Vama ndum mbeina 12

Zlad’a hatchad’a azi ki dragonid’a

1Vama simat ma ngolâ mi ndeï akulo. Atchad’a ti tchuk afata d’igi barud’a na, tilâ nga kä ad’u ased’u, avaval la tchitchiud’a dogo yam mbà ti nga kulupa kad’u. 2Ti nga ki wirâ, ti nde vuta, ti nga d’i tchi abo ndaka hi vutid’a.

3Vama simat ma dingâ mi tcholï akulo. Gol wani, nambur dragon ma hleuna mi nga ki yamba kid’iziya kadifa dogo, avavala ti nga ata yam tutu pet mi. 4Andjawam nga d’i tan tchitchiu d’a a walat aduk hindid’a abot ma tuna, nga d’i tchugut kä yam andagad’a. Mi nga tchola avok atcha d’a nga d’i vuta, kayam mi lik gor ma ndat nga d’i vud’uma. 5Atcha ndata, ti vut gor mandjufâ, ni ma mba mi pol andjaf suma pet ki totogod’a kawei ma wurana. Wani gorot máma, a hlum sä akulo gen Alona ata zlam mam mba amula. 6Atcha ndata, ti ring abagei ata yima Alona mi minim katna, kayam mi hat tena burâ dubu yam kikis mbà yam dok karagaya.

7Ata yi máma, ayîna mi tchol akulo hur alona. Michel ki malaika mama a nga dur ayîna ki dragona, dragona ki malaika mama a nga dur ayîna ki Michel mi. 8Wani dragona ki sum mama a kus nga d’i, yima kaka nga kazi akulo d’uo mi. 9Dragon máma a gumï kä, ni gugui ma mamar ma a yum ala Diable d’oze Seitan na na, ni ma nga mi lop suma yam andagad’a petna. A gumï kä yam andagad’a, a tchugï malaika mama kä woi zlapa ki sed’em mi.

10Bugola, an hum del la ad’eng nga ti tcholï akulod’a, ti dan ala: Ki tchetchemba, suta kad’enga ki leud’a hAlo meinid’a kad’enga hi Christ mamid’a a mba wa, kayam ma tchuk zlad’a yam b’oziyoina avok Alo meina andjege ki faleina, a gumïya wa kä woi yam andagad’a da’. 11B’oziyoina a kal kamî kad’enga hi buzuna hi Gor timinina ki zla d’a gagazi d’a azi tchat walata, a he tazi woi gak matna mi. 12Kayam ndata, ndak akulod’a, ndak le furîd’a ki suma a nga kuru’â mi. Wani ni zla d’a hohoud’a yam ndak andagad’a kalum ma ngolâ, kayam Diable mi tchugï asem kä atagiya. Mi mbut ayîna, kayam mi wala yam ar nga ngol li.

13Ata yima dragona mi wala a gumï kä woi yam andagad’a da na, mi nde mi ring ad’u atcha d’a vut gor mandjufîd’a. 14Wani a he atcha ndata giging agigilau ma ngolâ, kayam ti pir ti i ata yi mat ma abageina, ata yima a hat tena kua bizad’a hindi ki nusina kayam dragon máma mi fat ti. 15Wani gugui máma mi vo mbiyo ma avunama d’igi aluma na bugol atcha ndata, kayam abilâ mi id’u. 16Wani andagad’a ti ndjun atcha ndata, andagad’a ti mal vunat ti tche mbiyo ma dragona mi vomï woi avunama. 17Dragona mi mbut ayîna, mi kak djangûna katcha ndata, mi i á dur ayîna kandjavat ma arâ ki suma pet suma a ge yazi kä ad’u vun ma hed’a hAlonina ki suma d’engzeng suma a nga tit yam gagazi d’a Jesus mi ndat teid’ina. 18Dragona mi tchol yam lesâ avun alum ma ngolâ.

Currently Selected:

Vama ndum mbeina 12: BA

Highlight

Copy