2 CRONICAS 3
3
Salomón mi' wa'chocon jini Templo
(1 R. 6.1-38)
1Che' lu' chajpʌbilix, Salomón tsa' caji i tech i wa'chocontel i yotot lac Yum ya' ti wits i c'aba' Moríah am bʌ ti Jerusalén. Jiñʌch i patiojlel Ornán jini jebuseo, ba' tsi' jats'ʌ trigo, ya' ba' lac Yum tsi' pʌsbe i bʌ David. David tsi' ña'ta ya' yom wa'chocontel jini Templo. 2Salomón tsa' caji i tech i wa'chocon Templo che' ti 17 de abril che' i chʌmp'ejlel jab i reyintel. 3Jiñʌch i p'isol i yebal tsa' bʌ i mele Salomón: Lujump'ejl i cha'c'al (30) metro i ñajtlel, lujump'ejl metro i xujc. 4I lejch' jini otot am bʌ ti c'ajpam jini colem otot, an i ñajtlel lujump'ejl metro, lajal bajche' i xujc otot. Uxc'al metro i chanlel. Tsi' laj tep'e ti oro i mal jini otot. 5Tsi' mele jini colem bʌ i mal otot yic'ot i tablajlel ciprés. Tsi' tep'e ti oro. Tsi' t'obo tac i yejtal i yopol ch'ib yic'ot cadena. 6Tsi' ch'ʌlbe i mal otot yic'ot alʌ xajlel tac wen i t'ojol bʌ. Tsi' c'ʌñʌ oro ch'oyol bʌ ti Parvaim. 7Tsi' laj tep'e ti oro jini otot: i cucujlel, yic'ot i yoyel, yic'ot i ñʌc' tac jini tsalʌl ti pejtelel i tablajlel, yic'ot i ti' tac jini otot ba' tsi' meleyob i yejtal tac ángelob.
8Ti mal jini Templo tsi' mele jini C'ax Ch'ujul bʌ Ajñibʌl. Joy lajal i ñajtlel yic'ot i xujc, lujump'ejl metro. Tsi' laj tep'e ti oro am bʌ i tojol lujunc'al ti millón peso. 9Jini lawux melbil bʌ ti oro an i yalel uxc'al gramo jujunts'ijt. Tsi' tep'e ti oro ja'el jini tsalʌl tac am bʌ ti' cha'lajmlel otot ya' ti chan. 10Ya' ti' mal jini C'ax Ch'ujul bʌ Ajnibʌl tsi' wa'choco cha'tiquil ángelob melbil bʌ ti te' tep'bil bʌ ti oro. 11-13Ya' wa'alob i yejtal ángelob ti' tojel jini Ch'ujul bʌ Ajñibʌl. Tich'bilob i wich' tsi' tajayob i bʌ ti ojlil. Tsa' c'ʌlʌl c'otiyob ti' tablajlel otot ti jujunwejl. 14Ya' ti' tojel i wut tsi' joc'choco pisil wen fino bʌ melbil bʌ ti lino, jalbil bʌ ti yʌjyʌjx bʌ yic'ot ti chʌchʌc bʌ puy. Ya' jalbil i yejtal tac ángelob ti jini pisil.
Jini cha'ts'ijt i yoyel
(1 R. 7.15-22)
15Ti' tojel jini otot tsi' mele cha'ts'ijt i yoyel, wuwucp'ejl metro i chanlel. Yambʌ ojlil i yuxp'ejl metro i chanlel i jol jini oy. 16Tsi' mele cadena tac cha'an i ch'ʌjlil i jol ti' cha'ts'ijtlel. Lʌpʌl ti cadena tac jo'c'al granada melbil bʌ ti bronce. 17Tsi' wa'choco jini oy ti' tojel Templo, junts'ijt ti' ñoj, yambʌ ti' ts'ej. Tsi' yotsʌbe i c'aba' Jaquín jini am bʌ ti' ñoj yic'ot Boaz jini am bʌ ti' ts'ej.
Currently Selected:
2 CRONICAS 3: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.