Vama ndum mbeina 7
7
Ablaud’a hi Israel-lîd’a 144.000
1Bugol ahle ndazina, an we malaikana fid’i a nga tchola ata andaga d’a kengêt ma fid’ina. Azi ve nga simet ma fid’i ma yam andagad’ina aboziya, kayam mi sir yam andagad’a d’oze yam alum ma ngolâ d’oze yam agu ma ding tu d’uo mi. 2An we malaika ma dingâ mi djagï akulo abo ma yorogona, mi nga ki geuna hAlo ma arina abomu. Mi de ki delem akulo mi malaika suma fid’i suma a hazi ad’enga á b’lak andagad’a kalum ma ngolâ woina ala: 3Agi b’lagagi andagad’a d’oze alum ma ngolâ d’oze aguna d’i, gak ei kei geuna avok magumeina hAlo meinina tua. 4A tagan ablau suma a kazi geuna hAlonina avorozina. Azi ni dudubud’a kis yam dudubud’a dok fid’i yam dudubud’a fid’i mi. Azi nad’u andjafâ hi Israel-lîna pet. 5A ka suma ad’u andjafâ hi Juda-na geuna dudubud’a dogo yam dudubud’a mbà, a ka suma ad’u andjafâ hi Ruben-na geuna dudubud’a dogo yam dudubud’a mbà, a ka suma ad’u andjafâ hi Gad-na geuna dudubud’a dogo yam dudubud’a mbà, 6a ka suma ad’u andjafâ hi Aser-râ geuna dudubud’a dogo yam dudubud’a mbà, a ka suma ad’u andjafâ hi Neftali-na geuna dudubud’a dogo yam dudubud’a mbà, a ka suma ad’u andjafâ hi Manase-na geuna dudubud’a dogo yam dudubud’a mbà, 7a ka suma ad’u andjafâ hi Simeon-na geuna dudubud’a dogo yam dudubud’a mbà, a ka suma ad’u andjafâ hi Levi-na geuna dudubud’a dogo yam dudubud’a mbà, a ka suma ad’u andjafâ hi Isakar-râ geuna dudubud’a dogo yam dudubud’a mbà, 8a ka suma ad’u andjafâ hi Zabulon-na geuna dudubud’a dogo yam dudubud’a mbà, a ka suma ad’u andjafâ hi Josef-fâ geuna dudubud’a dogo yam dudubud’a mbà, a ka suma ad’u andjafâ hi Benjamin-na geuna dudubud’a dogo yam dudubud’a mbà mi.
Ablau suma mimiyâ’â
9Bugol ahle ndazina, an wablau suma mimiyâ’â a nga toka, ni suma sana mi ndak á ndumuzi d’uo na. Azi nad’u andjaf ma yam andagad’ina pet, nad’u andjafâ hi sumina pet ki suma pet ki vun ma ded’a pet. Azi nga tchola avok zlam mba amula, avok Gor timina mi, a tchuk baru d’a fiyak ka hapa ataziya, ki hum tumura abozi mi. 10A de ki delezi akulo ala: Sut meid’a ti tcholï nata Alo mei ma nga kaka yam zlam mba amulina ki Gor timina mi. 11Malaikana pet a nga tchola a ngui zlam mba amula kä ki suma nglona kahle suma ari suma fid’ina. A grif kä ki irazi avok zlam mba amula, a kud’or Alona, 12a dala: Amin! Giled’a ki subura ki ned’a ki wed’a ki hud’a ki sib’ika kad’enga ni hAlo meinid’a gak didin. Amin!
13Ma dingâ aduk suma nglona mi djobon ala: Suma a tchuk baru d’a fiyak ka hapa atazina, azi ni suma lara ge, a tcholï ni lara ge?
14An hulong dum ala: Salana, ang ba we.
Mi dan ala: Azi ni suma a buzuk kei kur djop vun ma ngolâ, azi ni suma mbus baru mazi d’a fiyaka woi a mbud’ut hapa ki buzuna hi Gor timinina. 15Kayam ndata, azi nga tchola avok zlam mba amula hAlonid’a, a nga le sunda mAlona andjege ki falei kur gong mamba. Mam ma nga kaka yam zlam mba amulina mba mi tin iram kaziya, mba mi ngomozi mi. 16Meid’a d’oze vun ma sod’a mba mi lazi d’i, afata d’oze zumal la huwaka mba d’i lazi d’uo mi. 17Kayam Gor timi ma nga aduk zlam mba amulina mba mi poloziya, mba mi i ki sed’ezi ata mbiyo ma lau ma arina. Alona mba mi sed’ezi simina woi irazi mi.
Currently Selected:
Vama ndum mbeina 7: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.