METIAS 23

Ngoʼo mia Befarizieñ a beyeme bekalate

(Mk 12:38-40; Lk 20:45-47; 11:39-52)

1Ane Yésus a nga kobô jama bôt a beyéʼé bé 2na: Beyeme bekalate a Befarizieñ be too éto Môze yôp, 3jam ese ba jô mia baʼalaʼan a boʼone de, ve te boone avale ba bo. Amu be nji bo ane ba jô. 4Ba kaʼa adite mimbeʼe e ne ayaé ya beʼe e bitule bi bôte befe, ve bebien te kômbô fôʼé mie a ônyu viap.

5Mam mese ba bo, ba bo me ve amu na bôt be yene be. Ba bo bikpwaé bekalate be Zambe biabe ndam a bo miñwôndé ya mengômesane map ayap. 6E mebôʼô bidi, ba nyeʼe bito mintômba, nalé fe bi ya ôsu e meba me Zambe, 7mebatan e mevôme bôt ba sulan; ba nyeʼe bôt be loʼone be na Rabi. 8Ve mia, te mia kañese lobane na Rabi; môte wua nye a ne ñyeʼele wônan, mia bese mi ne bobenyañ. 9E si nyô, te mia loone môt éziñ ésoo wônan, amu mi bili wua ve Esoo wônan a ne yôp. 10Te mia lobane na beliti bôte zen , amu nliti zene wônan a ne wua ve Krist. 11Nyô a dañe beta môt e be mia a ye bo mbo ésaé wônan. 12Nyô a bete émiene yôp a ye silibane si a nyô a suu émiene si a ye betebane yôp.

13Bidim a mia, beyeme bekalate a Befarizieñ bôte bebaduʼu, amu mia dip éjôé ya yôp ôsu be bôt; miabebien teke nyiin été a teke jôʼé ba ba kômbô nyiine na be nyiin.

14Bidim a mia beyeme bekalate a Befarizieñ bôte bebaduʼu! Amu mia nyoñe minkus e biôme bise be bili, éyoñe te fe mia bo ayabe meyeʼelane na bôt be yene mia.

15Bidim a mia, beyeme bekalate a Befarizieñ bôte bebaduʼu, amu mia bômane mañ a si asu ya dutu môte wua a éyoñe mi dutuya nye, mia veñesane nye mone ya ébé nduan a dañe mia tañe biyoñe bibaé.

16Bidim a mia, mindindime belitizen, mia mia jô na: Môt a kalane nda Zambe teke jam é ne bo nye, ve nyô a kalane or a ne été nye a ntii mvôla. 17A mia mekut a mindindim jé ja dañe dañ anen ye or ye nda Zambe ja telé or étyi? 18Mia jô fe na: Nyô a kalan ataʼa metunaʼa teke jam é ne été ve nyô a kalan mvean ô bete été yôp nye a mbili mvôla. 19A mia mindindim, jé ja dañ anen, ye mvean ye ataʼa metunaʼa da telé mvean étyi? 20Nyô a kalane ñhe ataʼa metunaʼa a kalane de a biôme bise bi bete été yôp; 21a nyô a kalan nda Zambe a kalane je a nyô a too été. 22Nyô a kalane yôp a kalan éto njôane Zambe a nyô a too je yôp.

23Bidim a mia, beyeme bekalate a Befarizieñ, bôte bebaduʼu, amu mia ve ngab awômô ya mesep, ôsim a ndôñ, ve mi vuane jam da dañ anen e metiñ: nya ntyiʼane mejôô, nkoon éngôngo a mbunan; mam mana mme mi nga yiane bo, ve teke jôʼé ma mevok. 24A mia mindindime belitizen, mia viane léé afi a mine kamel.

25Bidim a mia, beyeme bekalate a Befarizieñ, bôte bebaduʼu! Amu mia fubu élaé a beʼe mfaʼa ya atan, ve mfaʼa ya été bi too njalan a wup nalé fe ôzañ akum. 26A ndindime Farizieñ, tatéʼé fubu élaé mfaʼa ya été, nalé atane dé da ye fe bo mfuban .

27Bidim a mia, beyeme bekalate a Befarizieñ, bôte bebaduʼu! Amu mia funane mesoñ me ne ndubane fem, mme ma yené abeñ atan, ve été me ne njalan a bivese mimbim a mvin mevale mese. 28Nalé ate fe mia, mia yené bezôsôô be bôt atan, ve été mi ne njalan a nsisime bebaduʼu a wu mbia be mam.

29Bidim a mia, beyeme bekalate a Befarizieñ, bôte bebaduʼu! Amu mia lôñe mesoñ bekulu mejô a kôme mesoñ bezôsôô be bôt, 30a mia jô na: Nge bi nga too melu bʼésaa bangan, bi nji ye bo beébe bebeʼe ayem bap ya metyi bekulu mejô. 31Avale ya na mi ne bengaa ba wosane bebien, amu mi ne bone be bôt be nga wôé bekulu mejô! 32Jé éfe! Ke miabebien mia tuʼa jalé mimboon bʼésaa benan. 33A benyo, mvoñe mekpwe! Aval avé mia ye tup a mate ntyiʼane mejô ya étôtôlan? 34Ajô te, mi lôô, ma lôme bekulu mejô, mimfefek a beyeme bekalate e be mia; mia ye wôé bevoʼo ya be be a tyelé bevoʼo krôa , a bibi bevoʼo minkasa e meba me Zambe, a mia ye tibili bevok e tisone nyô a nyô fok; 35ndembene zôsôa metyi ase a nga sôébane si a ye zu be mia, ataté metyi Abél, zôsôa môt, a kui metyi me Zakari, mona Barasi; nye mi nga wôé e zañe nda Zambe a ataʼa metunaʼa. 36Ma jô mia bebela na: Jame te ese da ye boban e miaé bôte wuna.

37A Yérusalém! A Yérusalém! Wo wo wôé bekulu mejô a lume ba ba lômbane be wo mekok ! Ngoʼo abime biyoñ me nga kômbô kôane bone bôé ane ngale kup a kôane bone béé e mefabe mé si! Ve mi nji ke kômbô nalé! 38Tame yenan! Nda jenan ja ye liʼi bilik asu denan. 39A ma jô ñhe mia na: Te ke selan a ataté éyoñe ji mia ye bo te beta yene ma akekui mi jôya na: Ebotan a nyô a zu a jôé Nti!

Currently Selected:

METIAS 23: BULU09

Highlight

Copy