LUKAS 3

Yôanes Babtist, nlôman wo ke Yésus ôsu

(Mt 3:1-12; Mk 1:1-8; Yo 1:6-8,19)

1E mbu awôm a tane, Kéza Tibér a too njôô, Pons Pilat a too ngovina ya Yudé, Hérôde a jôʼô e Galilé, Filip monyañ ke a jôʼô Ituré a Trakonitide, Lizanias a too njôô Abilén, 2Hanne a Kayif ke betuni, ajô Zambe e nga koban e be Yôanes e mone Zakari e nkôte si. 3A nga zu afôla ese ya Yordan, a kele a yôtane nduan asu nkôñelane wo sôñe njamane mam abé 4aval e ne ntilan e kalate nkulu mejô Ezayi na:

Tyiñ ja yôtan e nkôte si:

Kômane zene Nti

sôʼan asozene dé zôsôô .

5Ebé ése ja ye jineban

beta nkôl ase a mone nkôl ase

ba ye silibane si;

mimfaka mi bili mekot

ba ye sôane mie zôsôô

nalé fe minjoñ mi ne bikpwekpwek

ba ye tyee mie,

6a e nsôn ôse wo ye yene nyiane Zambe.

7Ajô te a mbe a jôʼô ba be mbe be zaʼa beta minsamba be nye na a duu be na: A mvoñe mekpwe, za a nga yeʼele mia na mi mate ayaa da zu? 8Ajô te ñhe wumane bibuma bia yiane nkôñelane nlem a te jôan e miabebien été na: Abraham a ne ésaa wongan. Amu ma kate mia na: Zambe a ne ve Abraham bon be soʼo mekoʼo mana 9éyoñ ébiene ji ôvôn ô bôô e tine bilé: élé ése ñhe ja bo te wum mbamba bibuma ja ye baʼéban a wuaban e nduan.

10Jama bôt a nga sisili nye minsili na: Bia ye ñhe bo jé? 11Nye be na: E môt a bili melôʼô mebaé a kabaʼane me a nyô a nji bi, a nyô a bili jôme ya di a boʼo avale da.

12Benyoñe toya fe be nga zu na be duban, be nye na: A Nyeʼele, bia ye bo jé? 13Nye be na: Te yetane jôm a dañ abim be nga bendé mia.

14Bezimbi fe be nga sili nye na: Bia ke bia ye bo jé? Nye be na: Te nyoñane môte jôm a ngu, nge a bibôta mejô ve nyoñane tañ ba yaʼane mia na ja yian.

15Amu bôt be mbe be yangeʼe, a bese be mbe be siliʼi bebiene minlem été nge Yôanes aa mbe ke Krist. 16A nga yalane bese na: Ma, ma duu mia a Mendim, ve môt a zu a ne ngu a dañe ma, a me nji bo nyô a yiane kuli nye minkole bikôndé. Nye, a ye duu mia a Mfufube Nsisim a nduan. 17A bili éfebaʼa e wo wé, wôna a ye vos e vôme wé ba fiale fes, a ye kôane nlisi angune dé, ve a ye diʼi bivua e nduan é ne teke dim.

18Yôanes a mbe a kañeteʼe bôte mbamba foé a fulan abui melebe mefe. 19Ve Hérôde, nyô be mbe be loʼone tétrark, e nye Yôanes a nga ve bijô ajô Hérôdiade nga monyañ a ajô mbia mimboone mise a mbe a boʼok, 20a nga beté mbia jam afe ya futi Yôanes e nda mimbôk e yôbe ya mbia be mam bevoʼo bese.

Yésus a duuban

(Mt 3:13-17; Mk 1:9-11)

21Bôt be ngenan be zaʼa na be duuban, e nde Yésus fe a nga duuban; a boʼo meyeʼelan, e nde yôp da yombô, 22a Mfufube Nsisim a nga sise be Nye a bili éyekaʼa nyôl, éfunan ane zum. Ane tyiñ é nga so yôbe na: Ô ne e Mone Wom ma dañe nyeʼe, ma yene wo mvaé.

Endane Yésus

(Mt 1:1-16)

23Yésus a nga bili mimbu bebé mewôm mela éyoñ a nga taté ésaé jé. Bôt be nga simesane na a mbe e mone Yôsep, Yôsep Héli, 24Héli Mattat, Mattat Lévi, Lévi Melki, Melki Yanayi, Yanayi Yôsep, 25Yôsep Mattati, Mattati Amôs, Amôs Nahum, Nahum Esli, Esli Nangayi, 26Nangayi Maat, Maat Matatias, Matatias Semeyin, Semeyin Yôsek, Yôsek Yôda, 27Yôda Yôanañ, Yôanañ Résa, Résa Zôrôbabél. Zôrôbabél Salatiél, Salatiél Néri, 28Néri Melki, Melki Adi, Adi Kôsam, Kôsam Elmadañ, Elmadañ Er, 29Er Yésus, Yésus Eliézer, Eliézer Yôrim, Yôrim Mattat, Mattat Lévi, 30Lévi Simeyôn, Simeyôn Yuda, Yuda Yôsep, Yôsep Yônam, Yônam Eliakim, 31Eliakim Méléa, Méléa Ména, Ména Mattata, Mattata Natan, Natan David, 32David Yessé, Yessé Yôbéd, Yôbéd Bôaz, Bôaz Salmon, Salmon Naasoñ, 33Naasoñ Aminadab, Aminadab Admin, Admin Arni, Arni Esrôm, Esrôm Farés, Farés Yuda, 34Yuda Yakob, Yakob Izak, Izak Abraham, Abraham Tara, Tara Nakor, 35Nakor Séruk, Séruk Ragayu, Ragayu Pélég, Pélég Eber, Eber Sila, 36Sila Kayinam, Kayinam Arfaksad, Arfaksad Sem, Sem Noé, Noé Lemék, 37Lemék Matusalém, Matusalém Enok, Enok Yeréd, Yeréd Malélél, Malélél Kenam, 38Kenam Enos, Enos Sét, Sét Adam, Adam e mone Zambe.

Currently Selected:

LUKAS 3: BULU09

Highlight

Copy