Luc 3

JEAN MA LE SUMA BATEMBA MI TCHI WALA

(3.1-20)

Tchi wala hi Jean ma le suma batembina

(Gol Mat 3.1-12; Mar 1.1-8; Jn 1.19-28)

1Kur bizad’a dogo yam vahl hla Tiber Sesar nga mi te yambid’a, ata yi máma, Pôs Pilat nga mi te yam andaga d’a Jude-d’a, Herot nga mi te yam andaga d’a Galile-d’a, wiyema Filip nga mi te yam andaga d’a Iture-d’a kandaga d’a Trasonit-ta, Lisaniyas nga mi te yam andaga d’a Abilen-nda mi. 2Anne azi ki Kayif ni suma nglona hi suma ngat buzunina mi. Kur bur máma zlad’a hAlonid’a mba d’i fe Jean Zakari goroma abagei hur fulâ. 3Mi tit yam andaga d’a avun alum ma Jurdê-nid’a pet, nga mi tchi wala ala: Agi mbud’ugi hurugi yam tcho magid’a, agi lagi batemba mi. Hina wani, Alona mba mi vat hurum mbei yam tcho magid’a. 4D’igi a b’ir kur mbaktumba hi ma djok vun Alona Isai-d’a na ala:

Wana ni dela hi ma nga mi er ad’um kur fula ala:

Agi minigi lovota hi Ma didinid’a,

agi minigi lovot mam mba gureid’a d’ingêru na.

5Hora pet mba d’i tos seyo.

Ar a blas ahuniyô suma nglona

ki yima ndingâ kä woyo.

Vama gunda mba mi d’oba,

yima ndjondjohlâ a mbud’um papana mi.

6Suma pet a mba we sut ta Alona mba mi sud’uzid’a.

7Kayam ndata, Jean mi de mablau suma a nga mba gevem á fe batemba atama ala: Agi gro mageid’a, sama kid’ezegi á ringîgi woi avok ayî ma nga mbana ni nge ge? 8Agi lagi sun nda memeta á tak kei ala agi mbud’ugi wa hurugiya d’a. Ar agi dagi kurugi ala: Abraham nabumi ngolo na d’i, kayam an nga ni dagi woi mbak ala Alona mi ndak á mbut ahuniyô suma wana grona mi Abraham. 9Ki tchetchemba, andjetna mi ged’a kä ad’u aguna. Agu ma lara ge pet ma nga mi vut vut ta djivid’a d’uo na, a mba kam mbeyo, a mba gum aduk akud’a.

10Ablau suma a djobom ala: Ami lami ni nana ge?

11Mi hulong dazi ala: Sama nga ki barud’a mbàna, mi he tu mi sama nga ki d’uo na; sama nga ki tenina, mi le hina mi.

12 Suma ve lombo suma a mba ala mi lazi batemba na, a djobom ala: Ma hat suma, ami lami ni nana ge?

13Mi hulong dazi ala: Agi vagi bege d’a kal yam mba a hagi vuna kata d’i.

14Azigarâ a djobom ala: Ami lami ni nana ge?

Mi hulong dazi ala: Agi vagi va abo sa kad’enga d’i, agi tchugugi zla yam sa hawa yak ki, agi tinigi hurugi ni yam wurak magid’a go.

15Wani suma a nga djup Mesi na pet, a nga djib’er kuruzi ala Jean ni Mesi zu? 16Jean mi hulong dazi pet ala: Anu, an nga ni lagi batemba ni ki mbina. Wani ma nga mbana, ad’engêm kalanu. An ndak nga ki mam mbi. Ziyo atuguru mama pî, an ndak á bud’um mbi. Ni ma mba lagi batemba ni ki Muzuk ma bei tchod’a ba na kakud’ina. 17Mam nga kangot mam ma sira abomu, mba mi sir awu mama woi yuyung, mba mi togom kur avir mama, wani mba mi ngal brad’a woi kaku d’a bei mit tei ba d’a.

18Ata yima Jean nga mi tchazi wal Zla d’a Djivid’ina, mi gigid’ezi ki zla d’a dinga teteng. 19Wani Jean mi ngop ma te yamba Herot yam zla Herodiyas atchad’a hi wiyema Filip pa mi vata, yam tcho d’a pet ta mi lata mi. 20Herot mi le tchod’a kua, mi ge Jean dangeina.

BATEMBA HI JESUS-D’A KI KUK MAMBA

(3.21—4.13)

Batemba hi Jesus-d’a

(Gol Mat 3.13-17; Mar 1.9-11)

21Ata yima Jean mi le suma pet batembina, mi le Jesus batemba mi. Kid’a Jesus nga mi tchen Alonid’a, akulod’a ti mal leyo. 22Muzuk ma bei tchod’a ba na mi surop kamu, mi hle tam d’igi gugud’a na. Dela ti tcholï akulo, ti dala: Angî Goron ma an hurun vang heîna; tan ndi lan djivid’a heî kangû.

Ad’u andjafâ hi Jesus-na

(Gol Mat 1.1-17)

23Ata yima Jesus mi tin ad’u le sun mambina, bizamî go ki dok hindi. Suma a nga djib’er ala ni Josef ma Heli goromina goroma, 24ni ma Matat goromina, ni ma Levi goromina, ni ma Melki goromina, ni ma Janai goromina, ni ma Josef goromina, 25ni ma Matatiyas goromina, ni ma Amos goromina, ni ma Nahum goromina, ni ma Esli goromina, ni ma Nagai goromina, 26ni ma Mat goromina, ni ma Matatiyas goromina, ni ma Semein goromina, ni ma Josek goromina, ni ma Joda goromina, 27ni ma Jowanan goromina, ni ma Resa goromina, ni ma Zorobabel goromina, ni ma Salatiyel goromina, ni ma Neri goromina, 28ni ma Melki goromina, ni ma Adi goromina, ni ma Kosam goromina, ni ma Elmadam goromina, ni ma Er goromina, 29ni ma Jesus goromina, ni ma Eliyezer goromina, ni ma Jorim goromina, ni ma Matat goromina, ni ma Levi goromina, 30ni ma Simeon goromina, ni ma Juda goromina, ni ma Josef goromina, ni ma Jonam goromina, ni ma Eliyakim goromina, 31ni ma Meleya goromina, ni ma Mena goromina, ni ma Matata goromina, ni ma Natan goromina, ni ma David goromina, 32ni ma Jesse goromina, ni ma Jobet goromina, ni ma Bowas goromina, ni ma Salmon goromina, ni ma Nason goromina, 33ni ma Aminadap goromina, ni ma Atmin goromina, ni ma Arni goromina, ni ma Hesron goromina, ni ma Peres goromina, ni ma Juda goromina, 34ni ma Jakob goromina, ni ma Isak goromina, ni ma Abraham goromina, ni ma Tera goromina, ni ma Nahor goromina, 35ni ma Seruk goromina, ni ma Rehu goromina, ni ma Pelek goromina, ni ma Eber goromina, ni ma Sela goromina, 36ni ma Kainam goromina, ni ma Arpaksat goromina, ni ma Sem goromina, ni ma Noe goromina, ni ma Lemek goromina, 37ni ma Metusala goromina, ni ma Enok goromina, ni ma Jeret goromina, ni ma Mahalalel goromina, ni ma Kenan goromina, 38ni ma Enos goromina, ni ma Set goromina, ni ma Adam goromina, ni ma Alona goromina.

Currently Selected:

Luc 3: BA

Highlight

Copy