2 SAMUEL 8
8
Tsa' mʌjli i cha'an David ti' tojlel i contrajob
(1 Cr. 18.1-13)
1David tsi' c'unte' jisa jini filisteojob. Tsa' wen mʌjli i cha'an. Tsi' ch'ʌmʌ Metegama, jini colem tejclum am bʌ ti' wenta filisteojob. 2Tsi' jisa Moab. Tsi' subeyob ñoltʌl ti lum. Che' tsololob, tsi' p'isiyob ti lazo. Ti' cha'p'islel tsa' tsʌnsʌntiyob. Jump'is tsa' coli. Ma'anic tsa' tsʌnsʌntiyob, pero tsa' ochiyob ti' winic David. Tsa' caji i yʌc'ob i tojoñel ti jujump'ejl jab. 3David tsi' jisa ja'el Hadadezer i yalobil Rehob, jini rey ti Soba, che' bʌ tsa' caji i ch'ejl'esan i bʌ ya' ti colem ja' Eufrates. 4David tsi' chilbeyob chʌmbajc' yic'ot jo'c'al (1,700) winicob c'ʌchʌlo' bʌ ti caballo, yic'ot junc'al mil (20,000) winicob woliyo' bʌ ti xʌmbal ti' yoc. David tsi' tsepbe i chijil i ya' jini caballo tac woli bʌ i tujc'an majlel jini carreta. Tsa' jax i cʌyʌ jo'c'al cha'an mi' tujc'an majlel carreta. 5Jini siriajob año' bʌ ti Damasco tsa' tili i coltañob Hadadezer jini rey ti Soba. David tsi' jisayob ja'el che' bajche' cha'p'ejl i cha'c'al mil (22,000) winicob. 6Che' jini David tsi' wa'choco xcʌntayajob ya' ti Damasco ti' tojlel jini siriajob cha'an mi' yotsañob ti' winic David, cha'an mi' yʌq'ueñob i tojoñel. Awilan lac Yum tsi' wen colta David baqui jach tsa' ñumi. 7David tsi' ch'ʌmʌ jini mʌctijib melbil bʌ ti oro tsa' bʌ i c'ʌñʌyob i winicob Hadadezer. Tsi' ch'ʌmʌ tilel ti Jerusalén, 8yic'ot ja'el cabʌl bronce tsa' bʌ i chilbeyob jini año' bʌ ti Beta yic'ot ti Berotai, i tejclum Hadadezer.
9Tsi' yubi Toi, jini rey am bʌ ti Hamat, laj jisʌbilob i soldadojob Hadadezer ti' wenta David. 10Jini cha'an Toi tsi' choco majlel i yalobil Joram ba'an jini rey David cha'an mi' yʌq'uen cortesía ti' ñʌch'tʌlel i pusic'al yic'ot i yutslel i t'an, cha'an tsa' mʌjli i cha'an ti guerra ti' contra Hadadezer. Come ti jim bʌ ora i contrajob i bʌ Toi yic'ot Hadadezer. Che' jini Joram tsi' ch'ʌmʌ majlel oro, yic'ot plata, yic'ot bronce cha'an mi' yʌq'uen David. 11-12David tsi' yʌq'ue lac Yum pejtelel chuqui tac tsi' taja ti guerra, yic'ot jini oro yic'ot tsucu taq'uin tsa' bʌ i ch'ʌmʌ ti' tojlel jini siriajob, yic'ot jini moabob, yic'ot jini amoñob, yic'ot jini filisteojob, yic'ot jini amalecob, yic'ot ti' tojlel jini Hadadezer, i yalobil Rehob jini rey am bʌ ti Soba. 13Che'i tsi' wen taja i ñuclel David. Tsi' jisa waxʌclujump'ejl mil (18,000) ch'oyolo' bʌ ti Edom ya' ti joctʌl i c'aba' Ats'am. 14Tsi' wa'choco xcʌntayajob ya' ti Edom ti' joytʌlel jini tejclum tac. Che' jini tsa' ochiyob jini edomob ti' winic David. Lac Yum tsi' wen colta David baqui jach tsa' ñumi.
X'e'telob i cha'an David
(2 S. 20.23-26; 1 Cr. 18.14-17)
15David tsi' cha'le yumʌl ti' tojlel pejtel Israel. Tsi' cha'le toj bʌ meloñel. 16Joab (i yalobil Sarvia) tsa' ochi ti yumʌl ti' tojlel soldadojob. Josafat (i yalobil Ahilud) tsa' ochi ti secretario. 17Sadoc (i yalobil Ahitob) yic'ot Ahimelec (i yalobil Abiatar) tsa' ochiyob ti motomaj. Seraías tsa' ochi ti sts'ijbujel. 18Benaía (i yalobil Joiada) tsa' ochi ti' yum jini cereteojob yic'ot jini peleteojob. I yalobilob David tsa' ochiyob ti xcʌntaya ti' wenta Benaía.
Currently Selected:
2 SAMUEL 8: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.
