Sawal la giled’a 86
86
Tchenda hi sama nga kur kukina
1Ni tchenda hi David-ta.
Ma didina, ang tin humang ang humunu!
Kayam an ni ma hou ma hohoud’a.
2Ang ngomonu, kayam an ni ma d’engzengâ.
Alo mana, ang sud’un an azong mang ma ni tin hurun kangâ.
3Ma didina, ang wan hohowonu,
kayam an nga ni tchi kang kur burâ kaf.
4Ang ar an azong mangâ ni le furîd’a,
kayam an he tan pet ni mi ang Salad’a.
5Salad’a, angî ma djivina,
angî ma vat hurung ngei yam sana atogo za’â;
o mang nga didinda ti zul heî yam suma a nga yangâ.
6Ma didina, ang tin humang hum tchen manda,
ang kak tchugot á hum tchen man nda hohoud’a.
7Ata yima an nga kur ndakina, an yangû,
kayam ang mba humunu.
8Salad’a, alo ma ding ma d’igi ang na na nga d’i,
sun manga a nga ngat ki ndrat ti.
9Salad’a, andjaf suma ang lazina pet,
a mba grif kä avorongû,
a mba suburung simiyêng mi.
10Angî Ma ngol ma kal papana,
ang le sun nda atchapa, ang tu nAlona.
11Ma didina, ang had’an lovot manga;
an mba ni tit kur gagazi manga;
ang han hur ma lulumana kayam an ringîng mandarangû.
12Salad’a Alo mana, an mba ni gileng ki hurun pet,
an mba ni suburung simiyêng burâ ki burâ.
13Kayam o mang nga didin nda ang lat kanda,
ti kal ngola heî;
kayam ang prud’un ndei ata yima azuleina mi.
14Alo mana, suma yam mba ad’enga a nga halan ki zlad’a,
suma asa’atna a tok tazi kan á tchanu.
Azi ni suma va mi ndolozi nga ki ang nguo na.
15Wani Salad’a, ang tu nAlo ma we hohowa sumina,
ni ma sumad’a;
ang nga tchol kayîna atogo d’i,
angî ma o mang nga didinda zul heîna,
angî ma d’engzengâ mi.
16Ang mbud’ï irang kanu, ang wan hohowonu,
ang had’eng manga mi an azong mangâ,
ang ngomon an wei manga gorotna.
17Ang le vama tak ma djivina kanu;
ar man suma djangûna a we, a mbut zulona,
kayam ang Ma didina ni ma ndjununa,
angî ma b’lengên huruna mi.
Currently Selected:
Sawal la giled’a 86: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
