KALATE METATAʼA 45

Yôsep a bo na bobenyañ be yeme nye

(Met 44:33-34; Mm 7:13; Ef 4:32 a kui 5:2)

1Yôsep a nji fe bo nguleya jibi ôsu ya ba bese be mbe be tele fefele jé. A nga yône na: Kulaʼane bôte bese atan be kôlô fefele jam! A teke môt éziñ a nga liʼi a Yôsep éyoñ a nga bo na bobenyañe be yeme nye. 2A nga taté na a seʼebe du. Bôte yʼEjipte be nga wôk ane a yôn; a bôte ya ndaa Faraoñ be nga wôʼô ane a yôn. 3Yôsep a nga jô bobenyañe bé na: Me ne Yôsep! Ye ésaa wom a ngenan a vee? Ve bobenyañ be nga kam avale ya na be nji bo nguleya yalane nye. 4Yôsep a nga jô bobenyañe bé na: Ma yeʼelane mia, subaʼane ma bebé, nye na: Me ne Yôsep monyoñe wônan, e nye mi nga kuane na be kee nye Ejipte. 5Eyoñe ji, te mia wôʼôlun, nge jôbane na mi nga kuane ma na be zuu ma vana, amu Zambe a nga lôme ma ôsu wônane na me baʼale mia ényiñ. 6Den a ntoo mimbu mibaé ane mfumbale zaé a kui si bi too nyô; mimbu mi liʼiya fe mitan e mmie mia ye bo teke nsenane si nge nkôane bidi. 7Zambe a nga lôme ma ôsu wônane na me baʼale mia mebukaʼa e si bi too nyô a ve mia nguleya nyiñ ayap a zene ya nkôtan ô ne anen. 8Eyoñe jina ñhe, saake mia mi nga lôme ma vana, ve Zambe; a nga telé ma ésaa Faraoñ, masa ya nda jé ése a ngovina ya Ejipte ése. 9Boʼon avôle ya bete be ésaa wom, mia ye jô nye na: Avale di e nde mone wôé Yôsep a kobô na: Zambe a teléya ma masa yʼEjipte ése: sisik be ma, teke yange. 10Wo ye tabe éfuse si ba loone Gôzen, a wo ye bo fefele jam, womien, bone bôé, a bendaé bôé, mbame bone biyeme wôé a mbame beta biyeme wôé, a jôm ése é ne énjôé. 11E wé, ma ye ve wo biôme bise amu mfumbale zaé a liʼiya mimbu mitan; nalé ate wo ye bo te yi jôm, toʼo wo, toʼo nda bôte jôé, toʼo jôm ése é ne énjôé. 12Mi lôô a mise menan, a mojañe Bényamin a lôô a mise mé na ma foʼo ma kobô mia. 13Mia ye kañete ésaa wom duma dam ése Ejipte, a mam mese mia te yen. Boʼon avôle ya bo na ésaa wom a siliki a kui vana. 14A nga wubane monyañe Bényamin tyiñ a yôn; a Bényamin a nga yôn a tyele nye tyiñ . 15A nga latane fe bobenyañe bese anyu, a yônôk. Mvus éte, bobenyañ be nga laane nye.

Yôsep a yaʼane bobenyañ

(Met 46:1-7,28-30)

16Foé é nga mialan e ndaa Faraoñ na bobenyañe be Yôsep be soya. Faraoñ a bebo bisaé bé be nga yene jame te mvaé. 17Faraoñ a nga jô Yôsep na: Jôʼô bobenyoñe bôé na: Boʼone jame di. Kaʼane betite benane mimbeʼe. Kelane Kanaan, 18nyoñan ésaa wônan, a menda me bôte menan, zaʼane be ma, a ma ye ve mia biôme bi ne abeñ Ejipte, a mia ye di biôme bia dañe mvaé bi ne Ejipte. 19O bili abendé ya jô be na: Boʼone jame di; nyoñan e si yʼEjipte, bone bemetôa, asu bone benan a asu binga benan; boʼone fe na ésoo wônan a bet été a zakan. 20Te jôbane biôme bienan, amu biôme bise bia dañe mvaé Ejipte bia ye bo émbienan. 21Bone bʼIsraél be nga bo nalé, Yôsep a nga ve be bone bemetôa, ane Faraoñ a nga bendé; a nga ve fe be mengaʼaban asu dulu ya zen . 22A nga ve be bese mengômesane ya folane zen , a a nga ve Bényamin bifase bi moné mintete milaa, a mengômesane metane ya folane zen . 23A nga lôm ésaa wé biôm avale di: bijakas awôm bi beʼe biôme bise bia dañ abeñ Ejipte; bijakas awôm, bi beʼe fôn, belet a bidi asu ésaa wé dulu ya zen . 24Wôna a nga suu bobenyañe bé be téé dulu a ke. A nga jô be na: Te mia bo mintañete zen .

25Be nga kôlô Ejipte a kui Kanaan e be ésaa wop Yakob. 26Be nga kate nye na: Yôsep a ngenan a vee, a na e nye a jôô si ése yʼEjipte. Ve nleme Yakob ô mbe ne mieññ amu a nji buni be. 27Be nga baʼalane nye mejô mese Yakob a nga kobô be. Yakob a nga yene bone bemetôa Yôsep a nga lôme nye asu ya beʼe nye. Eyoñe te nsisim ésaa wop Yakob ô nga beta wômô. 28Israél a nga jô na: Abime te e yiane ya! Mone wom Yôsep a ngenan a vee! Ma ye ke yene nye te naa me wu.

Currently Selected:

KALATE METATAʼA 45: BULU09

Highlight

Copy