Romê-na 11

Alona mi ar nga Israel-lâ woi d’i

1An nga ni djop ala: Na ni Alona mi ar sum mama woi zu? Nga na d’i! Kayam an tanda ni ma Israel ma ad’u andjafâ hi Abraham-ma, ma ad’u andjafâ hi Benjamin-na mi. 2Alona mi noî nga mam suma mi wazi avok deina woi d’i. Kayam agi wagi zla d’a mbaktumba hAlonid’a ti dat yam Elie ata yima mi kal yam Israel-lâ avok Alona ala: 3Ma didina, azi tchi mang suma djok vuna woyo, azi to yi mang ma ngal ahle suma ngat buzuna teteng kä woyo, an arî an van tu, azi nga halan á tchid’a mi na. 4Wani Alona mi hulong dum nana ge? Mi dala: An ngom nga suma kan dudubu kid’iziya suma a grif nga kä avok alo ma a yum ala Bäl-lâ á kud’urom mbuo na. 5Ni na mi, kur atchogoi d’a tchetchem wanda, suma hiu suma Alona mi manazi yam suma mambina a nga. 6Mi manazi ni yam suma mamba, ni yam sun mazi d’a led’a d’uo. Le ni hina d’uo ni, sumad’a ni suma d’a gagazid’a d’uo d’a.

7Ni nana ge? Vama Israel-lâ a halama, a fum nga d’i. Wani suma Alona mi manazina, a fumî azi hol. Suma hiuna a b’al huruziya. 8D’igi mbaktumba hAlonid’a ti de na ala: Alona mi mbud’uzi lilid’a, mi mbud’uzi suma bei wed’a, mi mbud’uzi suma bei humba gak ini. 9David mi de hina mi ala:

Ar te mazina mi mbut nabeid’a ki dauna á vaziya,

kayam a puk kä, a fe wurak mazid’a mi.

10Ar irazi mbut nduvunda á we d’i.

Ang gunuzi domndjolozi kä teteu.

11An nga ni djop ala: Ata yima Juif-fâ a dap asezina, a pu’î kä ki irazi fafad’u zu? Nga na d’i! Wani ni yam tchila mazid’a ba, suma dingâ a fe ki suta, kayam Juif-fâ a le yungôra kaziya. 12Le tchilad’a hi Juif-fîd’a ti mbut suma kur duniyad’a suma ndjondjoîna, le puk mazid’a ti mbut andjaf suma dingâ suma ndjondjoîna mi ni, hulong mazi d’a yam suta hAlonid’a, Alona mba mi b’e vunam yam suma kur duniyad’a ngola kal luo zu?

Sut ta yam andjaf suma dingîd’a

13Ki tchetchemba, an nga ni dagi agi andjaf suma dingâ ala: An ni ma a sunun yam andjaf suma dingîna. Kayam ndata, an le furîd’a á tak sun manda woi abua. 14An djib’er ala an mba ni zut andjavan akulo á le yungôra á sut suma dingâ adigaziya. 15Le keng nga a kengêzi woid’a zlap suma kur duniyad’a kAlona ni, fata Alona mi hulongôzïd’a ni nana ge? Ni d’igi suma a tchol akulo karid’a aduk suma matnina na. 16Le avungô ma avo’â a tinim iram vam mAlona ni, ad’um mba ara ni mama mi. Le sidei aguna a tinim iram vam mAlona ni, abomî mama mi. 17Israel-lâ ni d’igi olif ma pe ma a kam abom ma dingâ woina na. Ang ma ni Juif-fâ d’uo na, ang ni d’igi abo olif ma abagei ma a djagam blangâzina na. Ki tchetchemba, ang nga wulî yam sideina kambira hi olif ma a puma. 18Ni kayam me ba, ang gol abo ma kam mbeina is ke? Wani le ang subur tangû ni, ang we djiviya; ni ang ba, nga zi sideina d’i, wani ni sideina ba, nga mi zingû.

19Wani ang mba dan ala: Alona mi ka abo ma dingâ woi á djagan an blangâmu. 20Gagazi, Alona mi kazi woi ni kayam azi he nga gagazid’a d’i, wani ang nga kua ni yam he gagazi manga. Kayam ndata, ang gol tang djiviya, ang subur tang ngi, wani ang ka’î ki mandarâ. 21Le Alona mi ar nga Juif suma nabo agu ma gagazina d’uo ni, mam mba mi arang ang nguo mi. 22Ang we nana ba, Alona mi tak djivi mamba kad’eng mamba woi ge. Mam nga kad’enga yam suma a puk kä na, djivi mamba nga kang ang mi. Wani ar ang kak kur djivi mamba. Le hina d’uo ni, mba mi kang ngei d’igi abo aguna na mi. 23Le Juif-fâ a b’al nga huruzi kiki yam bei he gagazi mazid’a d’uo ni, Alona mba mi djagazi ata blangâzi ma avo’â, kayam Alona mi nga kad’enga á djagazi kua. 24Ang ma nga ni Juif-fâ d’uo na, angî abo agu olif ma abageina. Wani Alona kur sun mamba mi kangû, mi djagang ata agu olif ma gagazi ma a puma. Juif-fâ nabo agu olif ma gagazi ma a puma. Hina, ni vama afefetna ata Alona á djak abo ma gagazina ata agu ma ala nabuwaziya na.

Sut ta dabi d’a yam Israel-lîd’a

25B’oziyona, an min agi wagi ad’u zla d’a muduri ndata, kayam zla ndata mba d’i d’elegi á gologi tagi d’igi suma ned’a na. Nala, suma hiuna aduk andjaf Israel-lâ a b’al huruziya, gak andjaf suma ding suma Alona mi nga hurum kazi suma nda’â a fe suta tua. 26Ni hina ba, andjaf Israel-lâ pet a mba fe suta d’igi mbaktumba hAlonid’a ti de na ala:

Ma sut suma mba mi ndeï ni kur Siyon.

Mam mba mi pat ahle suma a nga ata yazi d’uo na woi aduk andjafâ hi Jakob-ma.

27Fata an mba ni hlazi tcho mazid’a woid’a,

an mba ni djin vunan ki sed’eziya.

28Ni yam Zla d’a Djivid’a ba, Juif-fâ a mbut suma djangûna kAlona kagiya. Wani yam man nda Alona mi manazid’a, mi le kazi ngola ni yam abuyozi ngolo. 29Kayam Alona nga mi mbut djib’er mamba kä yam suma mi b’e vunam kazi suma mi yazina d’i. 30Adjeu agi ni suma bei hum vun Alona. Wani ki tchetchemba, Alona mi wagi hohowogi yam bei hum vuna hi Juif-fîna. 31Ki tchetchemba, azi ni suma bei hum vuna kayam Alona mi wagi hohowogiya, kayam mi fe lovota á wazi hohowozi d’igi mi wagi hohowogi na mi. 32Kayam Alona mi tchuk suma pet kad’u bei hum vuna, kayam mi tagazi we hohou mamba pet mi.

Ngol la kal papad’a hAlonid’a

33Ndjondjoîd’a hAlonid’a ki ned’a ki we mamba ad’uzi ni zula yiyik. Ni nge mi ndak á väd’u sariya mamba ki nga hur mama ge? 34D’igi mbaktumba hAlonid’a ti de na ala:

Ni nge ba, mi we djib’era hi Ma didinid’a ge?

Ni nge ba, mi ndak á dum d’alâ ge?

35Ni nge ba, mi hum va avok

tala mam hulong mi wuragam balumu d’a ge?

36Kayam ahlena pet a tcholï natamu, ahlena pet a nga ata yazi ni kayam mamu, a nga ni kayam mam tamba mi. Kayam ndata, ei suburi Alona gak didin. Amin!

Currently Selected:

Romê-na 11: BA

Highlight

Copy