Mishingo 3

Nlume we tjilema epodziwa

1Kukati limwe zhuba Pita na Johani bakatathila ku Ng'umba ye Ndzimu nge tjibaka tje butatu mu matewuko, nge tjibaka tje mitembezelo. 2Pa nkoba wakabe udang'wa Nkoba Mbuya, kwakabe kuna nlume wakazwagwa ali tjilema. Zhuba limwe ne limwe wakabe esengegwa pa nkoba iwoyo kukumbila mu bathu bakabe bengina mu Ng'umba ye Ndzimu. 3Kati ebona Pita na Johani bengina mukati, kabakumbila kuti bampe tjimwe. 4Pita na Johani bakanlingisisa, ngono Pita kati kunli, “Utilinge!” 5Ndizo kabalinga, egalabgwe kuti unowowana tjimwe mubali. 6Koga Pita kati kunli, “Andina siliva kene golide, koga ndokupa tjandinatjo: Nge zina la Jesu Kirisiti we Nazareta ndokudwa nditi, milika uyende.” 7Ipapo kambhata nge luboko gugwe gwe luji kammilidza. Tjinyolotjo makumbo ne zwingoringori zwe nlume iwoyo zwikasima. 8Katjulukila pezhugwi, kama nge makumbo, ngono katangisa kuyenda. Ipapo kangina mu Ng'umba ye Ndzimu nabo, eyenda etjuluka ekudza Ndzimu. 9Bathu bose bakambona eyenda ekudza Ndzimu, 10ngono bakanziba ali nkumbili wabe egala pa Nkoba Mbuya we Ng'umba ye Ndzimu, bakatjenama bose bakakaabalila tjanshingikalila.

Thumo ya Pita mu Ng'umba ye Ndzimu

11Kukati bathu bebona nlume iwoyu akanamatilana na Pita na Johani mu Ntutshi wa Solomoni, bathu bakakaabala, ngono bakalabukila ku bali. 12Pita kati ebona bathu bakaabala saikoku, kati ku bali, “Bathu be Iziraela, ini mutjenamila ikoku? Ini makatilingisisa zwingapa tikanga tathama nge masimba edu kene nge ndulamo yedu kuti nlume iwoyu ayende? 13#Kufuluka 3:15Ndzimu wa Abhurahama, na Isaki na Jakubo, Ndzimu wa bobatategulu bedu wakakudza Nlanda wawo Jesu. Koga imwi makampa babusi kuti bambulaye, mukanzwilandula mbeli kwa Pilato, paakabe akabe akumbula kunsunungula. 14#Matewu 27:15-23; Mako 15:6-14; Luke 23:13-23; Johani 19:12-15Makanzwilandula N'yengemali ne nlulwami, ngono mu bumo gugwe makakumbila Pilato kumusunungulila mbulayi. 15Makabulaya iye unopa butjilo, iye wakamusiwa nge Ndzimu mu bafi, ndizo iswi ti batendeki ba ikoku. 16I simba lile lapa nlume iwoyu we tjilema kusima. Tjamunobona kakale mutjiziba tjishingwa nge kugalamoyo mu zina lile; hwugalamoyo muna Jesu kwampodza, sekwa munobona mose.

17“Ndizo ngwenu zwikamu, ndoziba kuti tjamakathama kuna Jesu imwi ne batungamili benyu kwakabe kuyikhwa nge kusaziba. 18Koga Ndzimu tjawakaleba nge balebesambeli bose ntolo kuti Mesiya unowodziyila, wakathama kuti kuzhadzisike nge zila iyeyi. 19Shandukani mubgwilile ku Ndzimu, ndizo matjinyo enyu abukushiwe, kuti ndizo umupe kunyaluluka mbeli kwa She, 20nenge kuti utume Mesiya wamakashaluligwa, iye Jesu. 21Wakafanila gala kudzimu kudzina nsi uzha we kuti zwithu zose zwibuzigwe mu mbumbiko yazo yakale sekwa kaleba Ndzimu nge balebesambeli bawo bakayengemala ba ntolo. 22#Matama 18:15, 18Mushe wakati, ‘She Ndzimu wenyu banowomuzhisila nlebesambeli, koga sekwa bakandizhisa, ngono unowodwa mu ludzi gwenyu. Muteedze tjimwe ne tjimwe tjaanowomubudza. 23#Matama 18:19Mmwe ne mmwe usingahwe nlebesambeli iwoyu unowothubugwa muna bakanyi kwabo.’ 24Balebesambeli bose bakalebelambeli kudwa muna Samuele na ibabo bakazha shule kukwe bakalebelambelibo ngekwe mazhuba ano. 25#Kutangisa 22:18Mu bakololo be balebesambeli nebe tjidumano Ndzimu tjawakathama na bobatategulu benyu, udwa Abhurahama uti, ‘Njudzi dzose dze shango dzowokombolegwa nge mbewu iyo.’ 26Ngono Ndzimu wakashalula Nlanda wawo ukantuma kumuli kutanga, kumukombolela nge kushandusa mmwe ne mmwe wenyu mu bubi.”

Currently Selected:

Mishingo 3: KBTP

Highlight

Copy