MIMBOONE MINLÔMAN 2

Môse Pañtekôt

(Mt 3:11; Yoa 14:16-17,26; 1 Ko 12:13)

1Eyoñe môs ya Pantekôt ô nga kpwaan, bese be nga too nsulane vôm wua. 2Atemeteme na, éduñ é nga so yôp aval ane ngul évuñulu ôkôs; nda be nga too, é nga jaé ne lut a éduñe te. 3Nde, jôm é funaʼan ayeme nduan, é nga salane zañ, a bebe môt ase ya été nlô yôp. 4Bese be nga jaé ne lut a Mfufube Nsisim. Ane be nga kobô minkobô mife ane Nsisim a nga liti be.

5Be Yude be nga too Yérusalém, be nga ko Zambe woñ, be soʼo e be meyoñ mese ya yôbe si. 6Nwôʼôtane be nga wôʼôtane zôʼé, ndula bôt a nga sulane mengôs mengôs, amu môt ase a nga wôʼô be kobôʼô nkobô wé. 7Feʼe ne vema a, njalan a mekômbaʼa, be nga sili bebiene na: Bôte bese ba kobô ba, ye be nji bo bôte ya Galilé? 8Da bo aya na, môt ase ya be bia a wôʼô be kobôʼô nkobô a nga bialé wô? 9Beparte, Beméde a Beélamite, bôte ya Mézôpôtami, Yudé a Kapadôs, Poñ a Azi, 10Frigi a Pamfilie, Ejipte a Libie, Sirénayik, ba ya Rôm be to va, 11bese, toʼo Beyude, toʼo Beprôzélit, bôte ya Krét a Bearabe. Bia wôʼô be kobôʼô bitua bi mam bi Zambe e minkobô miangan. 12Bese be nga to feʼe ne vema a semé, a sili e zañe jabe na, e jame di e ne aya? 13Ve bevok be nga viane kpweʼele be be jôʼô na: Ke be jaéya ne lut a mfefé woon.

Nkobô Pierre

(Yo 3:1-5; Mm 1:8; Lk 24:47; Mm 3:13-26; 10:34-43)

14Pierre a nga too valé, baa beyéʼé awôm a wua. A nga nyoñe nkobô a jô na: A bôte ya Yudé a mia bese mi too Yérusalém, tukaʼa yemane jam da boban a baa melo, mi wôk mejô mam. 15Bôte ba, be nji soʼo meyok ane mia veʼe feʼe; ke mewolo ébul ya mametyé e nye nyô. 16Ajô nkulu mejô Yôél a nga kulu, nde da bobane dene di, 17éyoñ a nga kobô na:

Melu ma suʼulan,

Zambe a nga jô na,

ma ye sôé Nsisime wom e be minsône mise.

Bobefam benan a bobebinga benan

ba ye kulu mejô,

bisoé bienan bia ye yene mam e nsisim été,

a minnôme mi bôte mienan

mia ye yeme biyeyem.

18Yaa, bebo bisaé bam,

befam a binga,

ma ye sôé be Nsisime wom melu mete,

a ba ye bo bekulu mejô.

19Ma ye bo bitua bi mam mfaʼa ya yôp,

a mendem mfaʼa ya si,

metyi, nduan a nsum ôtita.

20Jôp da ye veñesane dibi

a ngon kʼéveñesane metyi.

Valé beta môse ya duma Nti

a ngenane te so.

21Nde bôte bese,

nyô a ye loone jôé Nti a ye nyiñ.

22A mvôʼô Israél, vôʼôlaʼane mejô mam. Yésus ya Nazarét, môte Zambe a nga ve ntute ngule zañe jenan, a bo bitua bi mam; mam ya semé, a mendem aval ane mia yem. 23Môt ate, aval ane ngumba ntaʼane Zambe, édoʼo ya ñyemane wé, mi nga kuane nye, a wôé nye krôa yôp, e mo me mbia be bôt. 24Ve Zambe a nga wômôlô nye, a kandane mintaé ya awu, amu awu e mbe te nguleya bi nye e ngule jé été. 25Nalé fe na, David, a nga kobô ajô dé a jôʼô na:

Me nga lô Nti ôsu viam éyoñ ése,

amu a ne ma mbo nnôm,

mebo me za téé ma si.

26Nde nlem wom ô nga vak,

a anyu dam e nga yia bia mefôn.

Mvoʼé a ndi nlem , minsôn miam mia ye woʼon.

27Amu wo ye bo te liʼi ényiñe jam e vôme ya miñwuan,

a éñwôé ô nga top, a ye bo te boé soñ.

28O nga liti ma mezene ya ényiñ,

wo ye jalé ma a mevak,

e fefele jôé.

29A bobejañe bam, me ne jô mia de a ndi nlem ése na: Mvamba David a nga wu, ane a nga jambane soñ. Soñe jé é ngenane be bia a kui môse wu. 30Ve a mbe nkulu mejô, a nga yem na, Zambe a nga kalan a kane ngana na, a ye tooé môte ya mvoñe bôte jé éto njôane jé, mbialan e metyi mé émien. 31David a nga yen ôsu ya ñwômane Krist a, amu ajô dé, nde a nga kobô na: Enyiñe jé é nji liʼi vôme ya miñwuan, a minsoñe mié mi nji boé soñ. 32Yésus ate nye Zambe a nga wômôlô. Bia bese bi ne bengaa. 33Mbetane yôp e mbo nnôme Zambe, nde a nga nyoñe Mfufube Nsisim a mbe ngakaʼa e be Esaa, a nga miase nye avale mi lô a mia wôʼ ô di. 34David a nji ke foʼo ke yôp, ve a nga kobô na:

Nti a nga jô Nti wome na, tabeʼe si e fefele ya mbo nnôme wom,

35akekui ma ye bo besiñe bôé jôme ya telé mebo.

36Nda bôt Israél é tukaʼa yem ajô di ne sañesañ na: Zambe a boya nye Nti a Njô bôt, Yésus mi nga tyelé krôa . 37Eyoñe be nga wôʼô mejô mete, ane me nga fôʼô be minlem, be nga sili Pierre a minlômane mivoʼo na: A bobejañ, bia ye bo aya? 38Ane Pierre a nga jô be na: Kôñelaʼane minlem; môt ase ya be mia a duban a jôé Yésus Krist, ajô njamane mam abé mé, wôna, mia ye nyoñe mveane Mfufube Nsisim. 39Amu ngakaʼa é ne énjenan, nyô benyô bon , nyô ba bese be ne ôyap, toʼo be ne abime abui ese Nti, nyô émien a ne Zambe a ye loon. 40Pierre a nga ke ôsu a kañete be mejô mefe abui, a ve be ngule nyô aval ane njôane wuna ô né na: Nyiʼane miabebien ézezañe ya mbia miaé bôte wu. 41E bôte be nga dutuban a mejô mé, be nga duban. Be mbe bebé bôte toyini éla, be nga tôñe be.

Nsamba bebuni ya atataʼa

(Zak 12:10; Yoa 16:8; Mm 4:4,32-37; Lk 5:10)

42Be nga semé nyeʼelane Minlôman, a fulane minlem ane bobenyañ, ajô mbeʼane fembé a mboone meyeʼelane. 43Woñ ô nga bi bôte bese. Minlôman mi nga bo bitua bi mam a mendem. 44Bôte bese be nga buni, be nga to nlatan a belane biôme fufulu. 45Be nga kuane mesi map, a biôm biap, a kabane moné ya été, aval ane minkômban mi môt ase mi mbe. 46Tyiñe jia, be nga bo mbane ya ke nda Zambe. E menda mab été, be nga beʼe fembé, be jaʼa fe bidi a minleme njeʼeban. 47Be nga kañe Zambe, a bôte bese be nga nyoñe be mvoʼé . Môs ôse, Nti a nga bo a kôʼôlane bôt be nga yene ényiñe nsamba wop.

Currently Selected:

MIMBOONE MINLÔMAN 2: BULU09

Highlight

Copy