LUKAS 5

Angônda nsôme kos

(Mt 4:18-22; Mk 1:16-20; Yoa 21:1-11)

1Mbôlô nkunda bôt ô nga ke avôl ya bômane nye na be wôʼô mejô me Zambe a na a mbe e fefele ébataʼa mendim ya Genézarét, 2e nde a yen e kindiʼi ébatak bone bilelé bibaé, beyobe kos be ndôme sis été, be sôbe mevote map, 3e nde a bet élélé jia yʼété é mbe e ji Simon, ve sili Simon na a ke ôbe ôyap a si. Wôna a nga tabe si, e nde a yeʼele bôt a too élélé été.

4Eyoñ a nga suu nkobô, a nga jô Simon na: Kelek e vôme mendim me nʼédok, a wuʼane mevote menan na mi yop. 5Simon a nga yalane nye na: A Nyeʼele bia te saé ngum alu teke bi jôm, vʼamu wo jô, ma ye wua mevot. 6Eyoñ a boya nalé, e nde be nga bi étua abui kos, a mevote map me nga tuui. 7Be nga febe bôte bevoʼo mo e mbe be mbe élélé évok été na be zu volô be. Be nga zu a jalé bilélé bibaane a kui na bi nyoñ e mendim. 8Eyoñe Simon Pierre a nga yene nalé a nga ku Yésus meboñ a jô na: A Nti, kele ma ôyap amu me ne mbo abé . 9Amu woñ ô nga bi nye, émien a ba bese baa be nye be mbe, amu nsôme mevot be nga bo. 10Avale te fe mfaʼa Yakob a Yôanes, bone be Zébédé, bemvôé be Simon. Yésus nye Simon na: Te ko woñ; ataté éyoñe ji, wo zu bo nyô a yobe bôt. 11Ane be nga zuu bilelé e kindik, ve liʼi biôme bise a tôñe nye.

Nzezam ve saéban

(Mt 8:2-4; Mk 1:40-45; Lk 17:12-19; Sam 51:12)

12Yésus a mbe e jia ya bitison: e nde môt éziñ, zame nyôl ne nyaññ, a nga yene nye, ve ku asu e butu si a yeʼelane nye na: A Nti, nge wo kañese nalé, ô ne nguleya bo ma mfuban . 13Yésus ve same wo a nnambe nye a jô na: Ma kañese nalé, boʼo mfuban . Eté été, zam é nga kôlô be nye. 14Wôna a nga bendé nye na a bo te kobô de môt éziñ. Ve a nga jô nye na: Kele liti womien e be Ntuni, a ve mvean asu Ntunane wôé avale Môze a nga bendé, nalé jame te da ye bo be ngaa.

15Duma dé e nga dañe mialan a ézuʼu minsamba mi bôt e nga sulan asu ya vôʼôlô nye a saéban mfaʼa ya akone dap. 16Ve nye a mbe a wondéʼé e mevôm me ne tee bôt a yeʼelane Zambe.

Mbôbôk wo saéban

(Mt 9:1-8; Mk 2:1-12; Sam 103:3)

17Yésus a mbe a yeʼeleʼe môs éziñ. Befarizieñ a beyeʼele metiñ be mbe be too si; be nga so minlam mise ya Galilé, Yudé a Yérusalém, a e ngule Nti é nga litiban e ñyetan akon. 18Bôte bʼéziñ be beʼe môt a mbe mbôbôk énoñ, be mbe be jeñek na be nyiñeli nye a bôôé nye ôsu vié. 19Mbôlô be mbe te yem e vôme be ne nyiine nye, amu bôt, e nde be nga bet andil a sili nye si a énoñe jé be lôtôk abé be nga tup a kui ézezañ ékôane bôt, ôsu be Yésus. 20Eyoñ a yeneya mbunane wop, Yésus a nga jô môt ate na: Mam abé môé me ntoo njaman . 21Beyeme bekalate a Befarizieñ be nga taté na ba fas a jô na: Nyôna a ne za a kobô ébiasé? Za a ne jamé mam abé , ye sa Zambe étam? 22Yésus a nga yem asimesane dap, ve nyoñe nkobô a jô be na: Amu jé mia bi aval asimesane te e minleme mienan été? 23Jé ja dañe tyiʼibi ya jô: Mam abé môé me ntoo njaman , ye jô na: Kôlôʼô si a wuluʼu? 24Vʼamu mi yeme na mona môt a bili ngul ya jamé mam abé e si nyô, e nde te ma bendé wo mbôbôʼô na: Kôlôʼô si, nyoñek énoñe jôé, a kelek e nda jôé. 25A été été, a nga kôlô si be too, ve toʼé énoñe jé a nga bôô yôp a ke e nda jé a kañeʼe Zambe. 26Bese be nga semé a be nga kañe Zambe. Njalan a woñ, be mbe be jôʼô na: Bi yeneya bitua bi mam e môse wu.

Lévi a loban - Nsili ajô ntyiane bidi

(Mt 9:9-17; Mk 2:13-22)

27Mvuse mam mete, Yésus a nga kui a tôban nyoñe toya, jôé na Lévi, a too wofis betoya. A nga jô nye na: Tôñe ma. 28Lévi a nga liʼi biôme bise, a kôlô si a tôñe nye.

29Lévi a nga bo nye beta dina e nda jé, beta nsamba benyoñe toya a bôte befe baa be be be nga too tawôlô. 30Befarizieñ a beyeme bekalate bap be nga nyiñ a jô beyéʼé béé na: Amu jé mia be benyoñe toya a bebo abé mia di? 31Yésus a nga nyoñe nkobô a jô be na: Saa ke ba be ne mvoʼé ba yi dokita , ve minkôkon. 32Me nji zu loone bezôsôô be bôt, ve bebo abé na be kôñelane minlem.

33Be nga jô nye na: Beyéʼé be Yôanes, ane ba Befarizieñ, ba tyi bidi mbane mban a bo meyeʼelan, ve émbôé ba di a nyu. 34Yésus a nga jô be na: Ye mi ne bo na bemvôé be nluʼu minga be tyi bidi e nté baa be nluʼu minga be né? 35Mimôs mia zu éyoñe ba ye vaa be nluʼu minga, éyoñe te ba ye tyi bidi mimôse mite. 36A nga kane fe be nkana na: Môt éziñ a voʼo nyabe éfuse ya mfefé éyé na a futi je e nnôm éyé; jam da ye kui e ne na a viane nyabe éyé é ne mfefé a éfus a nga futi été é boo teke luʼane nnôm éyé. 37Teke môt a futi mfefé woon e minnôme mendek bikôp; jame da ye kui e ne na mfefé woon wo ye bo na mendeʼe bikôp me tôtan, émien a nga sôôé, a mendeʼe bikôp me mane ndaman. 38Ve ba futi mfefé woon e mimfefé mendeʼe bikôp. 39A teke môt a ne bo na nge a mane nyu nnôme woon, a kômbô nyu mfefé, amu a jô na: E nnômô a ne mvaé.

Currently Selected:

LUKAS 5: BULU09

Highlight

Copy