Mishingo 8

1Ngono Saulo kadumila kubulawa kwa Sitifani.

Saulo edziyidza Gubungano

Mu zhuba ilelo gubungano limu Jerusalema likatangisa kube ne kudziyidziwa kwakabipa. Bose bakabe bepalala betizhila ku mituthu ye Judiya ne Samariya kuzhe kwe batumwa ba Jesu. 2Balume banotja Ndzimu, bakabiganya Sitifani, bakanlilila nge tjililo tjikulu.

3 # Mishingo 22:4, 5; 26:9-11 Koga Saulo kapaladza gubungano, engina ng'umba ne ng'umba ekwebela kuzhe bagalimoyo, balume kose ne bakadzi ebalonga mu ng'umba ye busungwa.

Ndebo mbuya inosumikigwa mu Samariya

4Bagalimoyo ibabo bakapalala bakayenda kumwe ne kumwe, besumikila dama. 5Filipo kayenda ku nzi nkulu Samariya, ngono kasumikila ngekwa Mesiya ku bali. 6Mibunga ikahwilila tjakabe tjilebgwa ndi Filipo nge moyo nng'ompela nenge njele, benhwilila bebona zwilakidzo zwaakabe eshinga. 7Meya mibi yakabe ibhuda mu bathu banjinji imimila ne banjinji bakalobgwa nge gulukadzi ne zwilema bakapodziwa. 8Ndizo kwakabe ne kushatha kukulu mu nzi iwoyo.

9Kwakabe kuna nlume unodang'wa Simoni wakabe abe ne tjibaka ethama masalamusi mu nzi ngono akadziyanya itjaba tje Samariya ezwikudza eti iye nge kukwe mmwe nkulu kulu. 10Bose bakabe benhwilila kudwa mu ntukununu kunoti mu nkulu tjose beti, “Nlume iwoyu ndiye masimba e Ndzimu anodang'wa kuyi masimba makulu.” 11Bakabe benhwilila, ngobe kwakabe kwabe tjibaka ebadziyanya nge masalamusi awe. 12Koga bakati begalamoyo Filipo esumikila ndebo mbuya ye bushe gwe Ndzimu nenge zina la Jesu Kirisiti, bakadubikwa, bose balume ne bakadzi. 13Simoni na iyebo kagalamoyo, ngono shule kwe adubikwa, kabhatana na Filipo. Ngono kati ebona zwilakidzo ne makaabadzo makulu eshingwa katjenama.

14Batumwa ba Jesu mu Jerusalema bakati behwa kuti bathu mu Samariya bakaamutjila dama le Ndzimu, bakatuma Pita na Johani ku bali. 15Bakati beswika, bakabatembezelela kuti baamutjile Meya yakayengemala. 16Ngobe Meya yakayengemala yakabe isathu ikadelukila mubali, koga bakabe badubikiwa nge zina la She Jesu koga. 17Ipapo Pita na Johani bakababiga maboko, ngono bakaamutjila Meya yakayengemala.

18Simoni kati ebona kuti Meya yapiwa bagalimoyo ha batumwa ba Jesu bebabiga maboko, kapa Pita na Johani mari, 19eti ku bali, “Mundipebo simba ileli, kuti mmwe ne mmwe wandinobiga maboko aamutjile Meya yakayengemala.”

20Koga Pita kan'dabila kati, “Mari awo ngaalobe nawe, ngobe wakumbula kuti tjipo tje Ndzimu tjingatengwa nge mari! 21Auna bugalo kene gobe muna ikoku, ngobe moyo uwo auzolulwama mu mesho e Ndzimu. 22Shanduka mu bubi gugo igogu, utembezele She, kuti, ha kutubuka bakuzwiibhatigwe mazwimisilo e moyo uwo. 23Ngobe ndobona kuti uzhele ndandala kakale u nsungwa we jinyo.”

24Simoni kati kuna Pita na Johani, “Ndomukumbila munditembezelele kuna She, kuti kusibe ne tjimwe tje zwithu izwezwi zwamaleba tjinowondishingikalila.”

25Shule kwe bapa butendeki, basumikila dama la She, Pita na Johani bakabgwilila ku Jerusalema, besumikila ndebo mbuya mu mizi minjinji ye Basamariya.

Filipo ne N'etiyopiya

26Ntumwa wa She kati kuna Filipo, “Milika uyende ku ndzibo we ku burwa ku zila inodeluka idwa ku Jerusalema iyenda ku Gaza.” I zila inopalama tjilambanyika. 27Ndizo Filipo kamilika kayenda, kashangana ne nlume we ngomwa we ku Itopiya wakabe ali nkadzasha nkulu ali mbhati we fumwa ya Kandake shekadzi we Itopiya, wakabe abe azha ku Jerusalema kunamata Ndzimu. 28Ndizo wakabe wobgwilila kanyi akatatha koloyi iye ebala lukwalo gwe nlebesambeli Isaya. 29Meya ikati kuna Filipo, “Yenda ku koloyi iyeyije uyende nayo.” 30Filipo kalabukilako, ngono kanhwa ebala mu lukwalo gwe nlebesambeli Isaya. Kambhuzwa kati, “Apa unohwisisa tjaunobala kene?” 31Nlandalume kashandula eti, “Ndingahwisisa tjini kusina unonditjenesela kene?” Ndizo kakumbila kuti Filipo atathe agale naye mu koloyi. 32#Isaya 53:7, 8Paakabe ebala mu lukwalo ndiapa,

“Se pkhwizi inokwebegwa ku mbulayi,

kene pkhwizana inyelele mbeli kwe nteseli wayo,

ndizo aazozhula nlomo.

33Kalengudziwa kalambigwa ndulamo.

Ndiani kene ungaleba ngekwe ludzi gugwe?

Ngoti butjilo gugwe gwapela mu shango.”

34Nlanda kabhuzwa Filipo kati, “Mundibudze kuti, nlebesambeli unoleba ikoku ngekwa ani? Unoleba nge kukwe kene ngekwe mmwe upoga?” 35Ipapo Filipo kadwa nlomo, ngono katangisa nge lukwalo igogu, kambudza ndebo mbuya ngekwa Jesu. 36Bakati beyenda mu zila, bakaswika pathu pakabe pana vula, ngono nlanda kati, “Bona, eyi vula. Ini tjingandidzibila kudubikwa kene?” 37[Filipo kati kunli, “Ungadubikwa ha ugalamoyo nge moyo uwo wose.” Kadabila eti, “Ndogalamoyo, kuti Jesu Kirisiti Nkololo we Ndzimu.”]

38Nlanda kamisa koloyi, ngono bose Filipo ne nlanda bakangina mu vula, ngono Filipo kan'dubika. 39Bakati bebhuda mu vula, Meya ya She ikatola Filipo. Nlanda aazotjambona kakale, koga kadwilila mu zila iye akashatha kwazo. 40Filipo kaboneka mu Azotu; ngono kayendila mbeli esumikila ndebo mbuya ku mizi yose, kudzina eswika ku Sizariya.

Currently Selected:

Mishingo 8: KBTP

Highlight

Copy