Mishingo 5

Ananiyasi na Safira

1Koga mmwe nlume wakabe edang'wa Ananiyasi ana nkadzi uwe Safira, bakatengesa imwe thundu yabo. 2Ngono kasumbika mamwe mari adumana ne nkadzi uwe, mari asala kaayisa ku batumwa ba Jesu. 3Koga Pita kambhuzwa eti, “Ananiyasi, ini Satani azhala moyo uwo kuti unyepele Meya yakayengemala usumbike mamwe mari awawana watengesa nnda? 4Wakati usathu ukatengesiwa apa wakabe usi uwo kene? Ne usinokuwutengesa, apa mari akabe asi awo kuashingisa sekwa unobona kene? Ini wakumbula kuthama tjithu tjakajali? Auzonyepela bathu, koga wanyepela Ndzimu!” 5Kukati Ananiyasi ehwa ikoku koga, kawila pasi kafa; ngono bose bakahwa nge kwako bakatja kwazo. 6Bazhuzha bakamilika, bakapetela mbili uwe, bakansengela kuzhe, ngono bakambiganya.

7Shule kwe awara dzingabe thatu nkadzi uwe kangina, asingazibe tjashingikala. 8Pita kambhuzwa kati, “Undibudze, kuti kene makatengesa nnda nge themba iyeyi?”

Kadabila eti, “Ee, ndiyo themba.”

9Ndizo Pita kati kunli, “Iwe ne nlume uwo ini makumbula kulika Meya ya She? Bona, makumbo e bathu banobiganya nlume uwo apa nkoba, ngono banowokusengabo!” 10Ipapo kawila pasi pa makumbo a Pita kafa. Bazhuzha bakangina bakabona kuti wafa, ndizo bakansengela kuzhe bakanombiganya kubapa ne nlume uwe. 11Gubungano lose ne bamwe bose bakahwa ngekwa ikoku bakatja.

Makaabadzo ne matjenamiso

12Batumwa ba Jesu bakashinga zwilakidzo zwinjinji ne matjenamiso manjinji pakati kwe bathu. Bagalimoyo bose bakabe beshanganila pa ntutshi wa Solomoni. 13Mu bamwe kwakabe kusina ndodwa ne nng'ompela wakabe ana tjilopa tje kuzwibhatshanya nabo nenguba bathu bakabe bebakudza kwazo. 14Koga bagalimoyo muna She bakapaphidzika, mibunga ye balume ne bakadzi bakagalamoyo. 15Bathu bakati bebona tjakabe tjishingikala bakasenga bagwele bakabaladzika mu malawo nemu dzithobo pa dzizila kuti ntutshi wa Pita uwile bamwe babo ha epinda ipapo. 16Ngono mibunga ye bathu ikazha idwa mu mizi yakapoteleka Jerusalema, bezhisa ibabo bakabe begwala ne bakabe bana meya mibi; ngono bose bakapodziwa.

Batumwa ba Jesu banodziyidziwa

17Ntungamili we bapirisiti kamilika ne baakabe anabo bose, be bhiko le Basadusi, bakabe ne fupa, 18ndizo bakasunga batumwa ba Jesu, ngono bakabalonga mu ng'umba ye busungwa ye bathu bose. 19Koga busiku igogo ntumwa wa She kazhula mikoba ye ng'umba ye busungwa, kabadusa, ngono kati ku bali, 20“Yendani munoma mu Ng'umba ye Ndzimu, ngono mubudze bathu bose ngekwe matama e butjilo igogu butshwa.” 21Batumwa ba Jesu bakati behwa ikoku bakangina mu Ng'umba ye Ndzimu mangwanana bakatangisa kudiya.

Ntungamili we bapirisiti ne baakabe anabo bakati beswika bakadana lubazhe ne Gulukota le Iziraela ngono bakatuma bathu kuti banotola batumwa ba Jesu mu ng'umba ye busungwa babazhise mbeli kwabo. 22Koga bashingi bakati beswika, bakasiwane batumwa mu ng'umba ye busungwa, ndizo bakabgwilila bakanobika beti, 23“Tawana ng'umba ye busungwa yakakhiyiwa ne balindi bose bakalinda pa mikoba; koga tikati tizhula mikoba tikasheta watawana mukati!” 24Nlauli we balindi be Ng'umba ye Ndzimu ne bapirisiti bakulu bakati behwa ikoku, bakatjenamila kuti kwashingikalani ku batumwa ba Jesu. 25Ipapo mmwe kangina kati ku bali, “Hwililani! Balume bamakalonga mu ng'umba ye busungwa bamu Ng'umba ye Ndzimu banodiya bathu!” 26Ndizo nlauli kayenda ne adzasha dzidze kanotola batumwa. Abazoshingisa simba, ngobe betja kikithidziwa nge bathu nge mabgwe.

27Bakazhisa batumwa ba Jesu, bakathama kuti bame mbeli kwe makulukota, ngono Ntungamili we bapirisiti kababhuzwa, 28#Matewu 27:25kati, “Takamulaya takasimisa kuti musidiye nge zina ileli, koga ngwenu mazhadza Jerusalema nge zwidiyo zwenyu, ngono moshaka kutipa nlandu we lufu gugwe!”

29Pita ne bamwe batumwa ba Jesu bakashandula beti, “Takafanila hwa Ndzimu, kusi bathu. 30Ndzimu wa bobatategulu bedu wakamusa Jesu mu bafi, iye wamakabulaya nge kunlembeledza mu tjileyanyo. 31Ndzimu wakammilidzila ku luboko gwawo gwe luji kube Ntungamili ne Ntjidzi, kuti Baiziraela bashandukile matjinyo abo kakale bazwiibhatigwe zwibi. 32Ti batendeki be zwithu izwezwi, iswi ne Meya yakayengemala, iyo tjipo tje Ndzimu kuna ibabo banouhwilila.”

33Bakati behwa ikoku, bakagwadzamoyo, ngono bakayemula kubabulaya. 34Koga mmwe wabo, ali Nfarasi edang'wa kuyi Gamaliyele, wakabe ali n'diyi we nlayo, iye wakabe etetiwa kwazo nge bathu bose, kamilika kama mu lubazhe. Kadusa ndayilo kuti batumwa ba Jesu badusigwe kuzhe kwe tjibakana, 35ngono ipapo kati ku lubazhe, “Balume be Iziraela, ibeni nge njele muna tjamunothama balume ibaba. 36Mu misi yakapinda Teudasi wakaboneka ezwidana mmwe nkulu, ngono bathu bangabe mazana manna (400) bakabhatana naye. Koga wakabulawa, bose batobeli babe bakapalala kukasala kusina tjimwe. 37Shule kwa ipapo, Judasi we Galili wakaboneka mu nsi we kubagwa kwe bathu kakwebela mbunga kunli, koga na iye wakabulawabo ngono batobeli babe bose bakapalala. 38Ndizo ngwenu ndoti kumuli, idwani mu balume ibaba. Mubasunungule! Ha tjabakalangana kene nshingo wabo udwa mu bathu unowopela, 39koga ha udwa ku Ndzimu, amungabakunde. Mungazwiwana munyanyayidza Ndzimu!”

Makulukota katobela gumbuludzo la Gamaliyele. 40Bakadanila batumwa ba Jesu mukati, bakati babaloba bakabadwa bakati basitjabe batjalebeleka nge zina la Jesu kakale, ipapo bakabasunungula. 41Batumwa ba Jesu bakadwa mu lubazhe bakashatha, ngobe Ndzimu wakawana bakafanila dziyidzigwa zina la Jesu. 42Ngono mazhuba wose bakadwilila bediya be sumikila mu Ng'umba ye Ndzimu ne mu mizi ye bathu, besumikila ndebo mbuya inoti Jesu ndiye Mesiya.

Currently Selected:

Mishingo 5: KBTP

Highlight

Copy