Luc 10

Jesus mi sun suma dok kid’iziya yam mbà

1Bugol zla ndata, Salad’a mi man suma hat suma dingâ dok kid’iziya yam mbà. Mi sunuzi mbàmbà avorom á i kur azina ki yima lara ge pet ma mam tam min i kuana. 2Mi dazi ala: Awu ma feta nga ngola, wani suma le sunda akid’eid’a. Kayam ndata, agi tchenegi Sala awuna, kayam mi sun suma sunda á fet awu mama. 3Agi igiya! Gola! An sunugi ni d’igi gro tumiyôna na aduk ngûna. 4Ar agi yogi bid’im mba beged’a d’oze bid’im mba ngola d’oze atuguruna abogi d’i. Ar agi gagi sa dep glovot tuo mi.

5Azì ma ngol ma lara ma agi kalagi kuana, agi gagi suma kur azì mámina depa ala: Ami gagi depa. 6Le sama djivina nga kua ni, dep magi d’a halasa mba d’i kak kamu. Le nga d’uo ni, agi hulongôgi ki dep magid’a. 7Agi kagagi kur azì máma, agi tagi agi tchagi vama azi hagizina, kayam sama le sunda ndak á fe wurak mamba. Ar agi igi kur azina teteng ngi. 8Azì ma ngol ma lara ma agi kalagi kuana, le suma kurâ a vagiya ni, agi tagi vama azi tinigizi avorogina. 9Agi sud’ugi suma tugud’ei suma kur azì ma ngol mámina, agi dazi ala: Alona mi mba wa adigagi á te leu mamba.

10Wani le azì ma ngol ma lara ma agi kalagi kua ma suma kuruma a vagi atazi d’uo na, agi buzugugi woi avun agre’â hazì ma ngol mámina. Agi dazi ala: 11Gugum ma hur aziyagi ma ngol ma mi ve hur asemina pî ni, ami pogizi kagiya. Wani agi wagi woi ala Alona mi mba wa adigagi á te leu mamba. 12An nga ni dagiya, kur bur ma ka sariyad’a, sariya d’a a mba kat yam azì ma ngol mámid’a mba d’i kal sariya d’a a kat yam Sodom-mba.

Azì ma nglo noî á he gagazid’ina

(Gol Mat 11.20-24)

13Jesus mi had’azi kua ala: Ni zla d’a hohoud’a kagi agi suma Korazin-na. Ni zla d’a hohoud’a kagi agi suma Betsaida-na. Kayam an ladjï le sun nda ndandal la wanda aduk suma Tir-râ ki suma Sidon-na d’igi an lat adigagi agi na ni, azi mbut wa huruzi dedei, a tchuk wa baru d’a dodora ki butna kaziya. 14Wani sariya d’a a mba kat kagid’a mba d’i kal la a kat yam azì ma ngol ma Tir-râ ki d’a yam azì ma ngol ma Sidon-nid’a. 15Agi suma Kapernayum-ma, agi djib’eregi kurugi ala a mba yogi gak igi akulo zu? Alona mba mi tchugugi kä woi azul leyo.

16Jesus mi de mi mam suma hata kua ala: Sama mi humugina, humun ni anu; sama noyôgina, mi noyôn ni an mi; sama mi noyôna, mi noî ni Ma sununïna.

Hulonga hi suma dok kid’iziya yam mbànid’a

17Suma dok kid’iziya yam mbà ndazina a hulongî ki furîd’a, a de mi Jesus ala: Salamina, muzuk ma teteng ma tchona pî mi ge yam kä ad’umi kayam simiyêngû. 18Mi hulong dazi ala: An we Seitan mi tcholï akulo, mi nde kä d’igi wiled’a na. 19Gola! An hagi ad’enga á miret guguyona ki hurd’ud’a kä ad’u asegiya, á kal yam ad’enga hi ma djangûnid’a pet mi; vama mba mi lagi tchod’ina nga d’i. 20Kayam ndata, agi lagi furîd’a ala muzuk ma teteng ma tchona mi ge yam kä ad’ugiya na d’i, wani agi lagi furîd’a kayambala simiyêgi mi nga b’ira akulo kur mbaktumba hAlonid’a d’a.

Jesus mi le furîd’a

(Gol Mat 11.25-27; 13.16-17)

21Ata yi máma, Jesus mi le furîd’a ad’u ad’enga hi Muzuk ma bei tchod’a ba nid’a, mi dala: Abun ma Sala akulod’a kandagad’ina, an lang mersi, kayam ang ngei ahle suma wana woi ir suma ned’a azi ki suma wed’a, wani ang tagazi woi mi gugureina. Gagazi, Abunu, ang tang lang djivid’a á le hina.

22Mi de mi suma ala: Abun han ahlena pet abonu. Sama wan an Gorâ nga d’i, nAbun hol. Sama wAbun nga d’i, ni an Goroma hol mi. Sama an Gorâ ni min tagam Abun woina, an tagamzi woi mi.

23Jesus mi mbut iram yam suma hata, mi dazi vazi ala: Ar agi lagi furîd’a kayam iragi wahle ndazina. 24Gagazi, an nga ni dagiya, suma djok vun Alona ablaud’a azi kamulei suma nglona a min á wahle suma agi wazina, wani azi wazi nga d’i, azi min á hum vama agi nga humuma, wani azi humum nga d’uo mi.

D’ogol ma yam ma Samari ma djivinina

25 Ma hat gata tu mi tchol á kuk Jesus, mi djobom ala: Ma hat suma, an le ni nana ba, mba ni fari d’a didinda ge?

26Jesus mi dum ala: A b’ir kur gat meid’a nana ge? Ang ndumut ni nana?

27Mi hulong dum ala: Ang le yam Ma didina Alo mangâ ki hurung pet ki tang pet kad’engêng pet ki djib’er manga pet mi. Ang le yam ndrangâ d’igi ang tanga na mi.

28Jesus mi dum ala: Ang de nata yad’u. Ang le hina, ang mba kak karid’a.

29Wani mi min mbut tam d’ingêr, mi djop Jesus ala: Ndrana ni nge ge?

30Jesus mi hulong dum ala: Sana mi tcholï Jerusalem á i Jeriko, mi ndabo suma kula. A yo baru mama, a tom tatâ, a lum á tchid’a, a aram a iya. 31Ma ngat buzuna, mi hleï lovot ndata. Kid’a mi wumba, mi d’es seyo, mi kala. 32Ma hi Levi-na, mi mba mi, mi wum mi d’es seyo, mi kala. 33Wani ma Samari-na mi hleï tita, mi mba ata yi máma, mi wumu, mi wum hohowomu. 34Mi i gevemu, mi djinim mbilimu, mi vom mbulâ ki süm guguzlud’a kua. Mi hlum mi tinim yam koro mama, mi im kur gong nga akoid’a á ngomomu. 35Tcha ndjivinda, mi yo siled’a mbà, mi he mi sala gonga. Mi dum ala: Ang ngomom nga, vama ang bazam mbei kama, an mba ni wuragang fata an hulongîd’a.

36Jesus mi djobom ala: Aduk suma hindi ndazina, ang djib’er ala ma ndabo suma kulina ndrama ni nge ge?

37Ma hat gata mi dum ala: Ni ma wum hohowoma.

Jesus mi dum ala: Ang iya, ang le hina mi.

Jesus mi kal avo hi Marta azi ki Marie

38Kid’a Jesus azi ki mam suma hata a nga kur titid’a, mi kal avo hurazì ma dingâ. Atchad’a simiyêt ala Marta, ti vum avo hatad’u. 39Wiyeta nga, simiyêt ala Marie. Marie ti kak kä asem Salad’a á hum zla mamba. 40Wani sun nda tena nga d’i kid’eî ir Marta heî. Ti i gen Jesus, ti djobom ala: Salana, ang gola! Wiyenda aran sunda kan hina pet ni, ang nga dat ti ndjunun nduo zu?

41Wani Salad’a mi hulong dat ala: Marta, Marta, ndak nga kur djib’era, huruk nga hat yam ahlena ngola heî. 42Wani vama kal ahlena petna mi nga. Ni vama djivi ma Marie ti manama, ni vama sana ndak á hlum mbei abot tuo na.

Currently Selected:

Luc 10: BA

Highlight

Copy