KALATE METATAʼA 39

Yôsep a ne Ejipte

(Sam 1:1-3)

1Be nga kee Yôsep Ejipte; a Pôtifar, môte ya Ejipte, môta ndinleme Faraoñ a njôô bezimbi ba baʼale nye, a nga kuse nye e be Beismaélit be nga kee nye Ejipte. 2Nti a nga too be Yôsep; mam me nga wulu nye mvoʼé mimfaʼa mise, a nga too e ndaa masa wé mon Ejiptieñ. 3Masa wé a nga yene na Nti a nga too be nye; jam ése a mbe a boʼok, Nti a nga bo na e wulu mvoʼé e mo mé. 4Yôsep a nga yene mvam e be masa wé a mbe a saane nye éyoñ a nga kalane biôme bise bi mbe émbié e mo mé. 5Nné ane Pôtifar a nga telé nye ane mbaʼale akume ya nda jé a mbaʼale biôme bise bi mbe émbié Nti a nga botane ndaa mon Ejiptieñ; a ébotane Nti é mbe e be biôme bise bi mbe émbié, ataté nda jé a kui mefup. 6A nga liʼi biôme bise a nga bili e mo me Yôsep, avale di na émien a mbe teke fe beta bo jôm éziñ, ô vaa ve bidi a mbe a jaʼak. Ve e too na Yôsep a mbe étua abeñ.

Yôsep baa minga Pôtifar

(Ekl 7:26; Mink 6:20; Yb 31:1-2; Yak 1:12)

7Eyoñe mam mete me maneya, e nga kui na minga masa Yôsep a nga wua mise mé be Yôsep a jô na: Bômbôʼô ma! 8Yôsep a nga ben a jô minga masa wé na: Tame yene na nté ane me soé, masa wom a nji beta bo jôm éziñ e nda va, a a veya biôme bise bi ne émbié e mo mam; 9môte mfe a nji bo beta môt a dañe ma e nda nyô, a a nji kamane ma jam éziñ ô vaa ve wo amu ô ne minga wé. Aya me ne bo aval anene mbia jame te, a me ne bo Zambe abé ? 10Akusa bo a nga juʼu kobô Yôsep jame te môs ane môs , a nji vôʼôlô mame a nga sili nye na a bômbô fefele jé a fulane nye. 11Môs éziñ, Yôsep a nga nyiine nda na a bo ésaé jé. Teke môt éziñe ya nda été a mbe valé; 12ane a nga bi nye ngômesan a jô na: Bômbôʼô ma! A nga liʼi ngômesane jé e wo wé été a kui mbil atan. 13Eyoñ a nga yene na a liʼiya ngômesane jé e wo wé été a a kuiya mbil atan, 14a nga loone bôte ya nda jé a kobô be na: Yenan, a keya soo bia mon Hébre asu ya kpweʼele bia. A te zu be ma na a bômbô ma; ve ma te taté na ma yôn étua ngul. 15Eyoñ a te wôk ane ma bete tyiñ a na ma yôn, a te liʼi ngômesane jé fefele jam a tup atan. 16A nga bôôé ngômesane Yôsep e fefele jé, akekui nnôme wé a soya nda . 17Ane a nga kobô nye avale da na; ôlo mon Hébre ô nga soo bia wô wo te zu be ma na ô kpweʼele ma. 18Mbôlô ma te bete tyiñ a yôn, wo te liʼi ngômesane jé e fefele jam a tup atan. 19Eyoñe Pôtifar a maneya wôʼô nkobô ngal a mbe a jôʼô nye na: E jam ôlo wôé wo te bo ma e nde di! 20Masa Yôsep a nga dik a ayaa. A nga bo na be futi nye mimbôk, e vôme mimbôʼô mi njô bôt mi mbe mfetan. Yôsep a nga too valé, e mbôk.

Yôsep a mbaʼale nda mimbôk

(Sam 105:18-19; 1 Pi 2:19-20)

21Nti a nga too be Yôsep, a a nga same wo mvame wé be nye. A nga bo nye na a yené mvaé e be évete ya nda mimbôk. 22Evete ya nda mimbôk é nga kalane Yôsep mimbôʼô mise mi mbe nda mimbôk, a mam mese me mbe me bobaʼan été me mbe me lôtôk e be nye. 23Evete ya nda mimbôk é mbe teke beta fombô mam mese Yôsep a mbe a bili e mo mé, amu Nti a mbe be nye: Nti a mbe a boʼo na mam mese a bo me wulu mvoʼé .

Currently Selected:

KALATE METATAʼA 39: BULU09

Highlight

Copy