EXODO 5

Moisés yic'ot Aarón ti' tojlel Faraón

1Moisés yic'ot Aarón tsa' majliyob ba'an Faraón. Tsi' subeyob: Lac Yum i Dios Israel tsi' pejcayon lojon. Tsi' yʌlʌ: “La' majlicob c tejclumob cha'an mi' melbeñoñob q'uin ya' ti colem bʌ i tiquiñal pañimil”. Che' woli' yʌl lac Yum, i Dios Israel, che'ob. 2Faraón tsi' c'ajtibeyob: ¿Majqui la' Yum? ¿Chucoch mic lon ñopben i t'an cha'an mic chocob majlel? Mach cʌmbilic c cha'an la' Yum. Ma'anic mi caj c choc majlel jini israelob, che'en. 3Tsi' yʌlʌyob: I Dios hebreojob tsi' pejcayon lojon. Jini cha'an wersa mic majlel lojon uxp'ejl q'uin xʌmbal ya' ti colem bʌ i tiquiñal lum. Mi caj cʌq'uen lojon tsʌnsʌbil bʌ i majtan c Yum Dios, ame i tsʌnsañon lojon ti c'amʌjel yic'ot ti guerra, che'ob.

4I rey egiptojob tsi' mich'leyob Moisés yic'ot Aarón. Tsi' subeyob: ¿Chucoch mi la' mʌctʌbeñob i ye'tel winicob? Cucula ti la' we'tel. 5Cabʌlʌchix la' pi'ʌlob tic lumal. La' womix la' tic'ob cha'an ma'anix mi' chʌn melob i ye'tel, che'en Faraón.

6Ti jini jach bʌ q'uin Faraón tsi' yʌq'ueyob mandar jini mayordomojob yic'ot caporalob: 7Ma'anix mi caj la' wʌq'ueñob jam jini x'e'telob woli bʌ i melob ladrillo. La' i bajñel tempañob tilel jam. 8Pero wersa lajal mi' caj i melob i yonlel i tsicol ladrillo che' bajche' ti yambʌ ora. Mach mi' cʌyob i mel ti ts'ʌcʌl. Cha'an ts'ubob jini cha'an woli' yʌlob: “La' majlicon lojon cha'an mi cʌq'uen lojon tsʌnsʌbil bʌ i majtan Dios”, che'ob. 9Aq'ueñob tsʌts bʌ e'tel jini winicob cha'an mi' bʌx'añob ti' ye'tel cha'an ma'anic mi' jac'ob lot, che'en.

10Che' jini, jini mayordomojob yic'ot caporalob tsa' majli i subeñob x'e'telob: Faraón tsi' yʌlʌ: “Ma'anix mi caj la' wʌq'uentel jam. 11Cucula. Bajñel sʌclanla jam baqui jach mi la' taje', pero ts'ʌcʌl mi caj la' mel ladrillo che' bajche' ti yambʌ ora”, che'ob. 12Jini cha'an tsa' pam pujquiyob majlel winicob ti pejtelel i lumal Egipto cha'an mi' tempañob tilel tiquin jam. 13Tsʌts tsi' pejcayob jini mayordomojob: Ts'ʌcʌl yom mi la' mel ladrillo tac ti jujump'ejl q'uin che' bajche' ti yambʌ ora anquese ma'anic jam, che'ob. 14Jini mayordomojob i cha'an bʌ Faraón tsi' bajbeyob jini caporalob año' bʌ i ye'tel ti' tojlel israelob. Tsi' c'ajtibeyob: ¿Chucoch mach ts'ʌcʌlic mi la' mel ladrillo che' bajche' ti yambʌ ora? che'ob.

15Jini caporalob tsa' majli i pejcañob Faraón ti wocol t'an. Tsi' yʌlʌyob: ¿Chucoch tsʌts ma' tic'lan a winicob? 16Ma'anix woli' yʌq'uentelob jam jini x'e'telob. Pero jini mayordomojob mi' chʌn subeñob cha'an mi' chʌn melob. Awilan woli' jats'ob jini x'e'telob, pero mach i mulic. Jontolob jini mayordomojob. Che' tsi' yʌlʌyob jini caporalob. 17Faraón tsi' subeyob: Wen ts'ubetla. Jini cha'an woli la' wersa ña'tan majlel cha'an mi la' tsʌnsʌben i majtan la' Yum. 18Cucula ti la' we'tel come ma'anic mi caj la' wʌq'uentel jam, pero wersa mi caj la' mel ti ts'ʌcʌl jini ladrillo, che'en Faraón. 19Jini caporalob cha'an israelob tsi' p'isiyob ti wenta cabʌl jax i wocol cha'an tsa' subentiyob wersa mi caj i melob i yonlel i tsicol ladrillo che' bajche' ti yambʌ ora. 20Che' bʌ tsa' loq'uiyob ba'an Faraón, tsi' tajayob Moisés yic'ot Aarón woli bʌ i pijtañob. 21Mich'ob jini caporalob. Tsi' yʌlʌyob: La' i meletla lac Yum come tsa'ix la' wʌc'ʌyon lojon ti ts'a'lentel ti' tojlel Faraón yic'ot ti' tojlel c pi'ʌlob lojon. Tsa'ix a techbe i mich'ajel Faraón cha'an mi' tsʌnsañon lojon, che'ob.

Lac Yum tsi' yʌq'ue i ye'tel Moisés yic'ot Aarón

22Jini cha'an Moisés tsa' caji' pejcan lac Yum: C Yum, C Yum, ¿chucoch tsa' wʌc'ʌ ti tic'lʌntel a winicob? ¿Chucoch tsa' chocoyon tilel? 23C'ʌlʌl che' bʌ tsa' caji c pejcan Faraón c'ʌlʌl wʌle, ma'anic tsa' coltayob che' bajche' tsa' subeyon, che'en Moisés.

Currently Selected:

EXODO 5: ctuBI

Highlight

Copy