MIMBOONE MINLÔMAN 4

Pierre ba Yôanes asu betyiʼi mejô

(Mt 10:17-20,26-33; Yoa 15:20-21; 1 Pi 3:14-15)

1Pierre baa Yôanes be ngenan be kobôʼô bôt, ane betuni, njôô ya nda Zambe a Besadusieñ be nga suan. 2Be mbe ñyaan, amu be nga yene be kele ôsu a yeʼele bôt, a kañete be ajô ñwômane miñwuan, be litiʼi Yésus ane éveʼela. 3Ane be nga bi be a futi be mimbôk, akekui tyé ya valé, amu éyoñe te ngôʼé é ntoo. 4Abui bôte ya e nga wôʼô Mbamba Foé e nga buni, bebé toyini étan. 5Tyé kpwaa ya valé, nje ñhe bivet, bemvendé a beyem bekalate be nga too Yérusalém, be nga sulan. 6A mbe été na: Anne ntuni nnen, Kaéfe, Yôanes, Alékzandre a bibuʼa bise ya menda me bôte betuni benen. 7Ane be nga bo na Pierre baa Yôanes be zu tebe ôsu viap a taté sili be minsili avale di: ngule fé, a jôé za, mi nga belane je asu ya bo jame te? 8Pierre, njalan a Mfufube Nsisim, a nga yalan a jô be na: 9A bivete ya bôt a bemvendé ba boʼolô bia den, amu bi nga bo ñyeyem mvaé, na bi kat, a zene fé môt ate a nga nyiiban. 10Mia bese, a mvôʼô Israél, yenane na: Maʼa, amu jôé Yésus Krist ya Nazarét nye mi nga tyelé krôa yôp, a wômô miñwuan, nde môte mi lô nyô a yeteya.

11Nye ate, akoʼo mia belôñ mi nga ben,

e suʼulaneya bo akoʼo ya jua.

12Nyian ô nji bo vôme mfe éziñ. Amu teke jôé afe jôp si va, e ne mveban e be bôt na, bi yen ényiñ été. 13Eyoñe be nga yene mbunane Pierre baa Yôanes be nga bili, be yeme ke avale bôt be nga too, teke ayéʼé, be nga semé. Ve da, be nga too nsamba Yésus. 14Be nga fombô môt a nga saéban a tele be bebé, ajô te be mbe tee éfia.

15Ane be nga ve tyiñe na, be vaa be ékôane betyiʼi mejô été. Ane be nga liʼi be fasek. 16Be nga sili bebiene na: Bia ye bo bôte ba aya? Ve da, e ne été na, mbe be nga bo étua jame ji. E jame di, e ne teke asolé e mise me bôte bese ya Yérusalém, a bi se ngule ya sôan. 17Ve jame da, bia yiane telé e mam ma ye tôñe mboone wu e be bôt. Bia zu bame be a bisisia na, be bo te ke ôsu a kañete môt éziñ jôé ete. 18Ane be nga loone be a tyili be na, be bo te tot nge yeʼele bôt jôé Yésus. 19Ve Pierre ba Yôanes be nge yalan a jô be na: Jʼéne zôsôô mise me Zambe, ye vôʼôlô Zambe ye mia? 20Mia bebien tyiʼan; ve mfaʼa wongan, bi se nguleya bo te kobô mam bi nga yen a wôk. 21Eyoñe be jaéya sise be, ane be nga suu be, amu be nji bi nya éfia ya ve be mekua a na, be nga ko bôte woñ. Amu bôte bese be nga ve Zambe duma, amu étua jam é nga boban. 22E môt a nga bi maʼa ya étua mvoʼé ji, a mbe miaé ya lôte mimbu mewôm menyin.

23Eyoñe be suuya be, Pierre ba Yôanes be nga ke koone bôte ya nsamba wop, a kate be jôm ése betuni benen a bemvendé be nga jô be. 24Ane be nga vôʼôlô be. Wôna, bese ôyili wua, be nga kobô Zambe a bifia bi?

A Njôô, wo ô nga té yôp a mañ,

a biôm bise bi ne été.

25Wo, a ngule ya Mfufube Nsisim,

ô nga futi mejô ma anyu mbo ésaé wôé

David na:

Amu jé memvame meyoñe ma,

a bemomo mimboone mi bôte ya meyoñ ,

26a bejôô bôte ya si nyô be nga lat,

a bivet bi nga sulan a bo jôme jia,

asu ya wosane Nti

a éñwé a ne ñwoʼone mbon?

27Yaa, e ne bebela na, be nga koone tison été, Hérôde a Ponse Pilate, meyoñ bikule mese a bôte ya mvôʼô Israél na, be tebe Yésus e ngame yat, Mfufube Mbo Esaé wôé, nye ô nga woʼo mbon. 28Nalé ate be nga jalé mefeʼe mese ô nga bôndé a telé a wo wôé a nkômbane wôé. 29Nde éyoñe ji a Nti, fombôʼô bisisia biap a, vaʼa bebo bisaé bôé ngule minleme ya kañete ajô dôé. 30Ajô te, same wo wôé, nde bôt ba ye saéban, mendem me yené a bitua bi mam bi bobaʼane a jôé Yésus Mfufube Mbo Esaé wôé. 31Nda be nga to é nga fôʼôsan éyoñ be nga sondô meyeʼelan. Bese be nga jaé ne lut a Mfufube Nsisim. Ane be nga kobô ajô Zambe a ngul ése.

Fufulu ényiñe bebuni

(Mm 2:44-47; 1 Jn 3:16-19; Lk 12:33; 2 Ko 8:13-15)

32Ezuʼu bôt é nga buni, be nga too nleme wua a nsisime wua. Teke môt ya be be a nga nyoñe biôm bié ane miene. Ve be nga belane biôme bise fufulu. 33Beta ngul a nga yené nkañetane minlômane mi nga kañete ñwômane Nti Yésus, a beta mvam a nga too be be bese. 34Teke môt ya e be be a nga too nzezak. Ba bese be nga bili mesi nge menda, be nga kuane me a zu tañe ya été mebo minlôman. 35Môt ase a nga nyoñe ngap aval ane minkômbane mié mi né.

36Nalé ate Yôsep, nye minlôman mi nga yôlé jôé afe na Barnabas, nalé a tinane na môt a nee ngule nlem , a nga bili afup. A mbe môte ya mvôʼô Lévi. 37A nga kuan afube dé a soo tañe jé a bôôé je e mebo minlôman.

Currently Selected:

MIMBOONE MINLÔMAN 4: BULU09

Highlight

Copy