Vama ndum mbeina 14

Sawala hi suma a guzuzinid’a

1An we Gor timina mi nga tchola yam ahina d’a Siyon-nda. Suma a nga ki sed’em dudubud’a kis yam dudubud’a dok fid’i yam dudubud’a fid’i mi, ni suma simiyêm ki simiyê Abum a nga b’ira avorozina. 2An hum dela ti tcholï akulo, nga d’i siwel d’igi mbiyo ma avun vorina na, d’igi breîd’a halonid’a na mi. An hum dela ti hle tat d’igi dela hi suma a nga bu adingîna na. 3Suma bubup ndazina a nga tchola avok zlam mba amula, avok ahle suma ari suma fid’ina, avok suma nglona mi, a nga hle sawal la awilid’a. Sama ndak á hat sawal ndatina nga d’i, ni suma dudubud’a kis yam dudubud’a dok fid’i yam dudubud’a fid’i suma a guzuzi ka hî yam andagad’ina hol. 4Azi ni suma a mbut nga tazi ndjendjed’a karopma d’uo na, ni suma a ngom tazi ped’etna, ni suma a nga tit ad’u Gor timina ata yima lara ge pet ma mam nga mi i kuana, ni suma a guzuzi aduk suma, a hazi mAlona azi ki Gor timina avok kikidjina. 5Azi ni suma bei ka zlad’a, ni suma bei zlad’a kazi ba na mi.

Malaika suma hindina

6An we malaika ma dingâ mi pirï akulo dei aduk simetna. Mi nga ki Zla d’a Djivi d’a ari d’a didinda á ded’a mi suma yam andagad’ina, mandjaf suma pet, ad’u andjafâ pet ki vun ma ded’a pet, mi suma pet mi. 7Mi de ki delem akulo ala: Ar agi lagi mandara Alona, ar agi suburum mi, kayam yi mam ma ka sariyad’a yam suma mba wa, agi kud’urogi mam ma lakulod’a kandagad’a kalum ma ngolâ ki mbiyo ma laud’a mi na.

8Malaika ma mbàna mi mba blogomu, mi dala: Babilon nda ngola, ti puk wa, ti puk wa, ni d’a handjaf suma yam andagad’a pet süm mat ma tcho ma mizeunid’a.

9Malaika ma hindina mi mba blogoziya, mi de ki delem akulo ala: Sama kud’or ambur máma ki vama yoromzina, mi b’ir vama simata avorom mboze bigama, 10mam tamba mba mi tche süm ma ala nayîna hAlona ma mam vom kur kop mam ma ayînina. Suma pet suma a le hina na, a mba fe ndaka aduk aku d’a sufred’a avok malaikana hAlonina, avok Gor timina mi. 11Andosâ haku d’a nga d’i lazi ndakid’a, nga mi d’us gak didin. Suma a kud’or ambur máma ki vama a yoromzina ki sama lara ge ma a b’irim simiyêm atama, andjege ki faleya tuk ta mazid’a nga d’i.

12Wana ni ve tad’a hi suma hAlona suma a ge yazi kä ad’u vun ma he mama suma d’engzeng yam Jesus-na.

13An hum dela ti tcholï akulo, ti dan ala: Ang b’ir kur mbaktumba ala: Suma a nga bo kur sunda hi Salad’id’a ki tchetchembina, a mba le furîd’a. Muzu’â hAlonina mi de na ala: Gagazi, azi ndak á tuk tazi kur sun mazi d’a kaud’a, kayam sun mazi d’a djivid’a nga d’i tit ad’uziya.

Bur ma zed’a

14An gol kua, an we d’ugul la hapa. Sana mi nga kaka kat mi hle tamî d’igi sana na, avaval la lora nga kamu, mbaragum mba tena heîd’a nga abomu. 15An we malaika ma dingâ mi nde woi kur gong nga kud’ora hAlonid’a, nga mi de ki delem mba ngola mi mam ma nga kaka yam d’ugulina ala: Ang hle mbaragum manga á zed’a, kayam yina ndak wa á zawuna, kayam awu ma yam andagad’ina mi ne wa á zed’a mi. 16Ata yi máma, mam ma nga kaka yam d’ugulina, mi tin mbaragum mamba, mi zawu ma yam andagad’ina.

17Malaika ma dingâ mi ndeï akulo kur gong nga kud’ora hAlonid’a, mi nga ki mbaragum mba tena heîd’a abom mi.

18Malaika ma ding ma nga kad’enga yam akud’ina, mi ndeï ata yima ngal dubang ma his djivid’ina. Mi de ki delem akulo mi mam ma nga ki mbaragum mba tena aboma ala: Ang tin mbaragum manga, ang ngat vud’a guguzlu d’a yam andagad’id’a, kayam ti ne wa da’. 19Ata yi máma, malaikana mi tin mbaragum mamba yam andagad’a, mi ngat vud’a guguzlu d’a yam andagad’id’a, mi tchugut kur zul la miret guguzlu d’ala nayî ma ngolâ hAlonina d’a. 20A miret guguzlu ndata woi bugol azina. Buzuna ndeï djangâ woi ata yima a miret guguzlud’a kua na, mi djang i kilometred’a kikis hindi, yiyik mamba ni d’igi metred’a tu ki nusâ na.

Currently Selected:

Vama ndum mbeina 14: BA

Highlight

Copy