MIMBOONE MINLÔMAN 11

Nkatane Mbamba Foé Pierre e Yérusalém

(Mm 10; Ef 2:11-22; Tt 2:11; 1 Tim 2:4)

1Minlôman a bobenyañe be nga tabe Yudé. Be nga wôʼôtane na, meyoñe bikuu me ke me nyoñeya Ajô Zambe. 2Eyoñe Pierre a nga ke Yérusalém, baa be bôte be mbe ntyiʼane metyel be nga sañetan abui, be jôʼô nye na: 3O keya nyiin ézezañe ya bôte be ne minsôsol a di a be. 4Ane Pierre a nga beta faé be éfufube yʼajô te ataté metataʼa a kui amané a jô na: 5Me nga to tisone Yôpé, me boʼo meyeʼelan. Ane me nga ku avem a yene ñyenane wu: jôm, ane beta ntuʼu éyé, mesu menyin, é soʼo yôp a ku si vôme me nga too. 6E mise mam me nlôô je ne fonoo, me fasek; Me nga yene betite ya si ba wulu a mebo menyin, betite ya fé ba woñ a mebum a ba ba yele yôp. 7Ane me nga wôʼô tyiñ é jôʼô me na: Avôl a Pierre, wôék ô di. 8Ane me nga jô na teke bebé a Nti. Amu ényiñe jame, teke jôm é ne mvin nge étyi, ja ke anyu dam. 9Tyiñ é nga beta so yôp éyoñe baa, é jôʼô na: E jôme Zambe a tuneya, wo, te yene je mvin! 10Nalé a nga baʼalane biyoñe bilaa, ane jôme te é nga bulane yôb été. 11Wôna éyoñe te ébien, bôte belaa be ntele me fefele nda été, e vôme bi nga too. Be mbe minlôman, be soʼo Sézaré. 12Ane Nsisim a nga jô me na, me ke, te bo meveñ, bia be be. E bobejañe besamane mi lô ba, be nga ke me liti. Ane bi nga ke nyiine nda môt émien a nee ajô. 13Ane a nga kañete ane a nga yen éngele nda jé, a jôʼô nye na: Lôme bôte Yopé, be ke loone Simon ane jôé afe na Pierre. 14A ye liti bibubua mise môé, mbie bia ye zuu nyiane be womien, a bôte bese ya nda jôé. 15Ve nné ane ma taté nkobô, ane Mfufube Nsisim a nga zu e be be, avale fe ane a nga bo e be bia atataʼa. 16Ane me nga simesane njôane Nti wuna na: Yôanes a nga ve bôte nduan a mendim, ve mia, mia ye nyoñe nduan a Mfufube Nsisim. 17Nge Zambe a nga ve bôte bete avale mveane mvame da ane bia bevok, amu bi nga buni Nti Yésus Krist, ma me mbe za, ane me mbe kamane mboone Zambe? 18E mvuse ya mejô ma, e bôte be nga wôk, be nga volôbane minlem a tabe ne mieññ a kañe Zambe a jô na: Zambe a veya meyoñe bikuu nkôñelane nlem wo kee môt ényiñ.

Keké ja teléban Antiôche

(Mm 8:4; 1 Tes 1:9-10; Kôl 2:6-7; Rm 15:25-27; Ga 6:9-10)

19E ba be nga tub ékpweʼele éyoñ Etienne a nga wu be nga kui Fénésie, Sipre a Antiôche, ve te kate bôte befe ajô Zambe, vengevenge ve Beyude. 20Ve da, bôte bevoʼo ya be be, bebialé bialé ya Sipre a Siréne, éyoñe be nga kui Antiôche, be nga kate fe Begrék Mbamba Foé Nti Yésus. 21Nti a nga suʼu be, avale ya na, e tañe bôt é nga kôñelane minlem a buni, é nga bo abui. 22Foé ya ébubua jame te é nga kui melo me keké ya Yérusalém. Ane be nga lôme Barnabas Antiôche. 23Eyoñ a nga yen ane mvame Zambe ja bo ésaé vôm ate, nleme wé ô nga jaé a mevak. Ane a nga tindi be na, be bulu late Nti a minleme miabe mise. 24Emien a mbe môt a ne Zôsô, njalan a Mfufube Nsisim, a mbunan. Nkunda bôt ô nga kôñelane be Nti. 25Ane Barnabas a nga suʼulane ke jeñe Saül e Tarse. 26Ane a nga yene nye wé a bulane nye Antiôche. Bese bebaane be nga tabe keké éte. 27Melu mete, bekulu mejô be nga bo be kôlôʼô Yérusalém a ke Antiôche. 28Wua ya été a too jôé na Agabus, a nga kate bôt a éfufube ya Nsisim na: Beta mfumbale zaé a ye kui si ése. A a nga kui melu me Claude. 29Ane beyéʼé be nga tyiʼi na ba ye lôme mvolane e be bobenyañe be to Yudé, abim ane fôʼô jap é né. 30Ane e nga bo nalé. Atôme ya be bemvendé e nde Barnabas baa Saül be nga kee de mo.

Currently Selected:

MIMBOONE MINLÔMAN 11: BULU09

Highlight

Copy