YOANES 4

Yésus baa minga ya Samari

(Eza 55:1; Yoa 7:37-39; Mm 8:25)

1Eyoñe Yésus a nga yeme na Befarizieñ be wôʼôtaneya na Yésus a nga bi beyéʼé abui a du fe bôt abui alôte Yôanes, 2ve bebela a too na sake Yésus émien e nye a mbe a du bôt, beyéʼé bé e mbe be mbe be du bôt. 3E nde Yésus a nga kôlô e Yudé a bulane ke e Galilé. 4A nga to na a ke tulan e Samari. 5Ane a nga ke kui e tisone ya Samari é to jôé na Sikar, bebé a si Yakob a nga ve Yôsep, mone wé. 6Anjeñe Yakob e mbe vôm ate. Eyoñe Yésus a teʼeya a dulu, e nde a nga tabe si e nkôm anjeñ; bebé awolo samane. 7Minga éziñ ya Samari a nga zu lab mendim. Ane Yésus a nga jô nye na: Vaʼa ma mendim ya nyu. 8Beyéʼé bé kik be maneya ke e tisone na ba ke kuse bidi. 9E nde minga ya Samari a nga jô nye na: A nto aya, wo mone Beyude, wo sili ma ngone Samari mendim ya nyu? Amu Beyude baa be bôte ya Samari be ne te fulane mam. 10Ane Yésus a nga nyoñe nkobô a jô nye na: Nge wo too yeme éfaʼa Zambe a yeme fe môt émien a jô wo na: Nyuʼu me mendim, ve ô ye viane jaʼajaʼé nye, a nye ki a te ye ve wo mendime mʼényiñ. 11E nde minga kʼa nga jô nye na: A Nti, wô teke nlônga ya labe wô, anjeñ kʼédok, wo ye soo mendime mʼényiñe vé? 12Ye wo dañ ésaa wongan Yakob, e nye a nga ve bia anjeñe di, émien a nga nyu fe de baa be bon a biyeme bié? 13Ane Yésus a nga yalane nye na: E môt ase a nyu mendime ma a ye beta wôʼô évé. 14Ve nyu ki a ye nyu mendim ma ye ve nye, a ye bo te fe beta wôʼô évé akekui nnôm éto; amu mendim ma ye ve nye, ma ye bo nye anjeñ e nleme wé été, e nde da kui mendime mʼényiñe ya melu mese. 15E nde minga a nga jô nye na: A Nti, ke wo ve ñhe foʼo me mendim mete, me bo te beta wôʼô évé nge zu ke labe mendime vana. 16Ane Yésus a nga jô nye na: Kele loone nyônnôm, ô beta zu va. 17E nde minga a nga yalan a jô nye na: Me nji bi nnôm; ane Yésus a nga jô na: Wo kobô mvaé na me nji bi nnôm. 18Amu na ô biya beyôme betaan, ve nyô ki ô bili éyoñe ji a nji bo nyonnôm: vôm ate nye wo kobô bebela. 19E nde minga a zu jô nye na: A Nti, ma yene na ô ne nkulu mejô. 20Bʼésaa bangan be nga kañe Zambe e nkôle wuna, ve mi mia viane jô na, e vôme ba yiane kañe Zambe a ne Yérusalém. 21Ane Yésus a nga jô nye na: Buniʼi ma, a minga, amu éyoñ da zu e nje mia ye bo teke fe kañe Tate jaʼane e nkôle yôb va, nge ki Yérusalém. 22Mfaʼa wônan, mia kañ e jôme mi nji yem; ve mfaʼa wongan, bia kañ e jôme bia yem, amu nyian ô ne jôme ja so e Beyude. 23Ve awolo da zu, e soya ke so, éyoñe bôte ba kañe Zambe nya nkañane ba ye kañe Tate a nsisim a bebela; amu Tate a yi na avale bôte te e kañe nye. 24Zambe a ne nsisim , a bôte ba kañe nye, ba yiane kañe nye a nsisim a bebela été. 25E nde minga a nga jô nye na: Ma yeme na Mesie a ye so, a to jôé na Krist; éyoñe Mesie ate a ye so, a ye kate bia mam meseseʼe. 26Ane Yésus a nga jô nye na: Ke ma te ma kobôô wo nyô. 27Be laʼane nalé, e nde beyéʼé bé ba zu suan, be nga semé foʼo na baa minga ba laane minlañ. Ve teke môt éziñ a nga jô na: Wo sili nye jé, nge na mia nye mia laane jé? 28Ane minga a nga liʼi nkaʼa mendim wé ô tele, a kele tison, a nga ke a jô bôte na: 29Zaʼane yenane môt a te mane kate ma e mame mese me nga bo: ye sake nye a ne bo Krist nga? 30E nde bôte be nga ke so e tison a zu be Yésus. 31E zañe valé, beyéʼé be nga yeʼelane nye be jôʼô na: A Rabbi, ke wo tame ñhe di! 32Ane nye kʼa nga jô be na: Bidi ma yiane di, mi nji yeme bie. 33Beyéʼé be nga ke ba sili zañe jab na: Ye môt éziñ a ne nye mveane jôme ya di? 34E nde Yésus a zu jô be na: Bidi biam bi ne na ma yiane bo nkômbane môt a nga lôme ma, a tuʼa kôme bo ésaé jé. 35Ye miaa jô ke na, den ngon ényin, mekoé bidi ma ye taté? Ajô te ma jô mia na, lômane mis, mi fombôʼô, amu mefub me nto éfumulu ne fuum a bitôtôlô bidi ya koé. 36E nyô a koé bidi a nyoñeya maʼan a kôane fe bibuma asu ényiñ ya melu mese, e môt a mias a nga yene ñhe avak baa môt a koé avale da. 37Bebela ébuk a ne vôme nyôna, môte mfe nye a mias, e mfe ki e nye a koé. 38Me nga lôme mia mi ke koé e jôme mi nji wu njuk; bôte befe be nga mane wu njuk, ve mia ki mi nga zu fubu e vôme be nga wu njuk. 39E tisone, éte été, bôt abui ya nsamba Besamariteñ be nga buni nye amu nkobô minga a nga ke a kañete na, a maneya kate ma e mame mese me nga bo. 40Eyoñe Besamariteñ be nga zu kui e be Yésus, ane be nga yeʼelane nye na a tabee e be be; e nde a nga tabe valé tañe melu mebaé. 41Bôte be nga dañe beta buni amu ñyeʼelane wé émien, 42be nga jô minga ate na, bi nji fe beta buni amu nkañetane wôé, amu na bia bebien bi wôʼôya, bi yemeya fe na môte ate e nye a ne Nyii bôt ya si ndôn.

Yésus a saé mon évet bezimbi njô bôt

(Mt 8:5-13; Lk 7:1-10)

43E mvus melu mete mebaé, ane a nga kolô vôm ate a ke e Galilé. 44Amu Yésus émien a nga kôme jô na, e nkulu mejô a nji bi ésemen e si jé émien. 45Akui a nga ke kui e Galilé, bôte ya Galilé be nga nyoñe nye, amu be nga yen e mame mese a nga bo e Yérusalém e môs abôk, amu na be fe be nga too abôʼô té. 46E nde a nga beta ke e Kana ya Galilé, e vôm a nga kôñelane mendim woon. Nde môt éziñ a mbe Kapernawum valé, a too évet bezimbi be njô bôt, mone wé a konôk. 47Eyoñe môt ate a wôʼôya na Yésus a soya e Yudé a kele e Galilé, ane a nga ke e be nye a yeʼelane nye na a siliki a ke saé mone wé, amu a nto bebé ya wu. 48Ane Yésus a nga jô nye na: Nge mi te yene bitua bi mam a mendem, mi teke buni. 49E nde évet bezimbi é nga jô nye na: A Nti, jikaʼa siliki, nté mone wom a ngenane te wu ma. 50Yésus nyee nye na: Kele wo ke, nyo mon a vee. Ane môt ate a nga buni éfia Yésus a nga jô nye, e nde fe a nga ke. 51A ngenan a silikiʼi, ane bebo bisaé bé be nga zu tôbane nye, a kate nye na: Nyo mon a nyiñeya. 52E nde a nga sili be awolo mongô a nga bo mvoʼé; ane be nga jô nye na: Angôʼé, awolo zamgbwale, ane ayôñ e nga mane nye nyôl. 53Eyoñe té ésaa mon a nga simesane na, awolo te ebien, e nde Yésus a nga jô nye na: Nyo mon a vee, ane môt ate a nga buni, baa ngumba nda wé ôse. 54Jina é ne étua jame di e ne di baa Yésus a nga beta bo, a soʼo e Yudé a kele e Galilé.

Currently Selected:

YOANES 4: BULU09

Highlight

Copy