MIMBOONE MINLÔMAN 7

Nkañete ya mvôʼô Israél ane Etienne a kañete

(Mm 6:9-15; Sam 105:26-45; Hé 11:23-29; Yoa 5:45-47; 1 Bb 8:12-27)

1Ntuni nnen a nga sili nye na: Ye e ne bebela nalé? 2Etienne a nga yalan a jô na: Bobejañ a betate, vôʼôlaʼan! Zambe, Nyô a ne étôtok, a nga yené e be Abraham ésaa wongan, éyoñ a nga to Mézôpôtami, valé a ngenan te tabe Karañ. 3Ane a nga jô nye na: Kôlôʼô si jôé, e be nda bôte jôé, ô ke si ma ye liti wo. 4Ane Abraham a nga kôlô si Bekaldééñ a ke tabe Karañ. Wôna, mvuse awu ésaa, Zambe a nga bo na a lôte si mi to nyô éyoñe ji. 5A nji veʼele ve nye ngab éziñ ya si éte, jaʼane ve vôm ya telé abo. Ve a nga kaʼa nye, a mvoñe bôte jé na, a ye suʼulane ve nye je, nalé fe mvoñe bôte jé, valé a wuya, akusa bo éyoñe te a ngenane te biaé. 6Ane Zambe a nga kobô na: Mvoñe bôte jé ja ye bo ntabe éza si. Ba ye veñesane je belo a tibili je nté ya mimbu mintete minyin. 7Ve ma ye tyiʼi ayoñ ba ye tabe éto belo si ajô. Nalé ma, Zambe, ma jô. Wôna mvus éte, ba ye kôlô a kañe ma vôm ate. 8Ane a nga bo nye élat a ndeme ntyiʼiban atyel. Amu ajô te, éyoñ a nga biaé Izak, Abraham a nga tyiʼi nye atyel e môse muame. Izak a nga bo avale da e be mone wé Yakob. A Yakob fe a nga tyiʼi bemvamba awôm a bebaé metye.

9Bemvamba, amu aban , be nga kuane Yôsep a ke si ya Ejipte. Ve Zambe a nga to e be nye. 10Ane a nga vaa nye minjuk été, a ve nye fek, a bo na a yene mvam e mise me Faraoñ, njôô bôte ya Ejipte, a ngume nda wé ôse. 11Beta mfumbale zaé a nga kui si ya Ejipte, a si ya Kanaan. Mebua me mbe abui. A betate bangan be mbe te ngul ya bi bidi. 12Eyoñe be nga wôʼôtane na bidi bi ne Ejipte, Yakob a nga lôme beésa bangan wé éyoñ ôsu; 13éyoñe baa be nga beta ke, Yôsep a nga bo na, bobenyañ be yeme nye. Eyoñe te fe Faraoñ a nga bi ñyemane ya abialé dé. 14Eyoñe te Yôsep a nga lôme na be ke nyoñ ésaa, a bivuvumane bié. Bese be mbe bôte mewôme zamgbwal a betan. 15Ane Yakob a nga ke Ejipte. A nga wu fe wé a bʼésaa bangan. 16Be nga beʼe be a kee be Sikem a jame be soñ Abraham a nga kus a moné, e be bon be Hamor ésaa Sikem. 17Eyoñe melu me beta ngakaʼa Zambe a nga kaʼa Abraham me nga subu bebé, bôte be nga fôé a kôʼôlan abui Ejipte, 18akekui éyoñe mfefé njôô bôt ô nga teléban Ejipte, nye a nji tame yeme Yôsep. 19A feʼe meduʼan, njôô bôt ate a nga tebe bia ngame yat a kui vôme ya bo na, minkeñelé mi bone beésa bangan mi bo te nyiñ. 20Melu mete mme ñhe Môze a nga bialé. A mbe abeñ mise me Zambe. Nté ngon éla, be nga yale nye nda be ésaa. 21Vʼéyoñe be nga kulan abialé dé, ngone Faraoñ é nga nyoñe nye, a yale nye aval ane mon wé émien. 22Môze a nga yaé a ñyemane mame ya Ejipte. Mejô mé a mimboone mié, bi mbe ngul.

23Eyoñ a nga kui miaé mimbu mewôm menyin, ôsimesane ya ke koone bobenyañ, mvôʼô Israél ô nga kui e be nye. 24Eyoñ a nga yene be kpweʼeleʼe wua ya bobenyañ, a nga kame nye a wôé mone Ejiptieñ. 25A nga kômbô bo bobenyañ be yeme na, Zambe a ye belane nye, mfaʼa ya nyii be. Ve be nji wôʼô jame te. 26Tyé kpwaa, a nga beta yené ane mvañ e zañe ya bôt be nga bo mintañete, a jô be na: A bemôô, mi ne bobenyañ, amu jé mia bo ntañete? 27Ane nyô a mbe nté ntañete a nga bene njôane Môze a jô na: Za a nga telé wo évet, a ntyiʼi mejô e zañe jangan? 28Ye wo kômbô wôé ma, ane ô nga wôé mone Ejiptieñ angôʼé. 29Eyoñe Môze a nga wôʼô mejô mete, ane a nga tup a ke si fe, si ya madian. Vôm ate a nga biaé bon bebaé. 30Mvuse mimbu mewôm menyin, ane Engele a nga yené e be nye, e nkôte si ya nkôle Sinayi, e nkabaʼa nduan ya mone ésaé a nga dik. 31Môze, feʼe ne vema, a nga kômbô subu bebé na a yen étua jame te. Ane tyiñ Nti é nga so, é jôʼô na: 32Me ne Zambe bʼésoo, e Zambe Abraham, Izak a Yakob. Wôna Môze, njalan a befôʼô fôʼô, a mbe te ngule ya beta fombô. 33Ane Nti a nga jô nye na: Vaʼa besilefas mebo môé, amu vôm ô tele, a ne si é ne étyi. 34Yaa, me yeneya éngôngol ényiñe ya bôte bam e si ya Ejipte, a me wôʼôya miñyône miap. A me zuya kôté be. Eyoñe ji ma ye lôme wo ô ke Ejipte.

35Môze, nyô be nga ben, be jôʼô na, za a nga telé wo évet a ntyiʼi mejô, nye ñhe Zambe a nga lôm a bo évet a nkôté , a nkatane foé éngele a nga yené nkabaʼa nduane ya mone ésaé a nga dik. 36Nye ate a nga vaa be si ya Ejipte a mboone bitua bi mam a mendem: évele mañ, a nkôte si tañe mimbu mewôm menyin. 37Môze ate nye, a nga jô mvôʼô Israél na: Zambe a ye ve mia nkulu mejô, a soʼo e zañe bobenyoñ, aval ane ma. 38Nye ate, e nsulaʼane ya nkôte si, a nga tele ézezañe bʼésa bangan, a éngele a nga bo a kobôʼô nye nkôle Sinayi. Nye ñhe a nga nyoñe mejô ya ényiñe na a kalane bia. 39Ve bʼésaa bangan be nji kômbô ve nye mewôk. Be nga bene wôʼô nye, a beta bulane Ejipte a zene ya asimesane dap. 40A be nga jô Arone na: Boʼo bia bezambe ba ye wulu ôsu viangan, amu bi nji yem e vôme Môze a nga soo bia Ejipte a ntoo. 41Melu mete be nga lui mone nyak a ve éveʼela te bityiʼa a kañ ésaé ya mo mabe te a mevak. 42Ane Zambe a nga lume be mvus a kalane be mo me nsamba mewosane ya yôp, aval ane e ne ntilane kalate bekulu mejô na: Nté ya dulu denan e nkôte si,

tañe mimbu mewôm menyin,

ye mi nga ve ma bityiʼa a metunaʼa,

a nda bôt Israél?

43Mi nga beʼe nda éndelé Molok

a ôteté zambe wônan Refañ

biveʼela mi nga bo bite na, mi kañ.

Ajô te ma ye wua mia e Babilône yat.

44E nkôte si, betate bangan be nga bili nda éndelé ane ngaa. Nyô a nga bo a kobôʼô Môze, a nga bendé nye na, a lôñe je, éveʼela ane a nga liti nye. 45Eyoñe betate be nyoñeya je, be nga nyiñili je si be nga wôlé meyoñe Zambe a nga ve be ngule ya titan ôsu viap. Nda éndélé éte é nga tabe a kui melu me David. 46Ve nye, a nga yene mvam e mise me Zambe, ane a nga sili nye maʼa ya lôñe étabaʼa asu Zambe Yakob. 47Ve Solômon, mone wé, nye a nga lôñe je. 48Ve e ne na, nyô a dañe yôp, a ne te tabe menda me ne nlôñan a mo me bôt. Aval ane nkulu mejô a nga jô na:

49Yôp e ne éto njôane jam,

a si, ételé mebo jam.

Nda fé mia ye lôñe ma,

nalé Nti a jô,

a vôme ya woʼone wom a ye bo vé?

50Ye sa wo wom

ñwô ô nga té biôme bite bise?

51Mia, e bôte metyiñe me tele minkes, minsôsol ke minlem, a minsôsol e melo. Mia bene tyiñe nsisim; mi ne foʼo ve ane beésoo benan. 52Mbé ya bekulu mejô bʼésoo benan be nji wôé? Be nga wôé, jaʼane ba be nga taté kate foé ya nsoone môt a ne zôsôô , nyô émien mi nga koñ a wôé e melu menan. 53Mi nga nyoñ atiñe ya bʼéngele be nga yôtan, a mi nji baʼale de.

Awu Etienne

54Mejô mete me nga tyaʼa be minlem, a be nga late mesôñ a wôʼô Etienne abé . 55Ve nye, njalan a Mfufube Nsisim, mise me lôô ve yôp, a nga yen étôtoʼo Zambe, a Yésus a tele mbo nnôme wé. 56A nga kobô a jô na: Tame yen, me lôô yôp e yoo, a Mone Môt a tele mbo nnôme Zambe. 57Ane be nga bam a dibe melo. 58Ane bese, éyoñe jia, be nga bi nye, a ke ba sôʼôlô nye tison atan, a lume nye mekok , a wôé nye. Bengaa be nga bôôé biyé biap e mebo me ndôman é mbe jôé na Saül. 59Eyoñe be nga wôé nye, Etienne a nga yeʼelan, a kobô mejô ma: a Nti Yésus, nyoñe Nsisim wom. 60Ane a nga kute meboñe si a suʼulane kobô tyiñe ngule na: A Nti, te ve be mekua ya abé di. Eyoñ a nga mane jô nalé, ane a nga wu.

Currently Selected:

MIMBOONE MINLÔMAN 7: BULU09

Highlight

Copy