Marik 14

Suma nglona a ndjak vunazi tu yam Jesus

(Gol Mat 26.1-5; Luc 22.1-2; Jn 11.45-53)

1Ar burâ mbà á le vun til ma Pak ma a lum kavungô ma bei angufina. Nglo suma ngat buzuna azi ki suma hat gata a nga hal lovota ni nana ba, azi ve Jesus ki lemba á tchum mbei ge? 2Wani azi nga dala: Ar ei vum kur yima vun tilâ d’i, kayam ar huneîd’a ti tchol aduk suma d’i.

Atchad’a ti vo mbulâ yam Jesus

(Gol Mat 26.6-13; Jn 12.1-8)

3Jesus mi nga Betani avo hi Simon ma libina. Kid’a mi nga kaka kä avun tenid’a, atchad’a ti mba kagel la albatred’a oîd’a ki mbul ma his ma afufuî ma nar ma djivi ma guzum ngola heîna. Ti kuzum vunam mbeyo, ti vom yam Jesus.

4Wani suma hiuna, huruzi zala, a de tazi ala: Ni kayam me ba, ti b’lak mbul máma woi na ge? 5Kayam mbul máma le a guzum mbeyo ni, begem mba d’i kal bege d’a hapa kikis hindi á he mi suma houd’a. Hina wani, huruzi zal kat heî.

6Wani Jesus mi dazi ala: Agi arad’u, ni kayam me ba, agi ndagat hina ge? Ti le ni sun nda ata yata kanu. 7Suma houd’a a nga ki sed’egi teteu. Ata yima lara pet ma agi min á lazi djivid’ina, agi ndak á laziya. Wani an nga ki sed’egi teteu d’i. 8Ti le ni vama nda’â, ti lan mbulâ atan avok yam tos manda. 9Gagazi, an nga ni dagiya, ata yima lara ge pet ma suma a mba tchi wal Zla d’a Djivid’a kua yam andagad’a petna, a mba de woi yam vama atcha ndata ti luma á djib’er kad’u.

Judas mi min zlad’a á he Jesus abo suma nglona

(Gol Mat 26.14-16; Luc 22.3-6)

10Judas Iskariyot ma aduk suma hat suma dogo yam mbàna, mi i de mi nglo suma ngat buzuna ala mi min hazi Jesus aboziya. 11Ata yi máma, azi humum ki furîd’a, a hlum vunazi á hum gurzud’a. Ni hina ba, Judas nga mi hal lovota á hazi Jesus aboziya.

Jesus mi te Pa’â ki mam suma hata

(Gol Mat 26.17-25; Luc 22.7-14,21-23; Jn 13.21-30)

12Ad’u tinda hi vun til ma a lum kavungô ma bei angufinid’a, ni yima azi nga ngat tumiyôna Pa’â kuana, suma hata hi Jesus-na a dum ala: Nata yima lara ba, ang min ala ami i mining yima ei tei Pa’â kuana ge?

13Jesus mi sun mam suma hata mbà, mi dazi ala: Agi igi kur azì ma ngolâ, agi mba ngavagi sana kagel la mbina kelemu, agi igi ad’umu. 14Ata yima mi kal kuana, agi dagi mi samazina ala: Ma hat suma mi dala: Gong nga akoi d’a an mba ni te Pa’â kua ki man suma hatid’a ni lara ge? 15Mam mba mi simad’agi gong nga ngol la yam ndrata akulo d’a ahlena pet a nga minda kuad’a; agi minigi te mei ma Pa’â kua. 16Suma hat ndazina a buzuk a iya, a kal kur azina, a fahlena pet d’igi mi dazi na, a min ahle suma te Pa’â kua mi.

17Kid’a afata ti nik dad’a, Jesus mi mba ki suma hat suma dogo yam mbàna. 18Kid’a azi nga avun tenid’a, Jesus mi dazi ala: Gagazi, an nga ni dagiya, sana tu adigagi ni ma nga mi te ki sed’ena, mba mi han abo suma.

19Mam suma hata a djib’er ngola, a nde djobom tutu ala: Ni an ndju?

20Jesus mi hulong dazi ala: Ni ma nga adigagi agi suma dogo yam mbàna ni ma nga mi duvun ki sed’en kur angala tuna. 21Gagazi, an Gor Sana nga ni i á matna d’igi a b’ir kan kur mbaktumba hAlonid’a na, wani ni zlad’a hohoud’a yam sama kol ma mba mi han an Gor Sana abo sumina. Sa máma, ladjï a vud’um mbuo pî ni, hotei.

Mbruka havungônid’a

(Gol Mat 26.26-30; Luc 22.15-20; 1 Kor 11.23-25)

22Kid’a azi nga ted’a, Jesus mi hlavungôna, mi le mersi mAlona kamu, mi mbrugum kä, mi haziziya, mi dazi ala: Agi vagiya, ma wana ni hliwinu.

23Bugol mi hle kopma. Kid’a mi le mersi kamba, mi haziziya, azi pet a tche kuru. 24Mi dazi ala: Ma wana ni buzuwanu, ni vun ma djin ma awilina hAlonina, ni buzu ma mba mi djang ngei yam ablau sumina. 25Gagazi, an nga ni dagiya, an dok ni tche süm guguzlud’a bugol luo d’a, gak bur ma an mba ni tche ma awilina ki sed’egi sä kur leud’a hAlonid’ina.

26Ata yima a hle sawal la gile Alona tuna, a buzuk a i yam ahina d’a Olif-fa.

Jesus mi de woi yam tin vuna hi Pierre-ra

(Gol Mat 26.31-35; Luc 22.31-34; Jn 13.36-38)

27Jesus mi dazi ala: Agi pet mba aran ndeyo, d’igi mbaktumba hAlonid’a ti de na ala: An mba ni tchi ma pola, tumiyôna a mba b’rau woi yayak. 28Wani fata an tchol akulo aduk suma matnid’a, an mba ni iza avorogi Galile.

29Wani Pierre mi dum ala: Le suma dingâ pet a arang ngei pî ni, an mba ni arang ngei d’i.

30Jesus mi hulong dum ala: Gagazi, an nga ni dangû, kur andjege d’a inid’a, bei ahle’â mi hel hel la mbàd’a tua d’a, ang mba tin vunang kan tata yang hindi ala ang wan nga d’i.

31Wani Pierre mi de zlad’a kad’enga ala: Le nda’î á matna ki sed’eng pî ni, an mba ni tin vunan kang ngi. Suma hata pet a de hina mi.

Jesus mi tchen Alona kur Gesemane

(Gol Mat 26.36-46; Luc 22.39-46)

32Jesus ki mam suma hata a i kur yima simiyêm ala Gesemane-na. Jesus mi de mi mam suma hata ala: Agi kagagi ka hî; an i ni tchen Alona. 33Mi yo Pierre azi ki Jacques ki Jean ki sed’emu, vunadigam mbi pat fek, tam mbi nde lum a’alî ngola. 34Mi dazi ala: Hurun b’lak kakazeî á matna; agi kagagi ka hî ki ndjola.

35Mi hut sä avok hina nde, mi ge tam kä, mi tchen ala: Le ndak hina ni, ar yi máma mi kal lei kanu. 36Mi de kua ala: Aba, Abunu, ahlena pet, ang ndak á laziya, ang hle kop ma ayî ma wana woi kanu. Wani ang le ni ata min manda d’i, wani ang le nata min manga.

37Mi hulong mba gen suma hat suma hindina, mi fazi a nga sena, mi de mi Pierre ala: Simon, ang burî sena? Ang ndak á kak ndjola ler tu d’uo? 38Agi kagagi ki ndjola, agi tchenegi Alona mi, kayam agi tchugugi kur kuka d’i. Gagazi, hurâ mina, wani hliu tad’a amangeîd’a.

39Mi hulong i kua á tchenda, mi de ni zla d’a avok ndata d’ei. 40Mi hulong mi mba mi fazi ni kur sena kua d’ei, kayam irazi d’i so woi ngolol abo sena. A we nga vama azi dumzi baluma d’i.

41Mi hulong mi mba yam á hindid’a, mi dazi ala: Ki tchetchemba, agi nga burugi sena, agi tugugi tagi tua! Yina ndak wa, yina mba wa go. Gola! A nga han an Gor Sana abo suma tchona. 42Agi tchologi akulo, ei iya. Gola! Sama nga mi han abo sumina, mi mba wa go.

Ved’a hi Jesus-d’a

(Gol Mat 26.47-56; Luc 22.47-53; Jn 18.3-12)

43Ata yi máma na wat, kid’a Jesus nga mi de zlad’a tua d’a, Judas ma aduk suma hat suma dogo yam mbàna, mi mbeï kablau suma ad’um ki mbuguyo suma fuyogeina ki tutuguyona aboziya. Azi ni suma suma nglo suma ngat buzuna azi ki suma hat gata ki suma nglona a sunuzïna. 44Judas ma hazizi abozina, mi tagazï vama simata ala: Sama an i sobom vunama, ni mamu, agi vagizi djivi ped’et, agi igi ki sed’emu.

45Ata yi máma na wat, Judas mi mba, mi hut gen Jesus, mi dum ala: Ma hat suma, mi sobom vunam mi. 46Sum ndazina a gabozi woi yam Jesus, a vumu. 47Wani sana tu aduk suma a nga tchola gevezina, mi pat mbigeu mam mba fiyaka, mi ka hum azongâ hi ma ngol ma ngat buzunina woyo.

48Jesus mi hulong dazi ala: Agi mbagi atan ki mbuguyo suma fuyogeina ki tutuguyona abogi á van d’igi sama kula na ge? 49Burâ ki burâ an nga adigagiya, nga ni hat suma kur gong nga kud’ora hAlonid’a, wani agi van nga d’i. Wani ahle ndazina a mba hina ná ndak ki vun zla d’a mbaktumba hAlonid’a ti data memet. 50Ata yi máma, mam suma hata pet a aramu, a ringâ.

51Wani gor azongâ nga mi tit ad’u Jesus, mi kleû ni baru d’a hapa atam go. Azi vumu, 52wani mi yagazi barud’a aboziya, mi ring gandila.

Jesus mi nga avok suma b’ak zlad’a

(Gol Mat 26.57-68; Luc 22.54-55,63-71; Jn 18.13-14,19-24)

53Suma a ve Jesus-na a i ki sed’em mi ma ngol ma ngat buzuna. Ni yima nglo suma ngat buzuna azi ki suma nglona ki suma hat gata pet a nga tok kuana. 54Pierre nga mi tit bugol Jesus sä woi hina dei, mi kal hur azina hi ma ngol ma ngat buzunina, mi kak kä gen azungeîna, nga mi hol akud’a.

55Nglo suma ngat buzuna azi ki suma b’ak zlad’a ki zlazi pet a nga hal lovota á ve Jesus ki zlad’a á kam sariyad’a matna kamu, wani azi fe nga zla kam mbi. 56Ablau suma a le glangâs ma aboina kamu, wani zla mazid’a ndjak nga tu d’i.

57Suma hiuna a tchol a tchugum zla d’a aboina kamu, a dala: 58Ami humumi mi dala: An mba ni to gong nga kud’ora hAlonid’a d’a suma a minit kabozid’a woyo, wani bugol kur bur ma hindina an mba ni min nda ding nga bei sana mi minit kabombid’a akulo. 59Hina pî, zla mazid’a ndjak nga tu d’i.

60Wani ma ngol ma ngat buzuna mi tchol akulo adigaziya, mi djop Jesus, mi dum ala: Ang nga de zla tu d’i? Ang nga hum zla d’a sum ndazina a tchugungzi kanga d’i?

61Wani Jesus mi ngruf kiki bei dum zlad’a ba. Ma ngol ma ngat buzuna mi djobom kua ala: Angî Mesi, Alona Gorom ma mi b’e vunam kama zu?

62Jesus mi hulong dum ala: Ni anu. Wani agi pet mba wan an Gor Sana ni kaka sä ata bik ka ndjufa hAlo ma ad’engîd’a, agi mba wan an mbeï kur d’ugula akulo mi.

63Ata yi máma, ma ngol ma ngat buzuna mi haû baru mamba woyo, mi dala: Ei dok halei suma glangâsâ me d’ei ge? 64Agi humugi las sa mi las Alonid’a. Agi djib’er magid’a nana?

Azi pet a kam sariyad’a kam a dala: Mi ndak á tchid’a.

65Suma hiuna a nde tuvom ayôna iramu, a dugum iramu, a tom kaboziya, a dum ala: Sama tongâ ni nge ge? Azungeîna a vum ki tod’a mi.

Pierre mi tin vunam yam Jesus

(Gol Mat 26.69-75; Luc 22.56-62; Jn 18.15-18,25-27)

66Kid’a Pierre nga mi kak hur azinid’a, weid’a hi ma ngol ma ngat buzunid’a, ti mba. 67Ti we Pierre nga mi hol akud’a, ti golom baba, ti dum ala: An wangû. Ang nga tit ki Jesus ma Nazarat máma mi.

68Wani mi tin vunam mi dat ala: An we nga vama ndak duma d’i, an hum nga d’uo mi. Mi nde woi i vun agre’â; ahle’â mi hela.

69Wei ndata, ti wum kua d’ei, nde d’i de mi suma a nga tchola ata yi mámina ala: Sama wana nadigazi mi. 70Mi nde tin vunam kua d’ei.

Bugol hina ndjö, suma a nga tchola ata yi mámina a dum kua ala: Gagazi, angî adigazi mi, kayam angî sama Galile-na.

71Wani mi nde yahlena kamu, mi gun tam ala: An we nga sama agi nga dagi kama d’i.

72Ata yi máma na wat, ahle’â mi hel hel la mbàd’a. Wani Pierre mi djib’er yam zla d’a Jesus mi dumzid’a ala: Bei ahle’â mi hel hel la mbàd’a, ang mba tin vunang kan yang hindi ala ang wan nga d’uo d’a. Kayam ndata, Pierre mi nde tchina.

Currently Selected:

Marik 14: BA

Highlight

Copy