EXODO 34

Lac Yum tsi' cha' subu jini trato bʌ t'an

(Dt. 10.1-5)

1Lac Yum tsi' sube Moisés: Pajlin cha'q'uejl xajlel lajal bajche' ti ñaxan, cha'an mic ts'ijban ya' ti xajlel jini t'an am bʌ ti ñaxan tsa' bʌ a top'o. 2Chajpan a bʌ, chejini, cha'an ijc'ʌl ma' letsel ya' ti wits i c'aba' Sinaí. Yom ma' c'otel tic tojlel ya' ti' pam jini wits. 3Mach yomic mi' letsel yambʌ winic a wic'ot. Ma'anic majch yom mi' c'otel ya' ti wits, mi tiñʌme'ic, mi wacaxic. Mach yomic mi' cha'leñob xʌmbal ya' ti wits, che'en.

4Moisés tsi' chajpa jini cha'q'uejl xajlel lajal bajche' jini ñaxan bʌ tsa' bʌ i top'o. Tsa' ch'ojyi ti sʌc'ajel. Tsa' letsi ya' ti wits i c'aba' Sinaí che' bajche' tsi' sube lac Yum. Tsi' ch'ʌmʌ majlel ti' c'ʌb jini cha'q'uejl xajlel. 5Lac Yum tsa' jubi tilel ti Tocal. Tsa' ajni ya'i yic'ot Moisés. Lac Yum tsi' yʌlʌ: Joñon Diosoñʌch, Yumʌloñʌch mu' bʌ c cha'len p'untaya, che'en. 6Tsa' c'axi lac Yum ti' tojlel Moisés. Tsi' subu: Joñon Yumaloñʌch, a Yumon, a Dioson, cujil p'untaya, utson, jal mic mich'an, cabʌl mic p'untañob, xuc'ulon. 7Mic p'untan cabʌlob, mic ñusan mulil, yic'ot i ñusʌntel mandar, yic'ot jontolil, pero ma'anic mic ñusʌben i mul jini mu' bʌ i chʌn cha'len mulil cha'an i tsʌtslel i pusic'al. Mi cʌq'ueñob i tojob i mul tatʌlob, yic'ot i yalobilob, yic'ot i butsob, c'ʌlʌl ti' yuxlajmlel yic'ot i chʌnlajmlel i p'olbalob. Che' tsi' yʌlʌ lac Yum Dios.

8Che' jini Moisés ti ora jach tsi' ju'sa i jol ti lum. Tsi' ch'ujutesa lac Yum. 9Tsi' yʌlʌ Moisés: Mi tsa'ix c taja i yutslel a pusic'al, c Yum, yom ma' majlel tic tojlel lojon, come wen tsʌtsob i pusic'al jini tejclum. Ñusʌbeñon lojon contolil yic'ot pejtelel c mul lojon. Ch'ʌmʌyon lojon che' bajche' a cha'an bʌ, che'en.

Lac Yum tis' cha' aq'ueyob i t'an

(Dt. 7.1-5)

10Lac Yum tsi' jac'ʌ: Joñon mi caj c sub xuc'ul bʌ t'an ti' tojlelob pejtelel winicob x'ixicob. Mi caj c mel bʌbʌq'uen tac bʌ, mach bʌ anic ba' ujtem ti yan tac bʌ pañimil mi ti yan tac bʌ lum. Pejtelel jini winicob baqui añet mi caj i q'uel c ñuclel, come wen bʌbʌq'uen mu' bʌ caj c pʌs ti a tojlel. 11Lotola mu' bʌ c subeñetla wʌle. Yom mi la' ña'tan mi caj c choc loq'uel ti la' tojlel jini amorreojob, yic'ot cananeojob, heteojob, ferezeojob, yic'ot heveojob, yic'ot jini jebuseojob. 12Jini cha'an tsajin la' bʌ cha'an ma'anic mi la' laj la' t'an yic'ot jini winicob ba' mi caj la' c'otel cha'an ma'anic mi la' tsajcʌbeñob i melbalob. 13Mi caj la' jembeñob i pulʌntib i majtan i diosob. Mi caj la' c'ʌsbeñob i dios tacob. Mi caj la' tsepbeñob jini ch'ujul tac bʌ i te'ob. 14Mach comic mi caj la' ch'ujutesan yambʌ dios, come mic mich'leñetla che' mi la' ch'ujutesan. Joñon jach yom mi la' ch'ujutesañon. 15Jini cha'an mach yomic mi la' laj la' t'an yic'ot jini año' bʌ ya' ti tejclum tac, come an cabʌlob ya'i mach bʌ anic mi' ñopoñob, mu' bʌ i ch'ujutesañob i diosob melbil tac bʌ. Mi caj i yʌq'ueñob i majtan i diosob. Mi caj i pʌyetla majlel cha'an mi la' c'uxben i we'el aq'uebilix bʌ i cha'an i diosob. 16Mach yomic mi la' c'ajtiñob xch'octaco' bʌ i yalobilob cha'an i yijñam la' walobilob che' mi' ch'ujutesañob i diosob, ame i xic'ob la' walobilob i cʌyoñob ja'el cha'an mi' ch'ujutesañob i diosob. 17Mach yomic mi la' mel yan tac bʌ dios.

Q'uin mu' bʌ i melob ti jujump'ejl jab

(Éx. 23.14-19; Dt. 16.1-17)

18Yom mi la' ña'tan la' melben i q'uiñilel waj mach bʌ anic i levadurajlel. Wucp'ejl q'uin yom mi la' c'ux waj mach bʌ anic i levadurajlel. Yom ti' yorajlel che' bajche' ña'tʌbil ti' yuwilel, jiñʌch che' ti marzo che' bajche' tsac subeyet, come jiñʌch jini uw che' tsa' loq'uiyetla ti Egipto. 19Pejtelel jini ñaxan bʌ mi' yilan pañimil c cha'añʌch yic'ot ñaxan bʌ i yal la' wacax yic'ot la' tiñʌme', pero yom i tat bʌ. 20Jini ñaxan bʌ i yal la' burro yom mi la' q'uex yic'ot tiñʌme'. Mi ma'anic mi la' q'uex, yom mi la' tsep ti' pat i bic'. Pejtelel ñaxan bʌ la' walobil yom mi la' q'uex yic'ot tiñʌme'. Mi juntiquilic com mi' tilel ba' añon che' jochol i c'ʌb.

21Wʌcp'ejl q'uin yom mi la' cha'len e'tel. Ti' wucp'ejlel q'uin yom mi la' c'aj la' wo yic'ot che' ti yorajlel mi la' top' lum, yic'ot ti yorajlel la' c'ajbal. 22Yom mi la' melben i q'uiñilel semana tac, yic'ot ñaxan tac bʌ i wut la' trigo mu' bʌ la' tuc', yic'ot i q'uiñilel la' c'ajbal ti tsijib jabil tac. 23Uxyajl ti jujump'ejl jab yom mi' tilel ba' añon pejtelel winicob la' cha'an. 24Come joñon mi caj c choc loq'uel jini tejclum am bʌ' ti' tojel la' wut. Mi caj c ñuq'uesan la' lum. Ma'anic majch mi caj i chilbeñetla che' uxyajl mi caj la' c'otel ti cotot. Joñon la' Yumon la' Dioson.

25Che' mi la' wʌq'ueñon tsʌnsʌbil bʌ c majtan yic'ot i ñujp, mach yomic levadura. Mach yomic mi la' cʌyben i colojbal cha'an ti yijc'ʌlal, che' ti yorajlel jini q'uin cha'an Pascua. 26Pejtelel ñaxan bʌ i wut la' pʌc'ʌb ya' ti la' lum yom mi la' ch'ʌm majlel ya' ti Tabernáculo. Joñon la' Yumon la' Dioson. Mach yomic mi la' ch'ʌx jini alʌ chivo ti jini jach bʌ i ya'lel i chu' i ña', che'en.

Tsa' ts'ijbunti mandar ti wechel bʌ xajlel

27Lac Yum tsi' sube Moisés: Ts'ijban jatet ili t'an, come jiñʌch xuc'ul bʌ c t'an mu' bʌ cʌq'ueñet yic'ot israelob. 28Ya'i tsa' ajni Moisés yic'ot lac Yum cha'c'al q'uin yic'ot cha'c'al ac'ʌlel. Ma'anic tsi' c'uxu waj, mi tsa'ic i japʌ ja'. Ya'i tsi' ts'ijba jini xajlel tac jini xuc'ul bʌ t'an. Jiñʌch lujump'ejl mandar.

29Baqui ora Moisés tsa' jubi yic'ot jini cha'q'uejl xajlel ti' c'ʌb, che' woli to i jubel ya' ti wits, mach yujilic mi wen sʌcleman pejtelel i wut, come tsi' cha'le t'an yic'ot Dios. 30Aarón yic'ot pejtelel israelob tsi' q'ueleyob Moisés. Wen sʌcleman i wut. Tsi' cha'leyob bʌq'uen cha'an mi' lʌc'tesañob i bʌ yic'ot. 31Jini Moisés tsi' pʌyʌyob. Aarón yic'ot jini ñuc taco' bʌ i ye'tel ya' ti lum tsa' tiliyob. Moisés tsa' caji i pejcañob. 32Ti wi'il pejtelel jini winicob x'ixicob tsa' c'otiyob ba'an Moisés. Moisés tsi' yʌq'ueyob jini mandar tac tsa' bʌ aq'uenti cha'an lac Yum ya' ti wits.

33Che' bʌ Moisés tsa' ujti i pejcañob jini winicob x'ixicob, tsi' mosoyob i wut ti pisil. 34Baqui ora mi' majlel Moisés ya' ti Tabernáculo cha'an mi' pejcan lac Yum mi' loc'san jini pisil jinto che' mi' loq'uel. Che' jini mi' subeñob jini winicob x'ixicob jini cʌntesa tsa' bʌ aq'uenti cha'an Dios. 35Jini winicob x'ixicob mi' q'uelob sʌcleman i wut jini Moisés. Wi'il mi' cha' mos i wut che' mi' loq'uel ya' ti Tabernáculo jinto mi' cha' ochel i pejcan Dios mi' cha' jame'.

Currently Selected:

EXODO 34: ctuBI

Highlight

Copy