SALMOS 10
10
I jisʌntel jontolo' bʌ
1C Yum, ¿chucoch ma'anic ma' p'ison ti a wenta?
¿Chucoch wola' mʌy a wut che' ti' yorajlel wocol?
2Chan mi' melob i bʌ jini jontolo' bʌ. Mi' tic'lanob jini p'ump'un bʌ.
La' to cha' wʌlʌc chujquicob ti jini jach bʌ i maña tsa' bʌ i ña'tayob i mel.
3Jini jontol bʌ mi' chañ'esan i bʌ che' an chuqui yom ti' pusic'al.
Jini xujch' mi' cha'len p'ajoñel, mi' ts'a'len Dios.
4Jini jontol bʌ ma'anic mi' sʌclan Dios come mi' chañ'esan i bʌ,
Mi' lon al ti' pusic'al ma'anic Dios.
5Mi' chʌn xoy i bijlel bajche' jach yom i pusic'al.
Ma'anic mi' wis c'otel ti' pusic'al bajche' mi cajel a mel.
Mi' tse'tan i contrajob.
6Mi' yʌl ti' pusic'al: Ma'anic mi caj c mel c pusic'al.
Ti pejtelel ora ma'anic mi caj cubin wocol, lon che'en.
7But'ul i yej ti p'ajoñel yic'ot lot, yic'ot jontolil.
Che' mi' cha'len t'an an i maña. Yomix i tech mulil.
8Yujil i chijtan winicob.
Mi' mucul tsʌnsan jini mach bʌ anic i mul.
Mi' chijtan jini p'ump'un bʌ.
9Mi' muc i bʌ che' bajche' bajlum ti' ch'en cha'an mi' cha'len chijt.
Mi' chijtan jini p'ump'un bʌ cha'an mi' chuque'.
Mi' chuc jini p'ump'un bʌ che' bajche' ti yac.
10Tembil jini p'ump'un bʌ, mi' yajlel.
Mi' mʌjlel i cha'an jini jontol bʌ.
11Mi' lon al ti' pusic'al: Tsa'ix ñajiyi ti' pusic'al Dios, woli' mʌy i wut.
Ma'anic mi caj i wis q'uel ti pejtelel ora, che'en.
12C Yum, yom ma' wa'tʌl. Dios, pʌsʌ a p'ʌtʌlel.
Mach yomic mi' ñajiyel ti a pusic'al jini p'ump'un bʌ.
13¿Chucoch mi' ts'a'len Dios jini jontol bʌ?
¿Chucoch mi' lon al jini jontol bʌ ti' pusic'al: Ma'anic mi caj i melon Dios? che'en.
14Tsa'ix a q'uele, come ma' wotsan ti a pusic'al jini wocol yic'ot c'oj'ol cha'an ma' q'uextan.
Jini p'ump'un bʌ mi yʌc' i bʌ ti a wenta.
Xcoltayajet i cha'an meba' alʌlob.
15C'ʌsben i c'ʌb jini jontol bʌ.
Laj tsictesan i mul xjontolil. Mach ma' wis ñusʌben i mul.
16Lac Yum Reyʌch ti pejtelel ora.
Jini mach bʌ i cha'añobic Dios mi caj i laj jilelob ti' lumal lac Yum.
17C Yum, tsa'ix a wubi chuqui yom jini uts bʌ.
Wola' xuc'chocoben i pusic'al. Wola' wen ubiben i t'an.
18Toj mi caj a mel jini meba' alʌlob yic'ot jini tic'lʌbilo' bʌ
Cha'an ma'anix majch mi' chʌn mejlel i bʌc'tesañob ti pañimil.
Currently Selected:
SALMOS 10: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.