MIMBOONE MINLÔMAN 22

1A bobejañ a betate, vôʼôlane mejô ma zu kobô mia mfaʼa ya kame mamien. 2Bôte be nga ke ôsu a dañe ku bivô éyoñ be nga wôʼô na Paul a zu kobô nkobô Beyude. 3Me ne mone Beyude. Me nga bialé Tarse, afôla ya Silisi. Ve da, e tison nyô nje me nga yaé a nyoñ ayéʼé, e fefele Gamaliél, teke selan ane metiñe ya beésa bangan me né. Me nga nyeʼe ajô Zambe ndindima, foʼo ve ane mia bese mi né éyoñe ji. 4Me nga kpweʼele zene nyô, jaʼan a kui vôme ya wôé bôt be nga tôñe je. Me nga bi bôt, befam a binga, a kee be nda mimbôk. 5Ntuni nnen, a nsamba bemvendé, be ne ngule ya bo bengaa. Mbe be nga ve ma bekalate ya bobenyañe bangan, éyoñ me nga ke Damas, nlômane ya ke kak a zu be Yérusalém, mfaʼa ya ve be melep e be ba be nga to wé.

6Me to dulu zañ, bebé Damas, atemeteme na, bebé zañe môs , beta éfufup a soʼo yôp, a nga bômane ma a minkôkô mié. 7Ane me nga ku si. Me nga wôʼô tyiñ é jôʼô me na: A Saül, a Saül, wo kpweʼele ma a jé? 8Ane me nga yalan a jô na, ô ne za a Nti? Ane tyiñ é nga beta so, é jôʼô na: Me ne Yésus ya Nazarét, ma wo kpweʼele! 9E bôte bia be be bi nga too nsamba, be nga yen éfufube te, ve be nji wôʼô tyiñ é nga kobô ma. 10Ane me nga sili na, e ne ñhe me bo aya a Nti? Ane Nti a nga yalane ma a jô na: Kôlôʼô si ô ke Damas. E wé, nye ba ye tuʼa kate wo ésaé é vebaneya be wo. 11E nde bôte bia be be bi mbe nsamba be nga bi me wo, a kui Damas. Amu minkôkô mi éfufube te mi nga kpéeé ma ndim.

12Môt éziñ a nga too, jôé na, Ananias, a mbe môt a ne zôsôô , mbaʼale metiñ. A nga bili mbamba nkañete e be Beyude bese be nga to valé. 13Ane a nga zu yene ma, a jô me na: A Saül, mojañ, mise môé me kuʼiban a yen. Eto te ébien, e mise mam me nga kuiban a yen émien asu. 14Ane a nga jô me na: Zambe ya beésa bangan a boya na, ô yeme nkômbane wé. O yeme nyô a ne zôsôô , a wôʼô tyiñe jé émien. 15Wo yiane bo ngaa wé, e mise me bôte bese, mfaʼa ya mam mese ô maneya yen a wôk. 16Jé wo ye beta sili, zaʼa bi ke. A ntoo ve duban a tunebane mfaʼa ya mam abé môé, a loone jôé dé. 17Eyoñe me bulaneya Yérusalém, me nga too me boʼo meyeʼelan e nda Zambe été. 18E nga kui ma môs éziñe na, me ku si ne vema a yene Nti, a jôʼô me na: Kôlôʼô Yérusalém avôl, teke yange. Amu bôt baa ye ke buni nkañete wôé ajô dam. 19Ane me nga yalane na a Nti, ke ba tuʼa yeme na, ma me nga ke e meba me Zambe Beyude a bi bôt, a kee be nda mimbôk, a bôme ba bese be nga buni wo. 20Jaʼane Etienne, e zôsôô nkañete wôé, éyoñ metyi mé me nga kui, ke me mbe valé, me kañeseʼe mboone bewôé bôt bete. Me nga bo fe me baʼaleʼe mengômesane map. 21Ve Nti a nga jô me na: Kele mfaʼa ma jô wo. Amu mfaʼa wo dañ ôyap, e be meyoñe bikuu, ñwô ma lôme wo.

22Beyude be nga wôʼô mejô Paul a nga kobô, be nga bete metyiñe yôp a jô na: Be vaʼa avale môte di e si nyô, a nji yiane nyiñ! 23Amu be nga bo be bamek, a wua melôʼô map e mbuluk été, 24évete bezimbi é nga bendé na, be nyiñeli Paul e nda mimbôk été, a bôme nye, ndemben ba ye yem amu jé abui zôʼé da bo, a za éfia ba boʼolô nye. 25Eyoñe be nga ye buti Paul si na be bôme nye, ane Paul a nga jô mone bezimbi a mbe vaa na: Bialébialé éjôé ya Rôme, éyoñ be ngenane te tyiʼi ajô dé, ye ô bili ngule ya bôme nye? 26Eyoñe mone bezimbi a nga wôʼô njôan ôte, a nga ke jiʼa kate ntebe ôsu: wo ye bo aya? Môt a ne mone nlame ya éjôé ya Rôme! 27Ane évete bezimbi é nga beta zu sili Paul na: Kate ma, yʼône mone nlame ya éjôé ya Rôme? Paul na ya! 28Ane évete bezimbi é nga jô na: Me nga bi ngul éte a tañ anen. Paul a nga jô nye na: Ve ma, me bili je aso abialé. 29Bôt be nga ye bôme nye be nga jôʼé été été, ve mfaʼa évete bezimbi, woñ ô nga bi nye nlem éyoñ a nga yeme na mone nlame ya éjôé ya Rôme nye a kôme baʼale nkaʼane ngataʼa.

Paul a kat ajô asu Sanédreñ

(Mm 23:28; Mt 23:27-28; 10:16)

30Tyé kpwaa, ane a nga tyiʼi na, a tuʼa yeme zʼajôô Beyude ba boʼolô Paul. A nga bo na be tiine nye mengataʼa. Ane a nga bendé na, betuni benen be sulan fufulu a Sanédreñ. Ane a nga lôme Paul a ke kobô ajô asu dap.

Currently Selected:

MIMBOONE MINLÔMAN 22: BULU09

Highlight

Copy