Marik 8

Jesus mi hop suma dudubud’a fid’i ki tena

(Gol Mat 15.32-39)

1Kur bur máma ablau suma a togï kua, wani a nga ki vama te d’i. Jesus mi yi mam suma hata gevemu, mi dazi ala: 2Hurun nga mi hat yam sum ndazina heî, kayam azi nga ki sed’en ini ni burâ hindi, a nga ki vama te d’i. 3Le an arazi a i avo hatazi ki meid’a hina ni, azi mba ngrap glovot abo meid’a, kayam suma dingâ adigazi a tcholï nata yima deina.

4Mam suma hata a hulong dum ala: Ei mba fei avungôna ni lara abagei ka hî á hop sum ndazina ge?

5Jesus mi djobozi ala: Avungôna nga abogi ni ga ge?

Azi hulong dum ala: Ni kid’iziya.

6Ata yi máma, mi he vuna mablau suma ala á kak kä andaga. Mi yo avungô ma kid’iziyana. Kid’a mi le mersi mAlona kamba, mi mbrugum kä, mi hum mi mam suma hata á b’raud’a; a b’rawam mablau suma mi. 7A nga ki kuluf ma gureina nde mi. Kid’a mi le mersi kamba, mi hazi vuna á b’rawazizi mi. 8Azi pet a te, a hoba. Mam suma hata a tar avungôna ad’um mba ara, ti oî gumud’a kid’iziya. 9Suma a tena a ni d’igi dudubud’a fid’i na. Jesus mi arazi a iya. 10Ata yi máma na wat, mi djak kur alumba ki mam suma hata, mi i kur ambas sa Dalmanuta-d’a.

Fariziyêna a djop Jesus yam vama simata

(Gol Mat 16.1-4)

11Fariziyêna a mba, a nde tchi tuguyod’a ki Jesus. A nga kugum ala mi tagazi vama simat ma tcholï akulona. 12Jesus muzuk kurum krovo huluf, mi dala: Ni kayam me ba, suma kur atchogoi d’a wandina a nga hal vama simata ge? Gagazi, an nga ni dagiya, a mba le vama simata mi suma kur atchogoi d’a wandina d’i. 13Wani mi araziya, mi djak kur alumba kua, mi i abo woi hî.

Angufa hi Fariziyênid’a ki d’a hi Herot-ta

(Gol Mat 16.5-12)

14Suma hata hi Jesus-na a mar bei hle tena aboziya, wani avungôna abozi kur alumba ni tu go. 15Jesus mi gad’azi ala: Agi gologi tagi djivi kangufa hi Fariziyênid’a kangufa hi Herot-ta mi.

16Suma hata a nga de tazi ala: Mi de hina ni kayamba ei nga kavungôna d’uo d’a.

17Jesus mi we hina wani, mi dazi ala: Ni kayam me ba, agi nga dagi tagi yam avungô ma nga abogi d’uo na ge? Agi vagi nga zla ndata kagi d’uo tua? Iragi nga bei mal kat tua zu? Agi suma bei vagi zlad’a kagi ba na. 18Agi nga ki ira, wani agi nga wagi d’uo zu? Agi nga ki humba, wani agi nga humugi d’uo zu? Agi nga djib’eregi d’uo zu? 19Kid’a an mbruk avungô ma vahlâ mi suma dudubud’a vahla, ad’um mba ara ti oî gumud’a ni ga ge?

Azi dum ala: Dogo yam mbà.

20Mi djobozi kua ala: kid’a an mbruk avungô ma kid’iziyana mi suma dudubud’a fid’id’a, agi taragi ad’um mba ara ti oî gumud’a ni ga ge?

Azi dum ala: Kid’iziya.

21Mi dazi ala: Iragi mal nga d’uo tua zu?

Jesus mi mal ir ma duka woi kur Betsaida

22Jesus azi ki mam suma hata a mba kur Betsaida. A mba ki sama duka mi Jesus, a tchenem ala mi domu. 23Jesus mi vabo ma duka, mi im woi kel bugol azina, mi tuvom ayôna iramu, mi tin abom iramu, mi djobom ala: Ang nga we va zu?

24Sama duka mi hle iram akulo, mi dala: An nga ni we suma, wani an nga ni wazi ni zizimit d’igi aguna na, a nga tid’a.

25Jesus mi tin abom iram kua. Ata yima ma duka soza iram gola avoroma, iram mal leyo, mi wahlena pet tei tetet. 26Jesus mi gum mi i avo hatamu, mi dum ala: Ang hulong kur azì máma d’uo d’a.

Pierre mi de woi yam Jesus ala mi ni Mesi

(Gol Mat 16.13-20; Luc 9.18-21)

27Jesus azi ki mam suma hata a buzuk a i kur azì ma yam ambas sa Sesare d’a Filip-pa. Kid’a a nga kur lovota titid’a, mi djop mam suma hata ala: Suma a nga de kan ala an ni nge ge?

28Azi hulong dum ala: Suma dingâ a nga dala angî Jean ma le suma batemba; suma dingâ ala angî Elie; suma dingâ ala angî ma dingâ tu aduk suma djok vun Alona.

29Wani mi djobozi ala: Agi tagid’a nga dagi kan ala an ni nge ge?

Pierre mi hulong dum ala: Angî Mesi. 30Jesus mi gad’azi kad’enga ala azi de woi kam mbi.

Jesus mi de yam mad’am ki tchol mamba

(Gol Mat 16.21-28; Luc 9.22-27)

31Jesus mi nde mi hat mam suma hata ala: Mbeî an Gor Sana mba ni fe ndaka ngola. Suma nglona azi ki nglo suma ngat buzuna ki suma hat gata a mba noyônu, a mba tchanu, wani kur bur ma hindina, an mba ni tchol akulo aduk suma matna.

32Mi dazi zla ndata woi abu mbak. Wani Pierre mi vum im mbei gen nde, nde mi ngobomu. 33Wani Jesus mi mbut iram mi gol mam suma hata, mi ngop Pierre, mi dum ala: Seitan, iza woi hina dei blogonu, kayam djib’er manga nga ni djib’era hAlonid’a d’i, wani ni djib’era hi sumid’a.

34Ata yi máma, Jesus mi yï ablau suma ki mam suma hata gevemu, mi dazi ala: Le sana mi min á tit balum asenu ni, ar mi noî tamu, mi hlagu mam ma b’ala kamu, mi tit ad’unu. 35Kayam nge nge pî ma nga mi min á sut tama, mba mi ba tam mbeyo. Wani nge nge pî ma ba tam mbei kan an yam Zla d’a Djivid’a mi na, mba mi sut tam mi. 36Wani le sana mi fahle suma yam andagad’ina ki zlazi pet, wani mam tamba mi ba woyo ni, djivi d’a mi fata ni me ge? 37Wani vama sana mba mi mbut ki ari mambina ni me ge? 38Kayam nge nge pî ma le zulona kan an ki zla manda aduk suma tcho bei d’ingêr suma kur atchogoi d’a wandina, fata an Gor Sana mba ni mbeï kur subura hAbunda ki malaika suma mi tinizi irazi vazina, an mba ni le zulona kam mi.

Currently Selected:

Marik 8: BA

Highlight

Copy