1 CRONICAS 28
28
Salomón tsi' tajbe i yumʌntel i tat David
1David tempa c'otel ti Jerusalén pejtel jini ñuc taco' bʌ i ye'tel. Jiñobʌch iliyi: I yumob israelob ti jujunmojt yic'ot i yumob soldadojob ti jujunmojt, yic'ot jini wa'chocobilo' bʌ ti xcʌntaya año' bʌ ti' wenta pejtel chuqui tac an ti' tojlel jini rey yic'ot i yalobilob, yic'ot pejtel yaño' bʌ woliyo' bʌ ti yumʌntel. 2Che' jini tsa' xit' ch'ojyi jini rey David. Che' wa'alix tsa' caji ti t'an: C pi'ʌlob mu' bʌ la' ñich'tʌbeñon c t'an, tsac ña'ta c wa'chocon otot ba' mi mejlel i yajñel jini Arca ba' lotol i trato lac Yum, cha'an ya' mi' chumtʌl lac Yum Dios. Tsa'ix ujti c laj chajpan pejtelel chuqui yom cha'an mi' mejlel jini Templo. 3Pero lac Yum Dios tsi' subeyon: “Mach yomic ma' wa'chocobeñon cotot, come tsa'ix a wen cha'le guerra jatet. Tsa' bec'be cabʌl i ch'i'ch'el winicob”, che'en. 4Pero lac Yum i Dios Israel tsa'ix i yajcayon ti' tojlel pejtelel c ñojte'elob, cha'an mic cha'len yumʌl joñon quic'ot c p'olbalob ti pejtelel ora ti' tojlel Israelob. Come tsi' yajca Judá cha'an mi' yochel ti yumʌl. Ti' tojlel Judá lac Yum tsi' yajca i yotot c tat. Ti' tojlel i yalobilob c tat tsi' yajcayon cha'an mi' wa'chocoñon ti rey ti' tojlel pejtelel israelob. 5Ti' tojlel pejtelel jini calobilob (come lac Yum tsi' yʌq'ueyon cabʌl calobilob), tsa' yajcʌnti Salomón cha'an mi' cha'len i yumʌntel tij q'uexol ti Israel. 6Lac Yum tsi' chʌn subeyon: “Jini a walobil Salomón mi caj i wa'chocbeñon cotot, come tsac yajca cha'an calobil. Mi caj i tatiñon. 7Mi caj c buchchocon ti' yumʌntel yic'ot i yalobil ti pejtelel ora mi chʌn xuc'ul mi' jac' pejtelel c mandar yic'ot c subal ti pejtelel ora che' bajche' ti ili ora”. Che' tsi' yʌlʌ lac Yum, che'en David.
8David tsi' sube Salomón: Wʌle ti' tojlel pejtelel jini israelob, i cha'año' bʌ lac Yum, yic'ot ti' wut Dios, wolij cʌntesañet cha'an ma' jac' ti xuc'ul pejtelel i mandar lac Yum Dios, cha'an ma' ch'ʌm ti a wenta jini uts'at bʌ pañimil, cha'an ma' cʌy ti' wenta a walobilob ti wi'il bʌ ora, cha'an mi' cha'leñob i yumʌntel ti pejtelel ora. 9Jini cha'an, calobil Salomón, yom ma' wen cʌn Dios, i Dios a ñojte'el. Ch'ujutesan ti pejtelel a pusic'al yic'ot ti' tijicñʌyel a pusic'al. Come lac Yum mi' wen cʌmben i pusic'al winicob x'ixicob. Mi' cʌmbeñob i pensar. Che' ma' sajcan lac Yum, mi caj a taj. Pero mi tsa' cʌyʌ, mi caj i junyajlel cʌyet. 10Jini cha'an wʌle chʌcʌ q'uele a bʌ, come lac Yum tsa'ix i yajcayet cha'an ma' wa'chocoben jini ch'ujul bʌ i yotot. Wʌle yom ma' ch'ejl'esan a bʌ cha'an ma' wujtesan jini e'tel. Che' tsi' yʌlʌ David.
11Che' jini David tsi' laj aq'ue i yalobil Salomón i planojlel jini Templo, yic'ot i patio, yic'ot ba' mi' lojtel tac jini chubʌ'añʌl, yic'ot i mal tac jini otot, yic'ot jini tsalʌl tac, yic'ot jini Arca ba' mi' ñusʌntel mulil. 12Che' ja'el tsi' cʌybe i planojlel tac i patio jini Templo, yic'ot jini tsalʌl tac ti' joytʌlel, yic'ot ba' mi' lojtel chuqui tac an i cha'an lac Yum, yic'ot ba' mi' yotsʌntel jini majtañʌl tac. David tsi' yʌq'ue ti pejtelel che' bajche' tsa' pʌsbenti ti Espíritu. 13Che' ja'el David tsi' sube Salomón bajche' yom i ye'tel jini motomajob yic'ot levíjob ti jujunmojt. Tsi' sube baqui lotol jujunchajp e'tijibʌl cha'an i ye'tel lac Yum ya' ti Templo.
14David tsi' yʌlʌ bajche' c'amel yom mi' c'ʌjñel i yalel jini oro yic'ot plata cha'an pejtelel mu' bʌ i c'ʌjñel tac. 15Tsi' p'isbe ja'el i yalel jini oro cha'an mi' mejlel jini lámpara tac yic'ot ba' mi' ts'ʌjbel c'ajc tac. Che' ja'el tsi' p'isbe i yalel jini plata cha'an jujump'ejl i te'el c'ajc yic'ot ba' mi' ts'ʌjbel c'ajc. Ts'ʌcʌl tsi' laj aq'ue che' bajche' onlel yom. 16Che' ja'el tsi' p'isbe i yalel oro cha'an mi' mejlel jini mesa ba' mi' pʌsbentel waj lac Yum yic'ot yan tac bʌ mesa melbil bʌ ti oro. Tsi' p'isbe i yalel plata cha'an mi' mejlel jini mesa tac ti plata. 17Che' ja'el tsi' p'isbe i yalel jini fino bʌ oro cha'an mi' mejlel jini jec'o' we'elʌl ba' mi' joc'tʌl jini we'elʌl, yic'ot cha'an poc' tac, yic'ot vaso tac, yic'ot taza tac melbil bʌ ti oro yic'ot ti plata. 18Che' ja'el tsi' p'isbe i yalel jini oro cha'an mi' mejlel jini pulʌntib ba' mi' pulel pom, yic'ot i yejtal ángelob sʌts'ʌlo' bʌ i wich' mu' bʌ i mosob jini Arca ba' lotol i trato lac Yum. 19David tsi' sube Salomón: Lac Yum tsi' pʌsbeyon bajche' yom mejlel jini otot. Ts'ijbubil bajche' yom mejlel jini e'tel tac ti pejtelel, che'en.
20Jini cha'an David tsi' sube i yalobil Salomón: Yom bʌxet. Yom ch'ejlet. Cha'len wersa cha'an jini e'tel. Mach a cha'len bʌq'uen yic'ot pensar, come lac Yum Dios, jini c Dios, mi caj i yajñel a wic'ot. Ma'anic mi caj i cʌyet. Mi caj i coltañet jinto mi' yujtel ti mejlel i yotot lac Yum. 21Wʌ' añob jini motomajob yic'ot jini levíjob mu' bʌ caj i cha'leñob e'tel ti Templo ti mojt ti mojt yic'ot pejtelel mu' bʌ i c'ʌñob i pusic'al ti e'tel, jini año' bʌ i ña'tʌbal ti jujunchajp e'tel, yic'ot jini soldadojob, yic'ot pejtelel israelob. Mi caj i laj jac'beñetob a t'an. Che' tsi' yʌlʌ David.
Currently Selected:
1 CRONICAS 28: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.