iwoyu aangathubukane na tate babe ngoti ha angathubukana na tate babe banowofa.’ 23Ndizo imwi mukabe muti, ‘Ha musabuya ne nnung'una wenyu anditoda ne kumubona.’

24“Takati tabgwilila kuna tate bangu nlanda wenyu, tikababudza tjalebgwa ndimwi tetshi wedu. 25Kwakati tate bedu beti, ‘Bgwililani munotengela zojiwa zwishomanana,’ 26iswi tikadabila titi, ‘Atingayende. Tingayenda koga nnung'una wedu anaswi. Nlume iwouje aatoshaka kutibona nge mesho ha tisina nnung'una wedu.’ 27Nlanda wenyu tate bedu bakabe beti ku tili, ‘Moziba kuti nkadzi wangu Rahele wakandizwalila bakololo babili. 28Mmwe wabo wakandisiya ngono abe nditi, “Wakazandabugwa.” Ndizo andizodwa ambona kudwa ipapo. 29Ha munditolela iwoyu kakale tjimwe tjibi tjibe tjinshingikalila, mowobe mathama kuti nsholo wangu ntjena unongina mu ikumbu nge shungu.’

30“Ha tibgwilila kuna tate bedu, mbisana asinaswi, se butjilo gwabo guli mbisana, 31bangafa ha basingambone. 32Imi nlanda wenyu ndakatuna kuna tate nditi, ‘Ha ndingasabuya naye ndowobe nlandu kumuli bupenyu gwangu gose.’ 33Ndizo ndokumbila kuti imi nlanda wenyu ndisale ndili nlanda wenyu mu bumo gwe mbisana, iye abgwilile ne bakulu babe. 34Ndingabgwilila tjini ndisina mbisana? Andingamilane nge kubona tate bali mu zogwadza.”

Currently Selected:

Kutangisa 44: KBTP

Highlight

Copy