KALATE METATAʼA 23

Awu Sara. Njamane soñe wé e mbas akoʼo ya Makpéla

(Met 25:7-10; 49:29-32; 2 S 24:20-24; Yer 32:8-12)

1Sara a nga nyiñe mimbu 127; mimbu yʼényiñe jé mi mbe abime te. 2Sara a nga wu e Kiryat Arba, nalé a ne na Ebroñ, e Kanaan; a Abraham a nga zu asu ya bo awu Sara a yône nye. 3Wôna Abraham a nga kôlô si, a liʼi mbime minga wé, a kobô Behitite na: 4Me ne ntabe a nyô a too meyôa be mia; vaʼane ma éfuse si awu be mia, nalé ma ye bo nguleya jame mbime minga wom a kee nye ôyab a vôme me too. 5Behitit be nga yalan Abraham na: 6Vôʼôlôʼô bia, a Monti! Ô ne e nkpweʼe mone Zambe ézezañe jangan; jamek e mbime minga wôé e jia ya mesoñe mangan wo ye top; teke wua ya be bia a ye bene ve wo soñe jé na ô jame mbime minga wôé. 7Abraham a nga kôlô si a kute meboñe si asu bôte ya si éte, asu Behitit. 8A nga kobô be na: Nge é ne nkômbane wônane na me jame mbime minga wom ô ke ma ôyap, vôʼôlaʼane ma, a litaʼane Efroñ, e monafame Sôhar nsili wome na, 9a kuane ma mbas akoʼo ô ne Makpéla ô too éñwé, e ngbwaʼa afube dé; a kuʼane ma wô tañe moné ja yiane wô, nalé ate wo ye volô ma ane afube mesoñ ézezañe jenan.

10Efroñ a mbe a too baa Behitit. Efroñ mone Hitit, a nga yalan Abraham Behitit bese be too a ba bese be mbe be nyiʼine mbé ya tisone jé na: 11Momo, a Monti, vôʼôlôʼô ma! Ma ve wo afup a ve fe wo mbas akok ô ne été. Ma ve wo de bôte yʼayoñe dam be bômô ane ékôp: Jamek mbime minga wôé. 12Abraham a nga kute meboñe si asu bôte ya si éte. 13A nga kobô Efroñ avale di, bôte ya si éte be too na: Wo fe vôʼôlôʼô ma! Ma tote tañ afup; kañeseʼe je mfaʼa wom; a ma ye jame mbime minga wom été. 14Ve Efroñ a nga yalan Abraham na: 15A Monti, vôʼôlôʼô ma! Si ja kui besikel be moné 400#23:15 É ne jé e zañe jôé a ma? Jamek mbime minga wôé! Sikel jia é ne gram 11,4; besikel 400 be ne 4560 gram nge 4,560 kg. 16Abraham a nga wôʼô Efroñ a veʼe nye moné a nga tot, Behitit be too; besikel be moné 400 e ba ba belane be makit melu mete. 17Nalé ate afube Efroñ e Makpéla, zoʼone Mamré, afup a e mbas akok ô mbe été, bilé bise bi mbe e minné ya afup, 18bi nga suʼulane bo ngab Abraham, Behitit be too a ba bese be mbe be nyiʼine mbé tison. 19Mvus éte Abraham a nga jame minga wé Sara, e mbas akoʼo yʼafube Makpéla, zoʼone Mamré, nalé a ne na Ebroñ e Kanaan. 20Afup a mbas akok ô mbe été bi nga bo afube mesoñ Abraham, nkusane be Behitit.

Currently Selected:

KALATE METATAʼA 23: BULU09

Highlight

Copy