Sawal la giled’a 80
80
Tchen nda yam hulonga hi Israel-lîd’a
1Ni sawal la gile d’a Asaf mi hlat mi hat mi ma ngolâ hi suma hle sawalina.
2 Ma pol Israel-lâ, ang tin humang huma,
ang pol Josef d’igi sana mi pol tumiyôna na.
Ang ma nga kaka aduk tcherebênina,
ang nde tang ngeyo.
3Avok Efraim, avok Benjamin ki Manase,
ang tchol akulo kad’eng manga,
ang mbeï sud’umiya.
4Alo mamina, ang tinimi blangâmina,
ang mbud’ï irang kiramiya.
Hina wani, ami mba sud’umiya.
5Ma didina, Alo ma ad’engêng kal petna,
ang hurung mba zal hina gagak mindja
á hulong humba mi sum mangâ ge?
6Te ma ang hamizina ni tchina,
ami nga tchami simi ma iramina
d’igi sana mi tche mbina na.
7Ang mbud’umi ni suma hal huneîd’a ir ndromina,
mami suma djangûna a nga lazami mi.
8Alo ma ad’engêng kal petna,
ang tinimi blangâmina,
ang mbud’ï irang kiramiya.
Hina wani, ami mba sud’umiya.
9Ang pad’ï guguzlud’a ei Ezipte,
ang dik andjaf suma woi avorod’u,
ang hulong pat kä mi.
10Ang minit yina avorod’u;
sideyet mi sir kä, ti hle ambasa pet.
11Anguzat ti duk yam ahuniyôna,
abot mi ruî gak mi i yam agu sedre ma ngolâ.
12Abot mi ring ngei gak yam alum ma ngol ma Mediterane-na,
abot ma gureina, mi i gak yam alum ma Efrat-na mi.
13Ni kayam me ba, ang hulut kang matna
kayambala suma a kalâ pet a hurumud’u d’a ge?
14Azengâ mi tcholï aduk agud’a, mi mba mi b’lagam mbeyo;
ahle suma abageina a nga te hatna kuru.
15Alo ma ad’engêng kal petna,
ang mbud’ï irangû,
ang golï akulo, ang we,
ang mbeï we hohowa guguzlu ndata.
16Ang ngom vama ang pum kabong ma ndjufîna,
ang ngom gor ma ang tang hum ad’engina mi.
17Guguzlu manga a kat teyo, a ngalat teyo;
sum mangâ a nga ba woi avorong abo ngop manga.
18Ang tin abong yam sama nga ata bigang nga ndjufina,
yam gor sama ang tang hum ad’engina mi.
19Hina wani, ami mba walami woi ki sed’eng nguo d’a;
ang hami arid’a, ami mba yangî ang simiyêng tu go.
20Ma didina, Alo ma ad’engêng kal petna,
ang hulongômi blangâmina,
ang mbud’ï irang kiramiya.
Hina wani, ami mba sud’umiya.
Currently Selected:
Sawal la giled’a 80: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
