Vama ndum mbeina 16

Angulei suma ayîna hAlonina mi nga kuana

1An hum dela ngola ti tcholï kur gong nga kud’ora hAlonid’a. Ti de mi malaika suma kid’iziyana ala: Agi i vogi ayîna hAlona ma nga kur angulei suma kid’iziyanina woi yam andagad’a.

2Malaika ma avo’â, mi vo mama yam andagad’a. Ata yi máma, ndod’i ma tcho ma bei tchila ba na, mi wet tei yam suma a nga ki nomrod’a hambur máma atazina ki suma a kud’or vama a yoromzina.

3Malaika ma mbàna, mi vo mama kur alum ma ngolâ. Mbina mi mbut buzuna d’igi buzuna hi sama mi mitna na, ahle suma ari suma a nga kur alum ma ngolîna a bo woyo.

4Malaika ma hindina, mi vo mama kur aluma ki mbiyo ma laud’a. A mbut buzuna mi. 5An hum malaika ma nga kad’enga yam mbinina, mi dala: Angî Ma d’ingêr ma ndak á ka sariya d’a hina d’ina, ang tu ni Ma bei tchod’a ba na, ni Ma nga na, ni Ma nga adjeu deina. 6Kayam azi tchi sum mangâ azi ki mang suma djok vuna woyo, ni kayam ndata ba, ang hazi buzuna á tched’a wana, azi ndak kayam ndata mi. 7An hum del la tcholï ata yima ngal dubang ma his djivid’ina ti dala: Â, Salad’a Alo ma ad’engêm kal petna, sariya manga ni gagazi, ni d’ingêr mi.

8Malaika ma fid’ina, mi vo mama yam afata. Ni ma a hum ad’enga á ngal suma woi kakud’ina. 9Suma a ngal lei abo huwaka haku ndata. Azi ngul simiyê Alo ma nga kad’enga yam tugud’ei d’a tcho ndatina, azi mbut nga huruzi yam tcho mazid’a á subur Alona d’i.

10Malaika ma vahlâ, mi vo mama yam zlamba hambur mámid’a. Leu mamba ti mbut nduvunda, suma a nga et sinazi abo pupuluka. 11Azi nga ngul Alo ma akulona abo pupuluk mazid’a, abo mbil mazina, wani azi min mbut huruzi yam sun mazi d’a tchod’a d’i.

12Malaika ma karagayana, mi vo mama kur alum ma Efrat-na. Alum máma mi so woi á min lovota avok amulei suma a tcholï abo ma yorogonina. 13Bugola, an we muzuk ma tchona hindi, mi hle tamî d’igi greneûna na. Mi buzuk kei avun dragona avun ambur máma, avun ma djok vun ma ka zlad’a mi. 14Azi ni muzu’â hi Seitan-nina. Azi nga lahle suma atchapma. Azi nga i á tok amulei suma yam andagad’ina pet á dur ayîna kur bur ma ngolâ hAlo ma ad’engêm kal petnina.

15Salad’a mi dala: Ang huma, an nga ni mba ni d’igi sama kula na. Sama nga kaka ndjola, mi ngom baru mamba tala mi tit gandilad’a ba, suma a wum zulo mama d’uo na, mi le furîd’a.

16Muzuk ma tcho ma hindi máma, mi tok amuleina ata yima a yum ki vun Hebre-na ala Armagedon na na.

17Malaika ma kid’iziyana, mi vo mama akulo aduk simetna. An hum del la ngola ti ndeï kur gong nga kud’ora hAlonid’a, ata yima zlam mba amula nga kuana ala: Ndak wa da’. 18Ata yi máma, alona mi wile, mi breyâ, dela ti de zlad’a, andagad’a ti yir gigidji mi. Kid’a Alona mi ge sana yam andagad’a deid’a, andagad’a ti yir nga yir ra ngola hina d’a yat tu d’i. 19Azì ma ngolâ mi wal lei aduk hindi, azì ma nglona handjaf suma yam andagad’ina pet mi dris kä mi. Alona humam gum yam Babilon nda ngola, mi hat süm mama kur angala, ni süma hayî mam ma bibiliuna. 20Tila pet ti blas seyo, sa nga mi wahinad’a d’uo d’a. 21Mogoi ma nglona mi tcholï akulo, nga mi yak kä yam suma. Anek mamba ni kilona dok fid’i. Suma a ngul Alona abo mogoi ma tcho mama kayam mi yagï kä ngola heî.

Currently Selected:

Vama ndum mbeina 16: BA

Highlight

Copy