2 CRONICAS 2
2
I trato Salomón yic'ot Hiram
(1 R. 5.1-18; 7.13-14)
1Salomón tsa' caji i wa'chocoben i yotot lac Yum yic'ot i bajñel otot. 2Tsi' yotsa ti e'tel lujuntiquil i chʌnc'al mil (70,000) xcuchijelob yic'ot chʌnc'al mil (80,000) xtoj'esa xajlelob. Tsi' wa'choco bolombajc' (3,600) xq'uel e'telob. 3Salomón tsi' chocbe majlel t'an jini rey Hiram ya' ti Tiro. Tsi' sube: Coltañon che' bajche' tsa' colta c tat David che' bʌ tsa' chocbe tilel ch'ujte' cha'an i melol i yotot. 4Joñon mi caj c wa'chocoben i Templo lac Yum Dios, mu' bʌ caj cʌq'uen lac Yum cha'an mi mejlel cʌq'uen lojon i majtan ti sʌc'ajel, yic'ot ti ic'ajel, yic'ot ti' yorajlel c'aj o, yic'ot che' mi' pasel uw, yic'ot ti ñuc tac bʌ i q'uiñilel lac Yum Dios, cha'an mi' pulbentel pom yic'ot tsʌnsʌbil bʌ i majtan xojocña bʌ i yujts'il che' bajche' yom melol ti Israel ti pejtelel ora. 5Wen ñuc jini otot mu' bʌ caj c wa'chocon. Wen ñuc lac Dios. Ma'anic yambʌ ñuc bʌ ti' tojlel jini diosob. 6Pero ¿majqui mi mejlel i melben i yotot jini ñuc bʌ Dios mu' bʌ i but' i chañelal panchan? Mach ñuconic cha'an mic wa'chocoben i yotot, pero jiñʌch i yotot ba' mi caj c ch'ujutesan lojon.
7Jini cha'an chocbeñon tilel winicob yujilo' bʌ e'tel ti oro yic'ot ti plata yic'ot ti bronce yic'ot ti tsucu taq'uin. Choco tilel ja'el jini yujilo' bʌ jalbal ti chʌchʌc bʌ yic'ot ti yʌyʌx bʌ puy. La' i comol cha'leñob e'tel yic'ot c winicob ti Judá yic'ot ti Jerusalén yajcʌbilo' bʌ i cha'an c tat David. 8Chocbeñon tilel te' ch'oyol bʌ ti Líbano, ch'ujte' yic'ot ciprés yic'ot wen tac bʌ te', come a winicob wen yujilob i p'elol te'. C winicob mi caj i comol cha'leñob e'tel yic'ot a winicob 9cha'an mi' loc'ob cabʌl te', come wen melbil yom jini colem otot mu' bʌ caj c wa'chocon. Yom wen i t'ojol jax. 10Mi caj cʌq'ueñob a winicob junc'al mil costal trigo yic'ot junc'al mil tambo cebada, yic'ot junc'al mil tambo i ya'lel ts'usub, yic'ot junc'al mil tambo olivo aceite. Che' tsi' yʌlʌ Salomón.
11Ti ora jach jini rey Hiram am bʌ ti Tiro tsi' chocbe majlel jun Salomón. Tsi' yʌlʌ: Tsiquil wen c'uxbibilob jini israelob ti Dios. Jini cha'an lac Yum tsi' yotsayet ti rey ti' tojlelob. 12La' ñuq'uesʌntic lac Yum i Dios israelob tsa' bʌ i mele panchan yic'ot pañimil. Tsa'ix i yʌq'ue David juntiquil i yalobil wen toj bʌ, wen cabʌl bʌ i pusic'al yic'ot i ña'tʌbal cha'an ili e'tel. Uts'at mi caj a wa'chocoben i Templo lac Yum. Uts'at mi caj a mel a wotot ja'el ba' ma' cha'len yumʌl. 13Wolic chocbeñet majlel juntiquil c winic cabʌl bʌ i ña'tʌbal, wen yujil bʌ e'tel, jini wen ñuc bʌ Hiramabi. 14I yalobilʌch x'ixic judea ch'oyol bʌ ti Dan yic'ot winic loq'uem bʌ ti Tiro. Wen fino i ye'tel ti oro yic'ot ti plata yic'ot ti bronce yic'ot ti tsucu taq'uin. Che' ja'el wen yujil e'tel ti xajlel yic'ot te'. Yujil jalbal ja'el. Yujil i melol pejtelel chuqui mi lac suben. Yujil i yotsʌbentel i ts'ijbal pisil ti chʌchʌc yic'ot ti c'ʌnc'ʌn. Mi caj i cha'len e'tel yic'ot a winicob yic'ot jini winicob yajcʌbilo' bʌ i cha'an a tat David. 15Jini cha'an, c yum, choco tilel jini trigo, yic'ot cebada, yic'ot aceite, yic'ot i ya'lel ts'usub che' bajche' tsa' wʌlʌ. 16Mi caj c loc'san lojon jini te' ya' ti Líbano che' bajche' c'amel a wom. Mi caj c ts'ʌl cʌch lojon jini te' cha'an mic chocbeñet lojon majlel ya' ti colem ja' c'ʌlʌl ti Jope. Ya' mi caj i ch'ʌmob a winicob cha'an mi' jexbañob majlel ti Jerusalén. Che' tsi' yʌlʌ Hiram.
17Salomón tsi' tsiqui pejtelel jini ñajt bʌ ch'oyolob chumulo' bʌ ti Jerusalén che' bajche' tsi' mele David i tat. Ti pejtelelob añob 153,600 winicob. 18Tsi' yotsayob ti e'tel lujump'ejl i chʌnc'al mil xcuchijelob yic'ot chʌnc'al mil xp'el te'ob yic'ot xtoj'esa xajlelob, yic'ot bolonc'al xq'uel e'telob.
Currently Selected:
2 CRONICAS 2: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.