JOSUE 13
13
Jini tejclum tac maxto bʌ anic tsi' ch'ʌmʌyob jini israelob
1Ti jimbʌ ora anix i jabilel Josué. Lac Yum tsi' sube: Anix a jabilel. An to cabʌl lum maxto bʌ anic tsi' ch'ʌmʌyob ti' wenta jini israelob. 2Maxto ch'ʌmbilic i cha'añob: pejtelel i lum filisteojob, pejtelel i lum gesureojob, 3am bʌ ti Sihor, am bʌ ti' tojel Egipto ba' mi' pasel q'uin, c'ʌlʌl ti' cayajon Ecrón am bʌ ti norte. Jiñʌch i lumal cananeojob. An jo'tiquil i yumob filisteojob, jini año' bʌ ti Gaza, Asdot, Ascalón, Gat, yic'ot Ecrón, yic'ot pejtelel i lum aveojob am bʌ ti sur. 4Pejtelel i lum jini cananeojob ya' ti joctʌl tac i cha'añʌch jini sidoniojob c'ʌlʌl ti Afec, c'ʌlʌl ti cayajon cha'an jini amorreojob. 5I lum jini giblajob, pejtelel jini Líbano am bʌ ti pasibal q'uin ti Baalgad am bʌ ti yentʌlal jini wits i c'aba' Hermón c'ʌlʌl ti yochib Hamat. 6Mi caj c choc loq'uel pejtelel jini ya' bʌ chumulob ti wits tac ba'an jini Líbano c'ʌlʌl ti Misrefotmaim yic'otob pejtelel jini sidoniojob. Yom ma' wʌq'ueñob israelob jini lum che' bajche' tsa cʌq'ueyet mandar. 7T'oxbeñob jini lum jini bolonmojt israelob yic'ot lamital i p'olbal Manasés i pi'ʌl bʌ Efraín.
Jini lum tsa' bʌ aq'uentiyob Manasés, Rubén, yic'ot Gad
8Come i p'olbal Manasés yic'ot rubeñob yic'ot jini gadob tsa'ix i ch'ʌmbeyob i lum tsa' bʌ aq'uentiyob cha'an Moisés ya' ti junwejl Jordán ja' ba' mi' pasel q'uin. Come che'ʌch tsi' yʌq'ueyob Moisés i winic lac Yum. 9Ya' jaxʌl i cayajon ti Aroer ba' mi' ñumel jini ja' i c'aba' Arnón yic'ot ti jini tejclum am bʌ ti ojlil jini joctʌl yic'ot pejtelel jini joctʌl ti yojlil Medeba yic'ot Dibón. 10Tsa' aq'uentiyob ja'el pejtelel i tejclum tac Sehón i yum amorreojob tsa' bʌ i cha'le yumʌl ti Hesbón, c'ʌlʌl ti' cayajon amoñob. 11Tsa' aq'uentiyob jini Galaad, yic'ot i lum gesureojob, yic'ot i lum maacateojob, yic'ot pejtelel jini wits Hermón, yic'ot pejtelel Basán c'ʌlʌl ti Salca, 12yic'ot pejtelel i lumal Og ya' ti Basán, ya' ba' tsi' cha'le yumʌl ti Astarot yic'ot ti Edrei. Jini jach Og tsa' cʌle ti' tojlel i pi'ʌlob jini refaíjob. Moisés tsa' mʌjli i cha'an. Tsi' laj chocoyob loq'uel. 13Pero jini israelob ma'anic tsi' chocoyob loq'uel jini gesureojob yic'ot jini maacateojob. C'ʌlʌl wʌ'to añob yic'ot jini israelob wʌle.
Tsa' t'oxbentiyob jini lum
14Ma'anic tsa' aq'uenti lum i p'olbal Leví. Jini majtañʌl mu' bʌ i yʌq'uentel lac Yum i Dios Israel i cha'añʌch Leví che' bajche' tsi' subeyob lac Yum. 15Moisés tsi' yʌq'ueyob i lum i p'olbal Rubén che' bajche' c'amel jini otot tac. 16Tsa' aq'uentiyob jini rubeñob jini lum: Jini am bʌ ti Aroer am bʌ ti ti' ja' i c'aba' Arnón, yic'ot jini tejclum am bʌ ti ojlil jini joctʌl yic'ot pejtelel jini joctʌl ti junwejl Medeba c'ʌlʌl ti Hesbón. 17Yic'ot pejtelel tejclum tac am bʌ ti joctʌl: Dibón, Bamot Baal, Betbaalmeón, 18Jahaza, Cademot, Mefaat, 19Quiriataim, Sibma, Zaretsahar am bʌ ti bujtʌl ti ojlil jini joctʌl, 20Betpeor, jini wits i c'aba' Pisga, Betjesimot, 21pejtelel jini tejclum tac am bʌ ti joctʌl, pejtelel jini lum i cha'an Sehón i yum amorreojob tsa' bʌ i cha'le yumʌl ti Hesbón. Moisés tsi' tsʌnsa Sehón yic'ot ja'el jini yumʌlob ti Madián, Evi, Requem, Zur, Hur, Reba. Jiñʌch yumʌlob ti' tojlel Sehón chumulo' bʌ ti lum. 22Jini israelob tsi' tsʌnsayob ja'el Balaam jini yujil bʌ wujt, i yalobil Beor. Tsi' tsʌnsayob yaño' bʌ ja'el. 23Ya' jaxʌl i lumob jini rubeñob ti Jordán ja'. Pejtelel ili tejclum tac yic'ot xchumtʌl tac i cha'añʌch jini rubeñob che' bajche' c'amel i yotot tac.
24Moisés tsi' yʌq'ueyob i lum i p'olbal Gad che' bajche' i yonlel jini otot tac. Jiñʌch i lum: 25Jazer yic'ot pejtelel i tejclum tac Galaad, ojlil jini lum i cha'an amoñob c'ʌlʌl ti Aroer ya' ti' tojel Rabá, 26ti Hesbón c'ʌlʌl ti Ramat Mizpa yic'ot Betonim, ti Mahanaim c'ʌlʌl ti' cayajon i lum Debir, 27jini Betaram Betnimra yic'ot Sucot yic'ot Zafón am bʌ ti joctʌl. Jiñʌch i yumʌntel Sehón tsa' bʌ i cha'le yumʌl ti Hesbón. Ya' jaxʌl ti Jordán ja' c'ʌlʌl ti ñajb i c'aba' Cineret ti' tojel Jordán ba' mi' pasel q'uin. 28Pejtelel ili tejclum tac yic'ot xchumtʌl tac i cha'añʌch jini gadob che' bajche' c'amel i yotot tac.
29Moisés tsi' yʌq'ueyob i lum i p'olbalob Manasés, i pi'ʌl bʌ Efraín, che' bajche' c'amel i yotot tac. Jiñʌch i lum: 30Mahanaim yic'ot pejtelel Basán, pejtelel i lum Og jini yumʌl ti Basán, pejtelel jini xchumtʌl tac am bʌ ti Jair ya' ti Basán, an uxc'al xchumtʌl tac. 31Ojlil jini Galaad, yic'ot Astarot yic'ot Edrei, jiñʌch i tejclum tac Og, yumʌl ti Basán. Tsa' aq'uentiyob lamital i yalobilob Maquir (i yalobil bʌ Manasés) che' bajche' c'amel i yotot tac. 32Moisés tsi' t'oxbeyob jini lum jini uxmojt israelob yic'ot lamital i p'olbal Manasés. An tac ti joctʌl i c'aba' Moab, ti' tojel Jordán ja' ba' mi' pasel q'uin. 33Pero ma'anic tsi' yʌq'ue i lum i p'olbal Leví, come lac Yum i Dios Israel i cha'anʌch Leví che' bajche' tsi' yʌlʌ. Jini mi caj i coltañob.
Currently Selected:
JOSUE 13: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
