2 Pita 3

Zhuba la She

1Badiwa, ogu lukwalo gwe bubili gwanda mu kwalila, mu hwalo idzedzi dzandakamukwalila ndakagwisa kumukumbuludza kuti ndimuse njalakang'wa dzenyu mbuyanana. 2Kuti mualakane matama akalebgwa ntolo nge balebesambeli bakayengemala nenge ndayo yakadwa kuna She kakale ali Ntjidzi, yakazha nge batumwa babe kumuli. 3#Judi 1:18Tje kutanga makafanila hwisisa kuti mu mazhuba e bupelo badadi banowozha bedada kakale bakasala shule njemulo dzabo dzakabipa, 4bemudwa beti, “Wakamugadzabgwe kuti unowozha, ngono ungayi? Botate bedu tjinga kwabakafa, tjimwe ne tjimwe tjigele sekwa tjakabe tjili itjo kudwa ku budwilo gwe shango.” 5#Kutangisa 1:6-9Banokangang'wa mwaza kuti, ntolo kwazo Ndzimu wakadusa dama, ngono kudzimu kukabumbika. Shango yakabumbiwa kudwa mu vula, ibumbiwa nge vula, 6#Kutangisa 7:11ngono ndinge vula ye nkubila yakanyeledza ikalobesa shango ye kutanga. 7Nge dama ilelo zwalo, kudzimu kwa ngwenu ne shango ya ngwenu zwakabiganyidzigwa moto. Zwakabiganyidziwa kuswikila zhuba le kusumikilisiwa nenge kulobesiwa kwe basinga tjile nge kunoshakwa nge Ndzimu.

8 # Njimbo 90:4 Koga musitongo kangang'wa tjing'ompela etji, badiwa! Kuna She zhuba ling'ompela lofanana ne makole ali tjiwulu (1 000), na iwo makole ali tjiwulu anofanana ne zhuba ling'ompela. 9She abatononoka mu kushinga tjabakagadzabgwe se kunokumbula bamwe. Koga bana moyonlefu nge kwenyu, ngoti abatoshaka kuti kube ne mmwe unolobesiwa, koga banoyemula kuti bose bashanduke mu matjinyo abo.

10 # Matewu 24:43; Luke 12:39; 1 Batesalonika 5:2; Zumbunulo 16:15 Koga zhuba la She lowozha se mbava, ngono zhuzhugwi kowonyelela nge zhoba hwulu ne lubumbo gose gwe zhuzhugwi gowokolomodziwa nge moto, ngono ne shango ne tjimwe ne tjimwe tjimuili tjowopisiwa. 11Ngono se zwithu zose izwezwi zowonyeledziwa nge zila yakajali, imwi makafanila mube bathu bakatini? Makafanila tjila butjilo gwe buyengemali ne bundzimu, 12makalindila zhuba le Ndzimu kakale muthama kuti lizhe tjinyolotjo. Zhuba ilelo linowothama kuti zhuzhugwi kupisiwe kakale kunyeledziwe nenge lubumbo gose gwe zhuzhugwi gukolomodziwe nge moto. 13#Isaya 65:17; 66:22; Zumbunulo 21:1Koga ngekwe kugadzabgwe kukwe takamilila kudzimu kutshwa ne shango tshwa, iko kunowobe kuli nzi we ndulamo.

14Ndizo badiwa, muti se makamilila zhuba ilelo, tukutililani kuti muwang'we muna kunyalala musina tjibadzi tje bubi. 15Zibani kuti bumoyonlefu gwa She i jidzo koga sekwa makakwaligwa ndi Paulo, ikamu tjedu tjinodika, eshingisa butjenjedu gwaakapiwa, 16eleba sa ikoku mu hwalo dzose dzaanokwala ngekwako. Kuna zwithu zwakasima kuhwisisika, mu hwalo dzidze zwinoyita kuti bathu basina luzibo ne bana njalakang'wa dzisakagadzikana bakazwitjenesa, nge zila ipoga sekwa banothama nge hwalo dzimwe dze Ndzimu ngono bakaloba.

17Koga imwi badiwa, moziba kale ikoku. Muzwitjengete kuti ndizo musitongokwebegwa mu zila ye jinyo, ye bathu basina nlayo mudwa muletja kugadzikana kwenyu. 18Koga kulani mu ngoni ne mu luzibo gwa She wedu Ntjidzi Jesu Kirisiti. Ngaakudziwe ngwenu nenge kusingapele! Ngakujalo.

Currently Selected:

2 Pita 3: KBTP

Highlight

Copy