1 SAMUEL 19
19
Saúl tsi' ña'ta i tsʌnsan David
1Saúl tsi' sube Jonatán i yalobil yic'ot pejtelel x'e'telob i cha'an, cha'an mi' tsʌnsañob David. Pero ma'anic tsi' jac'ʌ Jonatán come c'uxatax tsi' yubi David. 2Jonatán tsi' sube: Yom i tsʌnsañet c tat. Jini cha'an yom ma' tsajin a bʌ. Pijtañon ijc'ʌl ti sʌc'ajel ya' ba' ma' puts'el cha'an ma' muc a bʌ. 3Ya' talon quic'ot c tat lʌc'ʌl ba' añet ti jamil. Che' mic pejcan lojon c bʌ mi caj c ña'tan chuqui mi caj i tumbeñet. Ti wi'il mic cha' subeñet, che'en. 4Che' jini Jonatán tsa' caji' suben i tat: Uts'at i pusic'al David. Mach yomic ma' tic'lan David jini xuc'ul bʌ a winic, come ma'anic chuqui leco tsi' melbeyet. Uts'at pejtelel chuqui woli' mel. 5Colelix i tsʌnsʌntel che' bʌ tsi' tsʌnsa jini filisteojob. Lac Yum tsi' c'ʌñʌ cha'an mi' coltan jini israelob che' bajche' tsa' q'uele ja'el. Tijicña a pusic'al tsa' wubi. ¿Chucoch che' jini mi caj a cha'len ñuc bʌ mulil? che'en. 6Saúl tsi' wen ñich'tʌbe i t'an Jonatán. Tsi' yʌlʌ: Melel mic subeñet, come cuxul lac Yum, ma'anic mi caj i tsʌnsʌntel David, che'en. 7Che' jini Jonatán tsi' pʌyʌ tilel David cha'an mi' cha' suben pejtelel jini t'an. Tsi' cha' pʌyʌ majlel ya' ti' yotot i tat. David tsi' cha' melbe i ye'tel jini rey che' bajche' ti yambʌ ora.
8Tsa' cha' caji guerra. David tsa' loq'ui majlel cha'an mi' contrajin jini filisteojob. Tsa' mʌjli i cha'an. Cabʌl tsi' jisayob jinto tsa' laj puts'iyob. 9Tsa' cha' c'oti ti' tojlel Saúl jini jontol bʌ espíritu chocbil bʌ tilel cha'an lac Yum. Ya' buchul Saúl ti' yotot, chucbil i cha'an i lanza. David woli' jats' jini arpa. 10Saúl tsi' ñopo i sʌl jec' David ya' ti' ñʌc' ts'ajc. Pero ma'anic tsa' mejli. David tsi' tʌts'ʌ i bʌ. Cojach jini ts'ajc tsi' taja. Che' jini David tsa' puts'i majlel.
11Ti jini jach bʌ ac'ʌlel Saúl tsi' choco majlel winicob ti' yotot David cha'an mi' joy q'uelob cha'an mi' tsʌnsañob David che' ti sʌc'ajel. Pero Mical i yijñam David tsi' tsictesʌbe i ñoxi'al. Tsi' sube: Mi ma'anic ma' puts'el wʌle, ijc'ʌl mux caj a tsʌnsʌntel, che'en. 12Jini cha'an Mical tsi' colta David cha'an mi' loq'uel ti ventana. Tsi' ju'sa ti lazo. Che' jini tsa' puts'i majlel. 13Mical tsi' ch'ʌmʌ i yejtal winic lajal bʌ i chanlel bajche' winic. Tsi' ñolchoco ya' ti' wʌyib. Tsi' yʌq'ue i c'ʌnjol melbil bʌ ti' tsutsel chivo. Tsi' moso ti pisil. 14Saúl tsi' choco majlel winicob ti' yotot David cha'an mi' chucob. Pero i yijñam tsi' yʌlʌ: Mach c'oq'uic, che'en. 15Saúl tsi' cha' choco majlel yambʌ winicob cha'an mi' wersa pʌyob tilel. Tsi' subeyob: Pʌybeñonla tilel David ti' wʌyib cha'an mic tsʌnsan, che'en. 16Che' bʌ tsa' ochiyob jini soldadojob, tsi' tajayob jini melbil bʌ i yejtal winic, c'ʌcʌl i jol ti' c'ʌnjol melbil bʌ ti' tsutsel chivo. 17Jini cha'an Saúl tsi' c'ajtibe i yalobil Mical: ¿Chucoch tsa' lotiyon? Tsa'ix a wʌc'ʌ ti colel j contra, che'en. Mical tsi' sube lot: Come tsi' subeyon: “Mi ma'anic ma' coltañon ti majlel, mi caj c tsʌnsañet”. Che' tsi' subeyon David, che'en Mical.
18Che' jini tsa' puts'i David. Tsa' majli ba'an Samuel ya' ti Ramá. Tsi' sube pejtelel chuqui tsi' melbe Saúl. Jini cha'an tsa' tem majliyob ti chumtʌl ya' ti Naiot. 19An majqui tsi' sube Saúl: Ya' chumul ti Naiot ti Ramá, che'en. 20Jini cha'an Saúl tsi' choco majlel winicob cha'an mi' chucob tilel David. Pero ya' tsa' caji' q'uelob junmojt x'alt'añob woliyo' bʌ ti alt'an yic'ot Samuel. Jini Espíritu i cha'an bʌ lac Yum tsa' c'oti ti' tojlel jini winicob. Tsa' caji' cha'leñob alt'an ja'el. 21Che' bʌ tsi' yubi Saúl, tsi' cha' choco majlel yambʌ winicob ti' cha'yajlel. Lajal tsa' cajiyob ti alt'an ja'el. Ti' yuxyajlel tsi' choco majlel winicob. Pero lajal jach tsa' cha' ujti. 22Jini cha'an tsa' caji ti majlel Saúl ja'el ya' ti Ramá. Che' bʌ tsa' c'oti ya' ti colem pozo am bʌ ti Secú, tsi' c'ajtibe winicob: ¿Baqui an Samuel yic'ot David? che'en. Tsi' jac'ʌyob: Ya' añob ti Naiot ti Ramá, che'ob. 23Che' bʌ tsa' caji ti majlel Saúl ya' ti Naiot ti Ramá, awilan jini Espíritu i cha'an bʌ lac Yum tsa' c'oti ti' tojlel Saúl ja'el. Tsa' caji' cha'len alt'an ja'el che' woli ti xʌmbal majlel c'ʌlʌl jinto tsa' c'oti ti Naiot ti Ramá. 24Tsi' jocho i pislel. Tsi' cha'le alt'an ti' tojlel Samuel. Pits'il tsa' ajni jump'ejl q'uin yic'ot jump'ejl ac'ʌlel. Jini cha'an tsa' caji i yʌlob jini winicob: ¿Jim ba i pi'ʌl x'alt'añob jini Saúl? che'ob.
Currently Selected:
1 SAMUEL 19: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.