Vama ndum mbeina 22

1Malaikana mi tagan mbiyo alum ma ari ma nga mi wile d’igi kristala na na, nga mi djangî ata zlam mba amula hAlonid’a ki d’a hi Gor timinid’a, 2nga mi djang ir palumba hazì mámid’a. Agu ma he arina mi nga avun alum máma abo hî abo hî, nga mi vut yam dogo yam mbà kur bizad’a tu, til ma lara ge pî, nga mi vut yam tutu. Humam ni vama sut andjaf suma. 3A mba fe vama Alona mi gum vunina kua d’i.

Zlam mba amula hAlona d’a hi Gor timinid’a ti mba d’i kak kua, azungeîna hAlonina a mba kud’uromu. 4Azi mba wum iramu, simiyêm nga b’ira avorozi mi. 5Andjeged’a nga kua d’i. Azi min b’od’a hi lalambid’a, d’oze hafatid’a d’i, kayam Salad’a Alona mba mi b’o kaziya, azi mba te leud’a ki sed’em gak didin.

Mbad’a hi Jesus-d’a

6Bugola, malaikana mi dan ala: Zla ndata ni zla d’a gagazi d’a ndak ang tin hurung kata. Salad’a Alo ma he Muzuk mama mi mam suma djok vunina, mi sunï malaika mama á tak azungeî mama ahle suma a nga mba ka tchetchema.

7Jesus mi dala: Agi humugiya! An nga ni mba ka tchetchem. Suma a ge yazi kä ad’u zla d’a djok vun Alona d’a a nga djogot tei kur mbaktum ndatid’ina, a le furîd’a.

8An Jean ni huma, ni wahle ndazina mi. Ata yima an hum ni we na, an puk kä asem malaika ma nga mi tagan ahle ndazinina á kud’uromu. 9Wani mi dan ala: Ang gol tang djiviya. An ni ndrang ma sunda d’igi ang na, d’igi b’oziyong suma djok vun Alona azi ki suma pet suma a ge yazi kä ad’u zla d’a kur mbaktum ndatid’a na. Ang kud’orî Alona hol. 10Mi dan kua ala: Ang ngei zla d’a a nga djogot vunat tei kur mbaktum ndatid’a kä d’i, kayam yima ngam yam ahle ndazina ar go. 11Sama le tchod’a, ar mi i avok kur tcho mamba; sama le sun nda ndjendjed’a, ar mi i avok kur ndjendje mamba; sama le djivid’a, ar mi i avok kur djivi mamba; sama yed’etna, ar mi i avok kur yed’et mamba mi.

12Jesus mi dala: Agi humugiya! An nga ni mba ka tchetchem ki wurak manda abon á he mi nge nge pî yam sun mam mba mi lata. 13An ni Alfa, an ni Omega, an ni Ma avo’â, an ni Ma danana. An nAd’u tinda, an ni Yam mba dabid’a mi.

14Suma a nga mbus baru mazid’a a mba le furîd’a. Ni azi ba, mba fe lovota á te vud’agu ma he arid’ina, a mba kal ata vun azì ma ngol máma krovo mi. 15Wani suma a le sun nda ndjendjed’a ki suma ve kumana ki suma mizeuna ki suma tchi matna ki suma tuwal fileina ki suma ka zlad’a pet, a nga tchola bugol azina woi hina dei.

16An Jesus, an sunugi malaika mana, kayam mi dagi ahle ndazina pet kur Toka. An ni David gorom ngolona, an ni avevel ma fo yina.

17Muzu’â hAlonina katcha d’a telet awilid’a a dala: Ang mbeya!

Sama huma, mi dala: Ang mbeya!

Sama vunam sona, ar mi mbeya; sama min mbiyo ma arinina, a mba humzi ni hawa.

Zla d’a dabid’a

18An Jean nga ni dahle ndazina woi mi suma pet suma a nga hum zla d’a a nga djogot tei kur mbaktum ndatid’ina. Sama tchuk zla d’a dinga yam zla ndata kuana, Alona mba mi tumum ki tugud’ei d’a tcho d’a a b’irit kur mbaktum ndatid’a. 19Le sama nga mi pat zla d’a a djogot vunat tei kur mbaktum ndatid’a woyo ni, Alona mba mi d’elem bei te vud’agu ma he arid’ina, mba mi d’elem bei kal kur azì ma ngolâ hAlonina, d’igi a b’ir kur mbaktum ndata na mi.

20Sama de woi yam ahle ndazina petna, mi dala: Â, an nga ni mba ka tchetchem. Amin! Ang mbeya, Salamina Jesus!

21Ar Salad’a Jesus mi vagi sumad’a pet. Amin!

Currently Selected:

Vama ndum mbeina 22: BA

Highlight

Copy